Salmos.
95.
¡Dagmala, anmar weligwaledgi Bab-Jehováʼga namakmala! ¡Anmar weligwaledgi Bab-Dummad-anmar-abonogedga namakmala! 
Anmar Bab-Jehováʼga doggus-nuedye-sogedgi e-negse doge. ¡Anmar Bab-Jehováʼga namake! 
Ar Bab-Jehová, bur Bab-Dummadid, bela ibmar-bab-dummadyob-imaklemalad-birgi, bur Rey-dummadid. 
Bab-Jehová, na e-argan-yaurgi napa-billigan ganikid, yala-dummagan-matusurmalad na egadid. 
Muu-billi-maidi, egadid, ar na e obinnisad, neg-dinnagwad-naidi na e obinnisbalid. 
Dagmala, anmar Bab-Jehová-nug-odummogega napase wagar dulluu imakmala. Anmar Bab-Jehová-anmar-obinnisad-abin yokorgi sindigar sigmala. 
Ar e anmar-Bab-Dummadid. Anmardi e-dulamar gumalad, e anmar-edarbedid. Anmardi e-sibad-wawaadyob gumalad, e anmar-akwediid. Ar emi bemar Bab-Jehová-gayaburba itogele, 
melle be Meribaʼgi-gusmalayob, bur bule burgumalo. Ar igi deun nega-dulesulidganba Masahʼye-neg-nugadgi bur bule burgusgusmala, melle be deyob burgumalo. 
Deun agine, be-dadgan amba an-ibmar-imaksad-daksamar-inigwele, an-wilubdaksa gusmalad, urwega an-imaksa gusmalad. 
Birga-dulabo (40) an be-dadgan-ebo sae-itodii gusad. An sogsa gusad: “We-dulemar noar nanadimalad, an-igar-maidba ibsadisurmalad.” 
Degisoggu, an sae-itogedgine, an weyob ise-sogar sogsa gusad: “Ega-yar-ukoye-an-sogsadgine, dogosurmalad, agine, an ega obunnoged ukoenad.”