Salmos.
59.
David we-Mictam-namaked narmaksad. Namakmalad-e-iduedga soglesad: We-namakedi, ar igi namaked “Melle-obeloged” namaklege, deyobi namaklegoye. Deunni, Saúl, David-oburgwega e-sordamar David-negse barmisgu. Bab-Dummadye, an-isdarmaladgi be an-ollorsae, angi aibinmaladgi be an-bendake. 
Dule-ibmar-isgana-imakmaladgi be an-ollorsae, dule-gindakmaladgi be an-bendake, 
ar an-oburgwebimalad. Bab-Jehová, an nossulinad, an isgussurbalinad, degite, dule-isganamar angi-aibinmalaga na atosmalad. 
An ibmar-isgana imaksasur-inigwele, degite, an-oburgwebimalad. Bab-Jehováʼye, be gwae-dage, be an-bendakdage. Be dake, igi an be-asabin gwichi. 
Bab-Jehová, be, Bab-Dummad-Bur-Gangued-Nika-Maid. Be, Israel-e-Bab-Dummadid. Dule-yar-baid-baidgi-bukwamalad-sabsur-odurdakega gwae be dage, dule-isgana-emargi-aibinmalad, mer be wiledake. 
Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad. 
Yogasaar sunmakmalad, emargi yolegar sunmakmalad. An-itogosurmaladdeeye sogdedamalad. 
Bab-Jehová, ar bedi we-dulemarga be alled, bela dule-yar-baid-baidgi-bukwamaladgi be dodoged. 
Ar be an-ganguedsoggu, an begi bensulid. Ar be an-odukuedid. 
Be, Bab-Dummad-wile-an-daked an-iduoed. Bab-Dummad an-isdarmalad-galakued anga oyogoed. 
An-dulemar mer a-dule-isganamar-iegega, mer ilagwen-obelogar be imako. Be, Bab-Jehová, sigu-abgaedyob an-irwa-gwisguedid. Be-ganguedgi be oaisakie, be-garganguedgi be irgwensur-imake. 
Na e-ibmar-isgana-sogedba, e-sunmakedba, emar-ukabsaedba, e-gakansaedba, san-dummarba-imakdimaladba, na dukin yardaklemarsun. 
Bab-Dummad, urwedgi be amar-obeloge, mer bar dulagudigumalaga be obeloge. Deyobi, bela Israel-yargine wisgumaloed, Bab-Dummad bela we-napneg-ugakaase, negdakmaiye. 
Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad. 
Masgunned-amiega gaamakdidamalad, immelessurmalale, mutikidba urwedidamalad. 
Bab-Dummad, ar andi be-ganguedgi an namakoed. Wakudaryalaba be-dula-wiledakedgi an namakoed, ar bedi an-bendakedid. An-surbinsa-itoged-ibagi bedi an-dukuedid. 
Be, an-ganguedid, an bega namakoed, ar bedi, Bab-Dummad, an-dukuedid. Bab-Dummad, be an-sabedid.