Salmos.
64.
David namakmalad-e-iduedga we-namaked narmaksad. Bab-Dummadye, an-ibmar-isdar-itogedi, an bega sognaidi, wis be itoge. Bab-Dummadye, be an-bendake, an-isdarmalad dobe an itodiid. 
Dule-isganamar-anbina-itosgudimalad-idu, be an-odukue. Dule-ibmar-isgana-imakmaladgi, be an-onoge. 
Es-suid-nugar-datarmakle-daebayobi e-gwabin-duku imakmalad. Igi sigu-milege, debayobi, e-gwabin-duku gayaburba-isganagan dulegi mied. 
Dule-gwen-neg-oakalossulidgi, yamo arbakee gwichiguddamalad, wile-gwen-daksuli, dulegi aibitedamalad. 
Dule-isganamar, na muchub-muchub e-igar-isganagi ogannobukwadamalad. Idu igar-amibukwadamalad, igi imakmalodibeye. Sogdedamarbalid: “¿Ar doa anmar-dakosunna?” 
Dule-isganamar igar-isgana-nue-amibukwadamalad, sogdamalad: “Anmar igar-napiragwad amibukwamalad.” Dule-binsaedi ibiyobi, nue-akusunna itolege. 
Bab-Dummaddi a-dulemargi e-sigu midoed. Wissuli-bukwadgi galedamaloed. 
Dukin na e-gwabin-sunmakedgi sabsur-odurdaklemaloed. Doa deyob dakdagoe, egi dodoar sunmakdoed. 
Bela dulemar-bukwadgi dobed nagunonikoed. Degidgine, Bab-Dummad-ibmar-dummagan-imaksadgi sunmakdemaloed. Agine, magar Bab-Dummad-ibmar-imaksadgi binsadmaloed. 
Dule-nuegan, Bab-Jehováʼgi wergudmaloed, egi bensuli gudmaloed. Dule-gwage-nuegan yeer itodmaloed.