Job.
39.
Bab-Jehová sogdebalid: “¿Be wisi, ibu-ibagine sibad-sapurbarmalad milege? ¿Goe-sapur-mileged be dakdii? 
¿Be wisi, goe-sapur milegega nii-walabigwa nanae? ¿Be wisi sana milegoe? 
Ar goe-sapur milesokalile, ega nued-aidegega, sinni sigisdaed. Degiid-bergusale, geb ega nunmaked bergued. 
Geb e-mimmigan sapurba dungudamalogua, na gannarbagus itomalale, e-nangi banguddamalad, bar e-nanse nonidasurmalad. 
”¿Doa moli-uayasuid-sapurbarmalad yogasaar gudiguega imaksa? ¿Doa achikar-gudigumalaga imaksabali? 
Ani an moli-uayasuidmarga, nega-dulesulidgan e-negga imaksad, agi gudigumalaga an imaksad. 
Na wargwen e-itolegedba-gudimarsoggua, neggweburgi-neg-oimaked bai itodasurmalad, degi, dule-moli-seed-ese-goledi baisur itodamalad. 
Deyob moli-uayasuidmar yalaganba gudidamalad, gagan-ara-arad amididamalad. 
”Ar moli-bebe-nikad-ursilid, ¿sunna bega arbasar be ebinsae? ¿Sunna be-molimar-gabedgi megisar be ebinsae? 
¿Ar we-moli-ursilid, sunna be e-dukarba edinne? ¿Sunna be-sorba napa-imudaniguega be imake? 
¿Ar we-moli-e-garganguedgi be bengusuli guoe? ¿Ar we-moli-ursilid bega be-arbaed imako be ebinsae? 
¿Sunna be we-moli ibmar-gwag-onmakega be imake? Degine, ¿ibmar-gwag-welesad e-neg-sabolegedse bega danakwaa-urbenaega be imake? 
”Ar nuu-avestruzʼye-nugadi, weligwaledba na e-sakan mer-mer imakardaed, dabgalayob-gukuega sakan niksulid. 
We-nuu-dummad-dukar-suid e-akwa ukubgi urbed, ukubgi-uee-siega, urbed. 
We-nuu-dummad e-akwa-sisad-birgi na annaele, gwen bai itosulid. Ibmar-durgan-egi-annaele, gwen bai daksulid. 
We-nuu-dummad e-mimmigan egadsuliyobi sabsur-imaked, e-ibe surgudele, gwen bai itodasulid. 
Ar Bab-Dummadi, nuu-dummad-dukar-suidga binsaed uksasulid. Magar-neg-itoged ega uksasulid. 
Degi-inigwele, we-nuu, sakan-nallaa-imakdele, degi, abarmakde-sogele, molimarba bur bule abarmaked, dule-moligi-abarmakedgi burgued. 
”¿Ar be, molimarga gargangued uksasi? ¿Ar be moliga sailagia nasiksabarsi? 
¿Ar be, moli ses-ichomakeyobi be imaksasi? ¿Ar be we-moli, sabsur-e-bunnogedgi emar-ogwayed be imaksasi? 
Moli sabsur-annanagusdaed, e-gargangued-nikadba weligwar itonadaed, deyobi, neba-naidbali, ise-abarmakar naddaed. 
Moli dobed wissulid, ibmar dobsulid, urwelenaile, es-suid-abin sikirmaksulid. 
Sigumar moli-dikargi-nanaidi gornanaid, arbon-suarmar, degi, eswarmar-moli-dikargi-nanaidi, dakarmaknanaid. 
Sabsur-abarmakedbali, dikasur-abarmakdedaed. Gar-gotele, gege bar galeged. 
Ar moli gargote-itogele, abarmakega aka binnasur-bunnogar-gotedaed. Bila-onolenaile, dikasuli magar-itoged, bilagi-dulemar-oimaknanaile, dikasur magar-itobalid. 
”¿Ar bee be, noomar-gukuega imaksa? ¿Ar be-binsaedba noomar dad-nakwed-argan-nuedsik-gukuega be imaksa? 
¿Ar be-sogedbali sulubagimar dikasuli-gukuega be imaksasi? ¿Ar be-sogedbali sulubagimar matusuli e-uu-sobega be imaksasi? 
Ar sulubagi akwasaila-dummagan e-negga imaked, agi na e-gabed siid. A-akwasaila-dummad-birgi e-neg-gandikid siid. 
A-akale, bannaba na e-mas-gaega masbina ataksidaed. 
Sulubagi-e-mimmigan ibmar-durgan-e-ablisgi ibmeremalad. Ar bia ibdurgan-burgwar-mai-sogele, agi mula gudidaed.”