Salmos.
106.
¡Aleluya! ¡Bab-Dummad-e-nug odummomar! Bab-Jehová-nug dummarba imakmarsun. Bab-Jehováʼga dog-nuedye sogmar. Ar Bab-Dummad, dule-nuedid, e-sabgued, degisadeguad. 
¿Doa, Bab-Jehová-e-ibmar-bulegan-imaksad sogedba nabir barsogoe? ¿Doa, Bab-Jehováʼga-namaklegedgi sogedba sunmakoe? Dule barsoged sate. 
Dule-igar-inniki-imakdimaladgi, igar-maidba gusgu ibmar-imakdimaladgi nued-binsalesad. 
Bab-Jehová, wile be-dulamar be dakalile, wis be angi binsao. Be, be-dulamar-bendakdanikile, mer be an-iemogo. 
Adi an, be-dulamar-susa-gudiidba, e-wergudimaladba wergumogoed. Be-dulamar-na-be-nug-imaksa-gudiid-abargi namakmogagala, be an-bendakdage. 
Anmar, anmar-dadganyob isgusad, anmar, ibmar-isgana imaksad, anmar, galagwensuli-gudii gusad. 
Anmar-dadgan Egipto-yargi-bukwagu, bela aku be-ibmar-gegerdaklemalad-imaksad daksamalad. Degi, be-sabgued-dummarbadgi gwen binsassurmarbalid. Aka Demar-Ginnidye-nugad-dikarba begi-yolenai gusmalad. 
Degi-inigwele, Bab-Jehová na e-nug-sabed-maidba bendaknonikid, na e-gangued-dummarbad-oyogega deyob imaksad. 
Bab-Dummad Demar-Ginnidye-nugadse gotegua, demar argaas naded, geb dinnaa megisad. Bab-Dummad demar-wilasaila-maigusadba, e-dulamar-semai gusad. Neg-dulesulidganba-nadapiyob, e-dulamar-semai gusad. 
Bab-Dummad anmar-dadgan-bendaksad, e-isdarmalad-argan-yaurgi-bukwa bendaknonikid. 
E-isdarmalad-birgi demar gannar-arwega imaksad, degisoggu, wargwensaale durgussulid, bela burgwismalad. 
Geb anmar-dadgan Bab-Dummad-ibmar-imakoye-sogsadgine, bar bengussurgusmalad, agi, Bab-Dummadga namakde gusmalad. 
Sikwas ibagan-nasgua, Bab-Dummad-ibmar-imaksad ienonimarbalid. Bab-Dummad-e-igar-imakbied edarbissurmalad. 
Anmar-dadgan negsulidganba-gudigua, e-itolegedba ibmar imaksamalad. Wargwen-gudimaladbali, Bab-Dummad-wilubdaksamalad. 
Degisoggu, Bab-Dummad, ese-ibmar-egisnanaidba ega ukdesunnad, Bab-Dummad, boni-buled-emar-ogiloged ega barmiarsunnad. 
Deunni, negsulidganba gudidimargua, Moisésʼgi nobguargusmalad, Bab-Jehová-nug-imaksad-Aarónʼgi nobguargusmalad. 
Geb agine, napa argadgusad, degidbali, Datán napase dolesgusad. Abiramʼye-nugad, degi, e-sordamarse-bakale, napa-yaba barmellede gusmarmogad. 
We-dulemardi, soose bergus gusmalad. Bela-we-dule-isganamar soose gummaksa gusmalad. 
Anmar-dadgan, Horeb-yargi, moli-bebe-nikad-sapingwagwad e-bab-dummadga-imakegala, sobsagusmalad. Bormo-sobaled-asabin dulluu imaknanai gusmalad. 
Bab-Dummad-e-nug-odummoleged-anar, moli-bebe-nikad-gagan-maed-sobaled-e-nug odummodmalad. 
E-Bab-Dummad-e-abonosaddi iedemalad, Egipto-yargi ega ibmar-gegerdakleged-imaksad bela iedemalad. 
Cam-yar-naidgi, Bab-Dummad ega ibmar-dakledisulid-imaksad bela iedemalad. Demar-Ginnidye-nugad-dikarba, ega ibmar-bulegan-imaksad, iedemarbalid. 
