Salmos.
20.
David we-namaked narmaksad. Namakmalad-e-iduedga soglenaid. Dobedba be suli-suli itogele, Bab-Jehová be-itogena gadin. Jacob-e-Bab-Dummad-nuggi, be bendaklegena gadin. 
Bab-Jehová e-neg-islidikid-akale, bega bendakleged barmidagena gadin. Bab-Dummad Sión-yar-akale, be-bendakena gadin. 
Ega be ibmar-ukedi, Bab-Dummad bela insaena gadin, ega be ibmar-ogumakar-ukedi, be-abin nuedgi abingaena gadin. 
Be ibmar-abediidbali, Bab-Dummad bega ukena gadin. Be ibmar-imakedgi-binsaedi, bega bela nueganbi guena gadin. 
Boni-dummagangi be obichale, anmar weligwar-itogedba oimakdemaloed. Anmar-Bab-Dummad-nuggi, olo-bander omemmermakdemaloed. Bab-Jehováʼse be ibmar-egichisadi, bela bega sogedba imakena gadin. 
Ar emigindi an wisdo, Bab-Jehová, e-nuggi-rey-nugsalegaled bendakoed. Bab-Jehová e-ganguedgi, bila-onolegedgi, rey-nakwemai-guega imakoed. Bab-Jehová e-nibneg-islidikid-akale, rey-abinsaoed. 
Dulemar gwenna-gwenna unnila moli-ur-bila-onomaladginbi bensurmalad, baigandi e-molimarginbi bensurmarmogad. Anmardina, unnila anmar-Bab-Dummad-Jehováʼgi bensurmalad. 
We-dulemardi nue geg gugus galakudmalad. Anmardina, amba Bab-Jehováʼgi-bensulidba ganna gudimalad. 
Bab-Jehováʼye, sorda-bila-onomaladgi, rey-nakwega be imako. Bab-Jehováʼye, anmar bese gotele, be anmar-abinsao.