Salmos.
63.
David Judá-nega-dulesulidganba-gudigusgu, we-namaked narmaksad. ¡Bab-Dummad, be an-Bab-Dummadid! ¡Bolegoedba an be-amioed! An uku-uku-itogeyob an bebina soged, an-sana bela bebina soged. Ar igi dule nega-dulesulidganba dii-satedgi dii-amididae, deyobi, an be-amied. 
Bab-Dummad, an be-gangued-yeerdakleged-dakega, bese-goled-neggi an be-dakbied. 
Dula-gudiguedba be-sabgued bur-nuedid. A-ulale, an bega namakoed. 
Dula-gudiidgi an be-nug odummodii guoed. An be-nug-odummogega an-argan an onakoed. 
Mas-nued-immerba-guchayobi an yeer-itogoed. An yeer-itogedgi bega namakoed. 
An megidele, an begi binsamaidaed, bela mutikidbali, an begi binsamaidaed. 
Ar be an-bendaksad, deyobi, be-an-bendaksadgi an yeer-itoged. 
Andi begi alakwaa naid, ar be-gargangued an-bendaked. 
Ar dule-an-oburgwebimaladdi bergumaloed, nega-urbali argwanmaloed. 
Es-suidgi oburgwilemaloed, achu-sapur-masga gumaloed. 
Ar reydi, Bab-Dummadgi weligwar-itogoed. Dule Bab-Dummad-nuggi-ibmar-ise-sogar-soged weligwaledgi Baba-Dummadga namakmaloed. Ar dule-gakansilimardi gaya-maklemaloed.