Salmos.
39.
David we-namaked narmaksad. Namakmalad-e-idued-Jedutúnʼga soglenaid. An na dukin sogsad: “An itoakwaa nanadii imakoye, adi, an-sunmakedgi mer an isguegar. Ar dule-isgana an-asabin gwichile, andi ibmar-sogosulid.” 
Degisoggu, an sunmaksasulid, ar ibmar-nuedse-bakale, bar an bissulid. Degi-inigwele, nunmakeddi anga ulubgi nasgumai gusad. 
An-gwagedi uelleded. An we-ibmargi-binsasiidgi an isdar itoded, geb an sogdesunnad: 
“Bab-Jehová, an-ibagan-berguoed be anga soge, birgabigwa an napi-dulagudiguoed be anga soge, adi, an sikwas-gudiguoed magar itogegar. 
Bab-Jehová, wis-ichee-dulagudigued be anga uksad, an-birga-nikaddi be-asabinni birgamar-nassuliyob be daked. We gakansulid, bela-dulemar-gudidiid sikwas-bunnogedyob gudidimalad. 
”Ar napiragwad, anmar we-napneggi unnila sikwas gudimalad. Dule binsarsunna sulibinsa itodiid. Ar binsa na ibmar-nuegan saboged, ar wissulid, doa we-ibmar sunonikoe. 
”Bab-Jehováʼye, degisoggu, ¿bia an bendakleged amiosunna? Unnila an beginbi bendakleged amied. 
Bab-Jehováʼye, bela an-isguedgi be an-ollorsae, mer dule-binsaed-nikasurmalad angi-dodomalaga be imake. 
”An bar sunmaksasulid, an bar ibmar-sogsasulid, ar bee be deyob ibmar imaked. 
”Bab-Jehováʼye, mer bar be sabsur-an-odurdake, ar be an-oburgwednaga an-imaknaid. 
Be dule-isgued-sabsur-odurdakedba dule-nudaked, na bur e-ibmar-binasoged uduyob be e-ibe obeloged. We gakansulid, bela-dulemar-gudidiid, sikwas-bunnogedyob gudidimalad. 
”Bab-Jehováʼye, an bese-goled be itoge, an bega-ibmar-soged be itoge, an-boed mer be itosuli gue. Andi bega dule-ainebalid gued, bela an-dadgan-nanadigusadyobi an yar-obak-obak gudiid. 
Mer isdar be an-dake. An we-napneggi-naed-iduar, an gannar weligwar itogoed.”