Salmos.
6.
David we-namaked narmaksad. Namakmalad-e-iduedga soglenaid: Neginotʼba-namakoye. We-namaked, Seminitʼye nugad. Bab-Jehováʼye, melle ise-urwaledgi be sabsur-an-odurdake, melle sae-itogedgi be sabsur-an-imake. 
Bab-Jehováʼye, wis be wile-an-dake, ar an boniganba nue negoebied. Bab-Dummadye, be an-bendake, ar an-abagan nue-bibichis itoleged. 
Bab-Jehováʼye, ¿sanase be an-bendaknonikoe? Emide, an nue-naibid-dummad itonaid. 
Bab-Jehováʼye, be sabed-nikarbadbali, wis be an-bendakdage, mer baisur be an-dake. 
Ar dule-burgwarmaladdi, bar begi binsamamaisulid. Ar neg-urbardi, ¿doa be-nug odummogoe? Gwen dule be-nug odummogosulid. 
Bela-bela an bodiidbali, gege an sagusad. Bane-bane mutikidbali gachiyala, an ise-ogormakar maidaed. An-ibyanisbali, an-gas-megedi dinnasurgus naidaed. 
An-isdarmalad-nukad, an-ibya an-ibe mommoleded. An-ibya, nunmakedbali, nue bar ataksurgusad. 
¡Dule-isganamar! Be angi bangumala. Ar Bab-Jehová, an-bodiid itononikid. 
Bab-Jehová an ese wilesakwaa-gornaid an-itononikid. An-ese-gornaid an-itosad. 
Ar bela an-isdarmaladi, surbinsa-itodmaloed, an-isdarmaladi, bingegudmaloed. Bingegudedba wakitemaloed.