Salmos.
90.
Bab-Dummad-e-dule-Moisés Babse goled. Bab-Jehová, be anmarga degisadegu, anmar-dukuedga gudiguad. 
Bab-Jehová, amba yoo yarmar be urbegua, amba yoo napa be obinyegua, amba yoo napneg be obinyegua, degisadegu dikasurgus, emi-ibadse, bato bedi Bab-Dummad gued. 
Bab-Jehová, be sogdele: “¡Dulemar, gannar napaga-binyemarye!” Be-sogedbali dulemar gannar napaga binyiddaed. 
Bab-Jehová, birga-miligwenadi (1,000) bega sae-iba-nasadyob gued, bega sikwas-neg-mutikid-nasadyob gued. 
Bab-Jehová, igi diwar-noder ibmar-seddae, deyobi, be dulemar-seddaed. Dulemar, unnila sikwas-gabdakedyobi dulagudigued. Dulemar, wakdaradba gaganmar-ainiar-daedyobi gued. 
Wakdara e-dutumar achundagoed. Sedogusale, bato dingudoed, degi-burgwidoed. 
Bab-Jehová, be-urwedi anmar-obeloged, be-sae-itoged anmar-dobe imaked. 
Anmar-ibmar-isgana-imaked bela be wisid, anmar-isgued-ulubgi-naidi begi dukusulid. 
Bab-Jehová, be-urwed-ular, anmar-san bergumaid, anmar-ibagan sikwas-bunnolegeyob gued. 
Anmar birga-dulapaa-gakambese (70) dulagudigued. Anmar-bur-dutusur-gumaladdi, sunna birga-dulabakese (80) warmaked. Degi-inigwele, suiti-dulagudiguedi, unnila arbaed-dummad anmarga uked, wile-itoged anmarga uked. Igi anmar sikwas-dula-gudigue, deyobi, birgamar nasmogoed. 
Bab-Jehová, ¿doa be-urwed-gangued magar-itoge? Be-urwed bela-bela-gangusoggu, anmarga dobed-dummad uked. 
Bab-Jehováʼye, anmar sikwas dula-gudisoggu, be anmarga binsaed-nikagued uke, adi, anmar nued nanadii guegar. 
Bab-Jehová, gwae be anmarse dage. Ar anmar be-dulamar gued. ¡Be-maimar be wile dake! 
Wakudaradba, be-sabgued be anmarga oyoge, anmar bane-bane bega weligwaledgi namakdii guoed. 
Igi birgabargus suli-suli-itogega, degi, wile-itogega be anmar-imaksa, emigindi, ibagan debayobi-mergue be anmar-weligwar imake. 
Be-maimarga be-ibmar-imaked be oyoge, e-waganga be-gangued-dummarbad be oyoge. 
Bitigi anmar-Bab-Dummad-Jehová-nued-binsaedi, anmargi oyolenonikina gadin. Bab-Dummadye, anmar-ibmar-imakedgi be nued-binsae, anmar-ibmar-imaked be onasgumai imake.