Salmos.
107.
Bab-Jehováʼga dog-nuedye sogmala, ar edi, dule-nuedid. E-sabgued, degisadeguad. 
Bab-Jehováʼse-abonolesmalad, Bab-Jehováʼse-e-isdarmalad-ganguedgi-bela-bela-bendaklesmalad, 
Bab-Jehová bela-Israel-dulemar-yar-baid-baidgi-bukwad senonikid: Dad-nakwedsikmalad, dad-argwanedsikmalad, dad-nakwed-argan-sapiledsikmalad, dad-nakwed-argan-nuedsikmalad. Amar Bab-Jehováʼga dog-nuedye sogmala, ar edi, dule-nuedid. E-sabgued, degisadeguad. 
Dulemar-abala nega-dulesulidganba yoggus gaamakdii gusmalad. Neggwebur-megdapmaloedse-momalaga, gwen igar-amisuli-gudii gusmalad. 
Na mas-gunbigudii gusmalad, uku-uku-itodii gusmarbalid, gwen san-bar-onoged itossurmalad. 
Geb surbinsa-itogusmaladba Bab-Jehováʼse gochamalad, geb Bab-Jehová e-wiledimaladgi bendaknonikid. 
Bab-Jehová neggwebur-megdapmaloedse-momalaga, igar-innikigwadba idumai gusad. 
Dule-nue-wiledakmaid-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala. 
Bab-Jehová dule-uku-uku-itodimaladga ukud obeloged. Dule-ukudmaad-itodimaladga bur mas-nued uked. 
Abala nue-wile-itobukwa, emar-maiga-bukwa gusmalad. Negasichidgi, burgwednaga-bukwa gusmalad. 
Ar Bab-Jehová-Bur-Birigined-igar-sogsadba ibsassurmalad. Ar Bab-Jehová-binsaed-uked isdar itosmalad. 
A-ulale, Bab-Jehová arbaed-dummad ega urmaksad, aimukumai gusmalad, dule gwen bendaksasulid. 
Geb surbinsa-itogusmaladba Bab-Jehováʼse gochamalad. Geb Bab-Jehová, e-wiledimaladgi bendaknonikid. 
Negasichidgi-burgwednaga-bukwamaladgi onosad, emar-maiga-gudidiidgi onosad. 
Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala. 
Ar yawagakmar-esgoro-gordikidgi-sobaled bibichisad, yawagak-edimalad-esgorobiid ubi-ubi imaksad. 
Anmar-dadgan Bab-Jehová-Igar-Sogsadba gwen ibmar-imaksasurmarsoggu, binsaed-satedyob gusmalad. Ibmar-isgana-imaked-ulale, wiledii gusmalad. 
Bela ibmar-gullemaladi ega aged ukdaed. Bato e-bergued-ibagan ese warmaksa itosgusad. 
Geb surbinsa-itogusmaladba Bab-Jehováʼse gochamalad. Geb Bab-Jehová, e-wiledimaladgi bendaknonikid. 
Bab-Dummad na e-sunmakedba dulemar-nudaksad, deyobi, burgwedgi bendaksad. 
Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala. 
Bab-Jehováʼga doggus-nuedye-sogleged-ibmar-ukleged be ukmala, weligwaledgi e-ibmar-imaksad be sogmala. 
Dulemar muu-billi-dummaganba mani-amiegala, muu-billiba urgi nanadimalad. 
Wemala, Bab-Jehová-e-ibmar-imaksad daksamalad. Muu-billi-wilasailadgi e-ibmar-gegerdaklemalad-imaksad daksamalad. 
Bab-Dummad e-sunmakedba burwa binnasur ogochad, demardi bela-bela dunguded. 
Urdi mogirmar-naidse nakwiddaed, muu-billi-wilaganse gannar aidenonidabalid. Ar dulemardi burgwe-itomaladba niga-argwatemalad. 
Mummuyobi banamakdidii guarmalad. Aimukumamai guarmalad. E-ibmar-wisidi binsa-wismalad, gwen e-bendaksasulid. 
Geb surbinsa-itogusmaladba Bab-Jehováʼse gochamalad, geb Bab-Jehová e-wile-itomaladgi bendaknonikid. 
Bab-Dummad burwa-dummad bogidik imaksad, demar bipii imaksabalid. 
Ar burwa-bogiledgua, dulemar yeer itosmalad. Deyobi, Bab-Jehová ur-naguedse dulemar-sesad. 
Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala. 
Bemar, dulemar-onmakbukwad-abargi, Bab-Jehová-e-nug odummomala. Girmar-dummagan-danar-bukwad-abargi, e-nug odummomala. 
Bab-Dummadi, e-dulamar-ichakwadamalad-ular, diwarmar nega-dulesulidganga obinnisad, dianmar neg-dinnaganaga obinnisbalid. 
Bab-Dummadi, e-dulamar-ichakwadamalad-ular, napa-gadi-ibmar-sanmakedi, napa-ichakwaga imaksad. 
Bab-Dummad nega-dulesulidgan diimarga obinnisad, neg-dinnagwad dianmarga obinnisad. 
Agi dulemar-uku-uku-itodimalad urbisad, geb we-dulemar megmalaga negmar sobsamalad. 
Nainumargi ibmar-gwag digsamalad, uva-dubmar digsamarbalid. A-ibmardi ega bela-bela sanmaksad. 
Bab-Dummad we-dulemargi nued-binsasad, e-dulamar mergudmalad, e-molimar merguega imaksabalid. 
Ar e-dulemar icheleddibe, ibgwensur-imakleddibe, mesagwar-imaklebukwad-ular, deyob guoed. Sabsur-imaklebukwad-ular, nue-wilebukwad-ular, deyob guoed. 
Bab-Dummad dulemar-nue-nug-nikamalad ibgwensur-daked, nega-dulesulidganba gaamakdii imaked. 
Ar Bab-Dummad, dule-wilegeddi na e-wilediidgi onoged. E-gwenadgan, sibad-wawaad-mergueyobi, bukidar-nika imaked. 
Dule-nuegan weyob-ibmar-dakoedba weligwar itomaloed. Ar dule-isganamardi, bar-sunmakosurmalad. 
Ar dule, binsaed-ibedile, we-ibmar gwagegi sedii guoed, Bab-Jehová-e-sabgued magar itogoed.