Salmos.
118.
Bab-Jehová-e-nug odummomar. Ar Bab-Jehová dule-nuedid. Ar Bab-Jehová-e-sabgued, degisadeguad. 
Israel-dulemar, emisgi be sogmala: “Bab-Dummad-e-sabgued, degisadeguye.” 
Aarón-e-wagan, emisgi be sogmala: “Bab-Dummad-e-sabgued, degisadeguye.” 
Bab-Jehová-dobekwaa-gudimalad, emisgi be sogmala: “Bab-Dummad-e-sabgued, degisadeguye.” 
An bonigan-abalagi-gudiidgi, Bab-Jehováʼse an gochagusad. An gochagua, an-abin-imaksad, neg-olloledgi an-ogwisgunonikid. 
Bab-Jehová anba gudiid, degisoggu, an ibmar dobsulid, ar dule akar an-imakosulid. 
Bab-Jehová anba gudiid, ar nue-an-bendakdiid. Degisoggu, isdar-an-dakdimalad, napayala-baparmakdii an dakoed. 
Dulemargi-bensuliguedba bur Bab-Jehováʼgi-bengusuligued abeleged. 
Dule-nug-nika-gudimaladgi-bensuliguedba bur Bab-Jehováʼgi-bengusuligued abeleged. 
Dulemar-yar-baid-baidginmalad an-ebiris gusmalanad, degi-inigwele, Bab-Jehová-nuggi anse ogilolesmalad. 
Bela an-ebirismalanad, degi-inigwele, Bab-Jehová-nuggi anse ogilolesmalad. 
Burmaryobi an-ebirismalanad, degi-inigwele, gagan-soogi-gummakeyob anse gusmalad. Bab-Jehová-nuggi anse ogilolesmalad. 
An-egwanmalagala, sabesuli an-barmete gusmalanad, degi-inigwele, Bab-Jehová an-bendaknonikid. 
Ar Bab-Jehová an-niga-gandikidga gued, an-namakedga gued. Ar Bab-Jehová an-abonogedid. 
Dule-inniki-gudimalad, weligwaledgi oimakdemalad, bendaklenonimaladba e-neg-e-neggi weyob binnasur-gotemalad: “Bab-Jehová e-garganguedgi ibmar-bulegan imaked. 
Bab-Jehová-e-gargangued, biriginedid. Bab-Jehová-e-gargangued ibmar-bulegan imaked.” 
An burgosulid, an dula-gudii guoed. Bab-Jehová-ibmar-imaksad-barsogega an dula-gudii guoed. 
Bab-Jehová undar-naibi an-imaksad, degi-inigwele, an-oburgwissurgusad. 
Anga yawagak egamar, Bab-Dummadse-goled-neg-e-yawagak anga egamar, Bab-Jehová-nug-odummogegala, agi an dogoed. 
We, Bab-Jehová-e-yawagak gued, agi dule-inniki-gudimaladbi dogmaloed. 
Bab-Jehová, be an-abin-imaksasoggu, an bega dog-nuedye soged, ar be an-abonosad. 
Akwa dule-neg-sobmaladse-oballesadi, neg-sobleged-e-akwasailaga gunonikid. 
Bab-Jehová deyob we-ibmar imaknonikid, anmarga geger-dakle gunonikid. 
We-ibagi Bab-Jehová anmarga ibmar imaksad, ¡anmar egi wergumarsun, yeer-itomarsun! 
Bab-Jehováʼye, wilesakwaa an bese gornaid, be anmar-abonoge. Bab-Jehová, anmar-onasguega be anmar-imake. 
Bab-Jehová-nuggi-dule-danikid, Bab-Jehová egi nued-binsasun. Bab-Jehová-e-neg-akale, anmar ega sogsun: “Bab-Jehová begi nued-binsasunye.” 
Bab-Jehová, Bab-Dummadid. Anmarga gwallu-meegwadyobi gued. Igarba bipirmaknamalo, sapi-e-anagan semamai gumalo, Bab-Jehováʼga-ibmar-ogumakar-ukleged-ailagi moli-bebeyob-nonaidse sedmalo. 
Bab-Jehová, ar be an-Bab-Dummadid, agala, an bega dog-nuedye soged. Bab-Jehová, ar be an-Bab-Dummadid, agala, an be-nug-odummoged. 
Bab-Jehová-e-nug odummomar, ar Bab-Jehová, dule-nuedid, ar Bab-Jehová-e-sabgued, degisadeguad.