Salmos.
79.
Asaf, we-namaked narmaksad. Bab-Dummad, dulemar-aku-be-dakmalad be-yargi ubosmalad. Bese-goled-neg-islidikid oichosmalad. Jerusalén-neggwebur akwabi-dunnumakbukwa imaksamalad. 
We-dulemar, be-maimar-e-mui, mulamarga masga uksamalad. Dule-bega-inniki-nanadiid-e-sanmar, ibdurgan-ursilimarga masga uksamarbalid. 
Be-maimar-e-ablis, bela Jerusalén-neggweburgi diiyobi eosmalad. Burgwismalad-digega dule sate gusad. 
Dulemar-anmar-yar-dikarba-bukmaladi, anmargi dodomalad, dulemar-anmar-yar-dikarba-bukmaladga anmar e-dodoedga gued. 
Bab-Jehováʼye, ¿sanagwadse be-urwed berguoe? ¿Sanagwadse degisadegu be urwemai guoe? ¿Sanagwadse be-nobgued sooyob gamai guoe? 
Dulemar-aku-be-dakmaladse be urwe, dulemar-bese-gordisurmaladse be urwe. 
Ar we-dulemar, Jacob-wagan obelosmalad. Jacob-wagan-e-yar akwabi-dunnumakbukwa imaksamarbalid. 
Bab-Jehováʼye, anmar-epenne-isgusad, mer be bar ebinsae. Be-wiledaked gwae be anmarga oyoge, ar anmar bela-bela oitoles bukwad. 
Bab-Dummad-anmar-abonoged, be-nug-dummarba-gued-ular, be anmar-bendake. Be-nug-sabed-ular, be anmar-ollorsae, anmar-isgusad be elie. 
Ar ibiga dulemar-yar-baigangi-bukwad sogmaloe: “¿Bia e-Bab-Dummad nade?” Be anmarga oyoge, igi-be, be-dulamar-e-ablis-aryosad be buged-mai imake. Bela dulemar-yar-baid-baidgi-bukwamaladga oyobali, igi-be, be-maimar-e-ablis-aryosad be buged-mai imake. 
Dule-galesbukmalad-e-boed be itoge, dule-oburgwilesokarmaladi, be-garganguedba be bendake. 
Bab-Jehová, dulemar-anmar-yar-dikarba-bukwamalad begi dummad-dododigusmaladi, ilagugle (7) deyob-egi-dodomarmogaga be imake. 
Anmardi, be-dulamar-gumalad, be-sibad-wawaadmaryob-gumalad. Degisadegu, anmar dog-nuedye bega sogmaloed. Degisadegu, anmar bega namakmaloed.