Salmos.
34.
David yamo iwileyob na imaksagu, Abimelecʼse ononnolesgusad. A-ulale, David we-namaked narmaksad. An bane-bane Bab-Jehová-e-nug-odummodii an guoed, an ega namakdii guoed. 
Bab-Jehováʼba an nug-dummarba itoged. Deyob dule-na-san-dummarba-imakdisurmalad itononimaloed, agi Bab-Jehováʼgi wergudmarmogoed. 
Bemar an-balikwaa Bab-Jehová-e-nug odummomar, anmar bela danakwaa e-nug odummomar. 
An Bab-Jehová-amidigua, an-abin-imaknonikid. An ibmar-dobgudiidgi, an-ollor-imaknonikid. 
Dulemar Bab-Jehováʼse-idaksamaladi, egi gangunonimalad, bipisaale bingeguosurmalad. 
Ani, an dule-wileged, an Bab-Jehováʼse-gochagu, an-itononikid, agine, bela bonigangi an-ollor-imaknonikid. 
Bab-Jehová-e-baliwitur dule-e-nug-odummodiid-bendakegala, ese nonidaed. 
Bemar-sunnagwad be dakdamala, Bab-Jehová-ibidar-nuedid be dakmala. Dule, Bab-Jehováʼgi-bensurgudiid, egi nued binsalediid. 
Bemar Bab-Jehová-sordamar, Bab-Jehová-dobekwaa nanamar. Dule-Bab-Jehová-dobekwaa-nanadimaladi, ibmarsuli-gudii guosurmalad. 
Dule-mani-ibmala, dule-wilegedga nadmaloed, ukud-itodii gudmaloed. Dule-Bab-Jehováʼgi-bensur-gudimaladdina, ibmarsuli-gudii guosurmalad. 
Mimmigan, dagmala, an-itodamala: Bab-Jehová-dobekwaa-nanaedgi an be-odurdakmaloed. 
Ar dule na wergudii gubiele, iba-nuegangi weligwar nanadii gubiele, 
ibmar-isganagi-sunmaked na bargaergebed, gakansaar-sunmaked iegergebed. 
Ibmar-isgana-imaked iegergebbalid, ibmar-nuedbi imakergebed. Neg-bogidikidbina gudiguergebed, neg-bogidik-imakdii gubalirgebed. 
Bab-Jehová dule-inniki-gudimalad akwediid, wemar-ese-goled nue-itodaed. 
Dule-ibmar-isgana-imakmaladgindina, egi yoleged. Bab-Jehová a-dulemargi yoleged, adi, we-napneggi mer bar egi binsalegegar. 
Dule-inniki-gudimalad Bab-Jehováʼse-gotele, Bab-Jehová abin-imaked. Bab-Jehová bonigangi dule-inniki-gudimalad nue-bendaked. 
Bab-Jehová dule-naibi-itodimaladba gudiid, dule-bukib-binsadimalad nue-bendakbalid. 
Dule-inniki-gudiid, bonigan-bukidar nikued, degi-inigwele, Bab-Jehováʼdina, bela a-bonigangi ollor-imakoed. 
We-dule-e-garmar akarguega imakosulid, gwen wargwensaale e-ibe-bibislegega imakosulid. 
Dule-isganamar ibmar-isgana-imakdimaladba na dukin wioged. Ar dulemar dule-innikidamalad-isdardakdimaladi, odurdaklegedsemalad. 
Bab-Jehová dule-ega-arbadimalad nue bendaked, Bab-Jehováʼgi-bengudisurmalad, sabsur-odurdaklegosurmalad.