Salmos.
105.
Bab-Jehováʼga dog-nuedye be soge, e-nug be odummomala. Bab-Jehová-ibmar-imaksad be dulemar-yar-baid-baidgi-bukwamaladga soge. 
Be namakmala, Bab-Jehová-e-nug-odummogega be namakmala. Bela e-ibmar-dakledisurmalad-imaksadgi be sunmakmala. 
Bab-Jehová-nug-isligwaledgi be san-dummarba itomala. Dulemar-Bab-Jehová-amidimalad ulubgi wergumala. 
Bab-Jehová be amimala, e-gangued be amimala. Bab-Jehová-amidigu be imakmala. 
Bab-Jehová-ibmar-gegerdaklemalad-imaksad be insamalo. E-ibmar-dummagan-imaksad be insamalo. E-igarmar-sogsad be insamalo. 
Bemar, Bab-Jehová-mai-Abraham-e-wagan gumalad. Bemar, Jacob-e-wagan gumalad. Bab-Jehová e-dulemarga bemar-imaksad. 
Bab-Jehová anmar-Bab-Dummad gued. Bela we-napneggine, Bab-Dummad-e-igarmar oyolemamaid. 
Wagan miliba-gwago-inigwele, Bab-Dummad Israel-Dulemarbo-Igar-Mesisadi gwen iegosulid. 
Bab-Jehová Abraham-ebo igar-mesisgusad, Isaacʼga ise-sogar-imaksad, an bega a-igar imakedseye. 
Bab-Jehová, Jacobʼga igar-mesisgua, Israelʼbo degisadegu igar mesisgua, 
ega sogsagusad: “Canaán-yala begadga-guega an bega ukoed.” 
Anmar ichee-guen-inigwele, anmar yar-sate gudigusmar-inigwele, 
anmar yar-baid-baidgi-gudigusmaladgi, neggwebur-baid-baidgi gudigusmaladgi, 
Bab-Jehová, sabsur-anmar-imaklegega gwen imaksasulid. Anmar-ulale, reymarga sabsur-ibmar-sogsad. 
Weyob sogsa gusad: “Melle an-dulamar-nugsalegarmaladse achao, melle an-gayaburba-barsogmalad naibi-imako.” 
Bab-Jehová, Canaán-yalagi ukud-dummad nasiksad, agi masgunned sate imaksad. 
Degi-inigwele, Bab-Jehová, dule-wargwen-Joséʼye-nugad emar-idu Egipto-yalase barmisgusad. José maiga manigi ukles gusad. 
Egipto-dulemar José-e-nag esgoro-dubgi edichagusmalad, geb esgaryagi metegusmalad. 
José-ibmar-sogsa-gusadba neg-gunonigua, Bab-Dummad agi oyosad, ede idu-ibmar-sogsad, we napiraye. 
Geb Egipto-rey sognonigusad, José esgaryagi-siid onomarye. A-rey, deunni, dule-bukidaradga negsemaid. 
Rey, José bela e-neggi ega ibmar-dakega onugsanonigusad, bela e-dulemar-e-dummadga-guega imaksad. 
Adi, José reyga-arbamalad-dummagan-odurdakega imaksad, e-girmar-selegan-binsaed-nikagued-odurdakega imaksad. 
Geb a-sorbali, Israel, Egipto-yalase nonigusad. We-Jacobʼde, Cam-yalagi, e-yarsulidgi maigusad. 
Agine, Bab-Jehová, e-dulamar-bukidar-merguega imaksad, e-isdarmaladba bur-dutusuli imaksabalid. 
Bab-Jehová, Egipto-dulemar-e-binsaed ogwasad, isdar anmar-dakega imaksad, degisoggu, anmar-wioar gussunnad. 
Agine, Bab-Dummad, e-mai-Moisés-susagusadi, Aarón-susagusadi, Egipto-yarse barmiargusad. 
Agine, Bab-Dummad, wemar-ebogwad, Cam-yalagi ibmar-dakledisulid-imakega imaksad. 
Bab-Jehová, Egiptoʼgi negsichid nasiksagusad, bela neg-gudure imaksagusad, degite, Egipto-dulemar Bab-Dummad-gayaburba itosurgusmalad. 
Egipto-diwarmar abega obinnisgusad, e-uamala ogilosgusad. 
Bela Egipto-yala ammanoo yaisur-nika imaksad, rey-e-negyaginse-bakar, ammanoomar-nika imaksad. 
Bab-Dummad-sunmaksagu, gukurmar-bukidar ainiargusad, bela Egipto-yalagangi, guumar yaisur-nika imaksad. 
Dii-wied-anar, dii-gwamakaled-wiega imaksad. Egipto-yalagi mar-dakarmakmai imaksabalid. 
Uvaʼmar-digar-bukwadi, higueraʼmar-bukwadi ei obelosgusad. E-yalagangi sapimar-bukwad ei bibichisgusad. 
Bab-Dummad sunmakdegua, ses-dummagan onisad. We-sesmarde, bela-bela-mergu batisad. 
Sesmar, bela Egipto-yargi gagan-obelosad. Ibmar-durba-e-sanmar, bela obelosbalid. 
Bab-Jehová, Egipto-yalagi bela machi-sailaginmalad oburgwisgusad, bela gebesailagi-gwalulesmalad ogilosgusad. 
Bab-Jehová, Israel-dulemar or-bukidar-semamai, mani-bukidar-semamai onosgusad. E-dulemar-wargwensaale, gwen-burgwissurgusad. 
Egipto-dulemala nue-dobe itomarsoggu, Israel-dulemar ainide-daksamargua, yeer itosgusmalad. 
Bab-Jehová Israel-dulemarga mogir nasiksad, adi, a-urba ambikumalagar. Neg-mutik ega neg-mee imakega ega soo ogasad. 
Bab-Dummadse mas-egichismargu, nuu-codornizʼye-nugad ega uksagusad. Madu-nibnegginedgi immeles gusmalad. 
Ega akwasaila egasgusad, agi dii aryoargusad. Nega-dulesulidganba ega dii aryomai imaksad. 
Bab-Dummad deyob imaksadi, e-mai-Abrahamʼga gayaburba-ise-sogar-sogsad gwen iessulid. 
Bab-Dummad e-dulamar weligwaledgi onosgusad, ber yeer-itogedgi e-dulamar-susadi onosgusad. 
Dulemar-baigan-yala na e-dulamarga uksad. Dulemar-baigan-arbasad-e-ibmar-sanmaksamalad na e-dulamarga uksabalid. 
Bab-Jehová, na e-dulamar e-igar-uksadba binsaed-nika-gudi-imakmalaga imaksad, eba nanamalaga imaksabalid. ¡Degisoggu, Bab-Jehová-nuggi wergumarsun!