Salmos.
60.
Namakmalad-e-iduedga soglesad: Bab-Dummad-Dulemarbo-Igar-Mesisad-e-dutu-lirio-nugadba namaklegoye. Deunni, Aram-Naharimʼgi, degi, Aram-Sobaʼgi bila-ononaidgi, Joab gannar nonigu, Balu-Nebagi miliambe-gakabo (12,000) Edomʼginmalad ogilosad. Agi, David dulemar-odurdakega namaked-Mictam narmaksad. Bab-Dummad, bedi anmarse ulusad, be anmar-obachad, be anmar-wiosad. ¡Bab-Dummadye, be anmar-bendakdage! 
Napneg-naid yeer be ogiglimaksad, yeer napamar argas-nanaed. E-yaa-argasmaladi be nudake, ar binna-binna babatemaigusad. 
Yeer-gangu be-dulamar be wilubdaksad, vino-gagbid-gobega be anmar-imaksad. 
Dule-sigu-miemaladgi san-onogega, beba-inniki-nanadimaladgala, igar-inniki-maid be oyosad. 
Be-dulamar-be-nue-sabedi, nabir bendaklegega, be-ganguedgi be anmar-bendake, be anmar-abinsae. 
Bab-Dummad, be-neg-islidikidgi be weyob sogsad: “An Siquem-neggwebur-mimioedgi, weligwale an itoged. An Sucot-neba-naid-ilemakoedgi, weligwale an itoged. 
Galaad, angadga gued, Manasés, angadga gued. Efraín, an-bormo-gurginga gued. Judá, an-gaapoledga gued. 
Moab, an-argan-enukedga gued. Edomʼgi, an-sapat bikiin an metoed. Filistea-neggweburgi, gandikidba an gormakoed.” 
¿Doa, neggwebur-gandikidse an-nidoe? ¿Doa anga, Edom-yalase-aibillemaid oyogoe? 
Bab-Dummad, ¿bee be anmar-obachagussursi? Bab-Dummad, bar be anmarga sorda-bila-onomalad-bendakdisurgusad. 
Dule-isdarmaladgi-nakwega be anmar-imake. Ar dulemar anmar-bendakele, anmar gwen igarga guosulid. 
Bab-Dummad, anmar bebali unnila anmar-isdarmaladgi nakoed. Be anmarga, anmar-isdarmalad obelogoed.