Ar Bab-Dummad Israel-dulemar-oburgwedgi binsasanad. Degi-inigwele, Moisés, Bab-Dummadgadga-nug-imaklesadi, wemar-irwa Bab-Dummad-asabin gwisgusad. Agala, Moisés wis Bab-Dummad-barganonikid, adi, Israel-dulemar, mer Bab-Dummadse ibitomalagar. 
Deginbali, napneg-nued-ega-uklesadi, isdar-daksamarbalid. Bab-Dummad-ega-ibmar-imakoye-sogsadgi, bengusmarbalid. 
Ar Bab-Jehová-ega-ibmar-sogsadba ibsassurmalad, aka e-dordonegyaba uurmakbukwa gusmalad. 
Degisoggu, Bab-Dummad amargi yolenonisunnad. Adi, negasulidganba sabsur-odurdaklemalagar. 
Adi, e-wagan dule-bamaladse sabsur-wilemalagar. Degi, yar-akar-akar-bukwadba mimilemalaga imaksad. 
Baal-Peorʼye-nugad na-e-bab-dummadga imaksamarbalid. Bab-dummagan-burbasulidga ibmar-ukleged guchamarbalid. 
E-ibmar-isgana-imakedbali, Bab-Jehová-nue-oulusmalad. Degisoggu, boni-dummad ega nagunonisunnad. 
Agine, Finees igar-innikigwad imaknonikid, geb bonigan bargalenonikid. 
Finees we-ibmar-nued-imaksadbali, degisadegu, egi nued-binsalemai gulesunnoed. 
Meriba-dii-naid-dikarba, Bab-Jehová-oulusmarbalid. We-dulemar-nukad Moisésʼga neg isgunonikid. 
Moisés-surbinsa-itogega imaksamalad, abali, Moisés bar-nue-binsassuli ibmar-soge-soge sunmaknai gusad. 
Bab-Jehová ega sogsa gusanad, dulemar-bamalad-bukwad oburgwemaloye. Degi-inigwele, eba ibsassurmalad, oburgwissurmalad. 
Aka e-dulesurmaladba apurudmalad, a-ibmar-imakmaladba akadmalad. 
Dule-baigan-e-bab-dummagan-e-nug odummodmalad. Degisoggu, we-ibmar egi aibinnonisunnad. 
Niamarga e-bunamala, e-masmala, oburgwenanai guarmalad. 
Dule-ibmar-okalodisulid-e-ablis eosmalad, a-e-masmala-e-ablis eosmalad, a-e-bunamala-e-ablis eosmarbalid. Canaán-dulemar-e-bab-dummaganga amar-oburgwenanai guarmalad. Degidbali, ablis-aryosad-ular, napneg isgunonikid. 
Weyob neg-imaksamaladbali, neg isgunonikid, bela isgunonimarsunnad. 
Degisoggu, Bab-Jehová e-dulemargi nue-uluded, isdar e-dulemar-sunonikid-dakdesunnad. 
Agala, Israel-dulesurmaladga urmaknonikid, e-isdarmaladse nilebukwa gusmarsunnad. 
E-isdarmaladse sabsur-imaklebukwa guarmalad, amarse apor-imakledii gusmarsunnad. 
Bab-Jehová bukidargus Israel-dulemar-bendakdii gusanad. Degi-inigwele, emardi, Bab-Dummadgi bur bule yoledgusmalad. Degidbali, isguedgi bur bule nanadmarsunnad. 
Bab-Dummad e-dulamar-surbinsa-itonanai-dakdegua, gormaknanaid-itononigua, 
e-dulamarbo-igar-mesisad ebinsaded. Sabbarsoggua, wile dakded. 
Bab-Dummad, Israel-dulemar-e-isdarmalad Israel-dulemar-wiledakega imaksabalid. 
Anmar-Bab-Jehováʼye, anmar-bendakdage, anmar-yar-baid-baidgi-mimiles-bukwadgi gannar be anmar-yarse be anmar-barmide, adi, anmar be-nug-isligwaled odummogega, weligwaledgi bega namakegar. 
Israel-e-Bab-Dummad-Jehová-nug dummarba gusun. ¡Degisadegu, e-nug odummolesun! Bela dulemar weyob sogmar: “¡Napira deyob gusun!” ¡Bab-Jehová-nug odummomar!