Salmos.
9.
David we-namaked narmaksad. Namakmalad-e-iduedga-soglenaid: Gar-goledba namakoye. Bab-Jehováʼye, bela-belad an be-nug odummogoed. Bela be-ibmar-gegerdaklemalad-imakdiidgi an sunmakoed. 
Bab-Dummadye, begi an werguoed, begi an yeer itogoed. Bab-Dummad-Bur-Biriginedye, be-nuggi an namakoed. 
An-isdarmalad be-abin wakitemalad, amar yoledapmalad, amar be-abin bela burgwismalad. 
Be-ologanagi be sigisad, dulemarga innikigwadba be igar naboged. A-ulale, innikigwadba be anga igar nabosad, be anba nagunonikid. 
Bab-Dummad, dule-yar-baid-baidgi-bukwamaladse be sabsur-ulusad, dule-isganamar be obelosad. A-dule-isganamargi dulemar bipisaale bar binsaega be imakosulid. 
An-isdarmalad bela bergusmalad, dule-wargwensaale gwen gudii gussulid. E-neggweburmar bela napabi nagusad, bipisaale gwen bar egi binsalegosulid. 
Bab-Jehováʼdi dulemarga igar-itogega e-ologanagi sigisad. Bab-Jehováʼdi degisadegu maigu guoed. 
Bab-Jehová dulemarga innikigwadba igar naboged, degi, dulemarga igar-innikigwadba negseed. 
Bab-Jehováʼye, be neg-dukuedyob dule-mesagwar-imakledimaladga gued. Ibagan-suli-suli-itolegedgi, Bab-Jehováʼye, a-dulemarga be galu-gandikidyob gued. 
Bab-Jehováʼye, dulemar-be-amimaladi be wargwen bipisaale metedisulid. A-ular, dule-magar-be-dakmalad begi bensurmalad. 
Bab-Jehová, Sión-neggweburgi negdakmaid. A-Bab-Jehováʼga namakmar. E-ibmar-dummagan-imakedgi, dule-yar-baid-baidgi-bukmaladga be sunmakmar. 
Bab-Dummad, be dule-gindakmalad buged-mai-imakosurdeeye sogsulid, Bab-Jehová dule-wiledimalad-ese-gornaid nue itodaed. Amar-iegodeeye sogsulid. 
Bab-Jehováʼye, wile be an-dake. Nue be dakena, isdar-an-dakmalad nue an-wionanaid. Melle dulemar an-oburgwega be imake, 
adi, Jerusalén-neggwebur-dogedgi, dulemarga an be-nug-odummogega, degine, be an-bendakedgi an weligwar-itogegar. 
Dule-aku-be-dakmalad na dukin yardaklesmalad. Emar-gaega, saki-odukuar-nasismaladgi, na dukin e-nag galesmalad. 
Bab-Jehová-igar-innikigwadbi-imaked, bela nue-magar daksamalad. Dule-isganamardi, dukin e-ibmar-isgana-imaksadgi yardakledimalad. 
Dule-isganamar, bela burgwed-negse seledmaloed. Dule-yar-baid-baidgi-bukmalad Bab-Dummad-ieddamalad, amar neg-urba burgwed-negse seledmaloed. 
Ar dule-wiledimaladdi, be degisadegu iegosulid, dule-baidse-sabsur-wiledimalad be-ibmar-edarbedimalad, berguus be imakosulid. 
¡Bab-Jehováʼye, nue be atake! ¡Dulemar melle begi-nakwed be imake! Dule-yar-baid-baidgi-bukmaladga be igar-itoge. A-dulemar be sabsur-odurdake. 
Bab-Jehováʼye, dulemar-e-niga be egwane. Dule-yar-baid-baidgi-bukmalad wisgued be imake, emarde, Bab-Dummadsurmarye, unnila dule-gumarye.