Salmos.
91.
Dule, Bab-Dummad-Bur-Biriginedgi-dukued-amiedi, Bab-Dummad-Bela-Gangued-Nika-Maid e-edarbedga guoed. 
An Bab-Jehováʼga soged: “Be an-dukuedid, be an-garganguedid, an-Bab-Dummad, an begi bensulidid.” 
Bab-Jehováʼbi bonigan-dukuar-bukwadgi be-ollor-imaked, boni-bulegangi be-ollorsaed. 
Igi gannir e-sakan-urba e-mimmigan-odukue, deyobi Bab-Jehová be-edarbedga guoed. Bab-Jehováʼgi be dukued amioed. E-gayaburba be-sigu-abgaedyob guoed, be-edarbedga guoed. 
Mutikidba boni-noed be dobguosulid, ibginedba sigu-mileged be dobguosulid, 
negsichidgi boni-gudiid be dobguosulid, yoruku boni-dule-ogiloged be dobguosurbalid. 
Be-argan-sapiledsiki, miligwen (1,000) dulemar burgwemai guoed, be-argan-nuedsiki, miliambe (10,000) dulemar burgwemai guoed. Bedi akar-guosulid. 
Dule-isganamar sabsur-odurdaklegoed, be-sunnad be dakoed. Bedi sabsur-odurdaklegosulid. 
Ar bedi Bab-Jehová be-odukuedga imaksasoggu, Bab-Dummad-Bur-Birigined be-edarbedga imaksasoggu, 
ibmar-isgana gwen be-ebugosulid, boni-dummagan gwen be-neguyase warmakosulid. 
Ar Bab-Jehová, e-baliwiturmarga igar-ukoed, bia be nadesogele, adi, be-edarbemalagar. 
Mer be akwagi-gowarmakega baliwiturmar nakwaa be-semai guoed. 
Achumigur-nono-wawaadgi be obinoed. Naibe-nuedgi be dii-dii annaoed. Be achumigur-nono-wawaad-sapingwagwad naibi-imakoed. Be naibe-bulegan oburgoed. 
Bab-Dummad soged: “Ar an-sabsoggu, ani an ollor-imakoed, ar magar-an-daksoggu, bonigangi an bendakoed. 
Ar anse-gollalile, an abinsaoed, na surbinsa-itogedgi an eba gudiguoed, an ollor-imakoed, an e-nug odummogoed. 
An ega birga-ichesur-dula-gudigued ukoed, an-abonolegedgi weligwar-itodii an imakoed.”