Job.
40.
Bab-Jehová, Jobʼga sunmakdebalid, weyob ega sogded: 
“¿Ar dule Bab-Dummad-Bur-Biriginedgi-urwenaidi, gan-bipigi Bab-Dummad-osioye binsasunde? Ar degite, we-dule, Bab-Dummad-abinsado.” 
Geb Job, Bab-Dummad-abin sunmakded, weyob sogded: 
“¿Igi an be-abin-imakosunna? Ar an dule-nuedsulid. Geg an be-abin-imaked. 
Bato ilagwen an sunmaksabinned, bar an sunmakosuli. Bato an ibmar sogsabinned, bar an gannar-gannar ibmar sogosuli.” 
Bab-Jehová burwa-gammuba Jobʼga sunmakded. Weyob ega sogded: 
“An-abin, machered na be san-imako. Be an-odurdakega, emisgi ani an bese ibmar egisgwelo. 
”¿Be an-ibmar-inniki-imaked be osulosunnode? Na be sogega, bedi ibmar inniki-imakdiiye, ¿aga be angi gwisgusunnode? 
¿Be-surgande an-surganyob gangude? Ar be-sunmakedde, ¿an-sunmakedyob gangu-sunmakde? 
”Ar deyobile, be-gangued-yeerdakleged be oyodo, be-ganguedba be-nug-dummarba be imakdo. Be-gangued-yeerdakleged be oyodo, bela-bela be-yeerdakleged be oyodo. 
Be-isdarsun-itodiid mer be bargae, dule-san-dummarba-itodimalad be dake, mesagwar be imake. 
Dule na san-bule-bule-imakdiid be dake, a-dule be obingegsae. Dule-isganamar bia gudii be dakalir, bela be obeloge. 
Bela we-dulemar be dige-dige imake, napa-urba ise digar be imake. 
Ar deyob ibmar-saele, magar an be-dakodo, be dule-buledye, be-ganguedgine be bendakleged amiye. 
”Be dakena, ibdula-Behemotʼye-nugad, moli-bebe-nikadyob unnila gaganbi maed, igi an be-obinnisa, deyob an we-ibdula obinnismogad. 
We-ibdula-e-garganguedi bela e-sorgargi, degine, e-saderba siid. 
E-bunnu urwaryob banamaked, e-dua-gasimar yeer gangu nikabalid. 
E-gar-nikadi esgoro-gordikidyobi nikad, e-nagmar esgoroyob-gangue nikad. 
”An ibmar-durgan-obinnisad-abargi we-ibdula emargi obinmaid. An we-ibdula oburgwebiele, sunna an oburgwed. 
Sapurmar-nanaidi, ega masgunned uked, a-sapurgi ibdurganmar ichomakdididamalad. 
We-ibdula negsichigi obunnomaidaed, masar-matagan-imbaba dukumaidaed. 
Sapimar-urba obunnomaidaed, gaganmar-mata-imbaba gudidaed. 
We-ibdula diwar-noalile, gwen bai itodasulid, diwar-Jordán e-gayase ubomaile, gwen bai itodasulid. 
¿Doa we-ibdula nuu-e-dakmai gaoe? ¿Doa ega asu udkoe?”