Salmos.
83.
Asaf, we-namaked narmaksad. Bab-Dummad, melle be gaya-bogidik mege. Bab-Dummad, melle be sunmaksuli gue, melle be ibmar-imaksuli gue. 
Bab-Jehová, be dake, ibibayobi be-isdarmalad uurmakbukwa, ibibayobi isdar-be-dakmalad begi gwisgunanai. 
Be-dulamargi-aibinega yardakar igar-amismalad. Be-dulamar-na-be-sabgumaidgi-gwisgumalaga, yardakar bular igar-amismalad. 
We-dulemar sogmalad: “Dagmala, anmar bela e-dulamar obelonae. Deyobi, Israel-e-nug bar bipisaar ebinsalegosulid.” 
Dule-wargwennayob na igar-aminanaid, begi bila-onomalaga, we-dulemar na atosmalad: 
Edom-dorgan, Ismael-dorgan, Moab-dorgan, Agar-dorgan, 
Gebal-dorgan, Amón-dorgan, Amalec-dorgan, Filistea-dorgan, degi, Tiro-dorgan, bela wemar na atosmalad. 
Asiria-dorganse-bakale, bela wemarba atosad. Lot-wagan-bendakega atosmalad. 
Ar igi be Madián-dulemar-obelosgusa, deyobi be we-dulemar obelomoga. Ar igi be Sísara, degi, Jabín, Cisón-diangi-obelosgusa, deyobi be we-dulemar obelomoga. 
We-dulemar Endorʼgi burgwismalad, ibmar-isganayob napagi miled gusmalad. 
Ar igi be Oreb, degi, Zeeb, imaksagusa, deyobi be e-sordamar-dummagan imakmoga. Ar igi be Zeba, degi, Zalmuna, imaksagusa, deyobi be bela e-dummagan-nuga-nikamalad be imakmoga. 
Wemar sogsagusad: “Bab-Dummad-e-yar-naidi, anmar e-ibe sumala.” 
Bab-Dummad, we-dulemar burwaba-selegega be imake. Gaganmar burwaba-gukuddaeyobi be we-dulemar-imake. 
Ar igi soo sapur-ogumakdae, degi, igi soo-gwabunyemaid yarmar-ogumakdae, 
deyobi be we-dulemar, be-burwa-dummadgi be baleginne, be-burwa-ooredgi, be ogwaye. 
Bab-Jehová, we-dulemar be obingegsae, adi, magar-be-dakmalaga, be Bab-Dummad gued. 
We-dulemar, degisadegu bingegudii gumala, na bingegudii burgwemala. 
Na wisgumala, bebi Bab-Jehová gued, weyobi be nugad. Na wisgumala, napneggine, bebi unnila Bab-Dummad-Bur-Birigined gued.