Salmos.
119.
Dulemar-inniki-nanadimalad, Bab-Jehová-Igar-Maidba nanadimalad. Amargi, Bab-Jehová, ise-nued binsaed. 
Dulemar-Bab-Dummad-Igar-Maidba-gudimaladi, bela-bela-ulubgi-be-amidimaladi, amargi, Bab-Jehová, be ise-nued binsaed. 
We-dulemar, bipisaale ibmar-isgana imakdisurmalad, unnila, Bab-Dummad-Igarbarbi nanadimalad. 
Bee be Be-Igar-Islidik-Mamaid mesisad, adi, a-sogedba nanamalagar. 
Be-Igar-Mamaidba an nanadiguega, bitigi bela-bela eba an innikii nanadii gusana gadin. 
Bela Be-Igar-Islidik-Mesisadba an nanaele, an binge-itogosulid. 
Be-Igar-Inniki-Nabolemalad-Mamaid an durdaksale, an innikigwadbali ulubgi be-ogannogoed. 
¡Be-Igar-Mamaid-Sogedba, an nanaoed! ¡Bipisaale melle be an-iego! 
¿Igi-sapingwa melle-isguega, na nuekwaa nanadii guergebe? Unnila, Be-Gayaburba-Maidbarbi nanadii guergebed. 
An gwage-ulubgi bela-belad, an be-amidiid. Be-Igar-Islidik-Mamaidgi, melle aibanega be an-imako. 
Melle begi-isguegala, Be-Gayaburba an-gwage-ulubgi an na sediid. 
¡Bab-Jehová, be-nug-odummolesun! ¡Be-Igar-Mamaidgi be an-odurdake! 
Igar-Megisadba bela be ibmar-sogsadi, dulemarga an sogsad. 
Bela ibmar-nikadba bur bule Be-Igar-Mamaidba-nanadiidgi an weligwar itodiid. 
Be-Igar-Islidik-Mamaidgi an binsaoed, Be-Igarbarbi an nue-nanadii guoed. 
Be-Igar-Mamaidgi an weligwar itogoed. Bipisaale, an Be-Gayaburba gwen iegosulid. 
An be-mai-guedi, nue-wile be dakdii guo, deyobi, an nabir gudii guoed, be-Gayaburba-sogedba an nanadii guoed. 
Be-Igar-Biriginmalad-Mamaid, magar-itogega be an-imake. 
We-napneggine, an dule-baid gued, melle angi Be-Igar-Islidik-Mamaid be odukue. 
Bane-bane an Be-Igar-Nabolemalad bei-durdakbiedbali, an yaisur-itoged. 
Dule-san-dummarba-imakmaladse be urwemaid. Dule-isganamar, Be-Igar-Islidik-Mamaidgi-banguder, ega be sabsur-ibmar soged. 
Melle we-dulemar isdar-an-dakmalaga, be imako. Melle ibgwensur-an-samalaga be imako, Ar an Be-Igar-Mamaidba an nanadiid. 
Dule-gandikmalad angi ichakwa-sunmakmar-inigwele, andi be-mai-guedi, Be-Igar-Mamaidginbi binsadii guoed. 
Be-Igar-Mamaid, weligwar an-imaked, anga binsaed-ukedid. 
An san bela-itoged, Be-Anga-Ibmar-Sogsadba be an-ogannoge. 
An-gudiidgi an bega sunmaksagua, be an-abin-imaksad. ¡Be-Igar-Mamaidgi be an-odurdake! 
Be-Igar-Islidik-Mamaidi, magar-itogega be an-imake, adi, be-ibmar-gegerdaklemaladgi an binsaegar. 
An ulubgi wile-itogedba bodiid, degisoggu, Be-Gayaburbagi baisur-itogega be an-imake. 
Gakan-igarmargi mer-nanaega be an-imake. Be-wile-dule-dakmaidba Be-Igar-Nuegan-Maidgi be an-odurdake. 
Igar-Napiragwad-Maid an susad. Be-Igar-Mamaid angadga an imaksad. 
Bab-Jehová, Be-Igar-Sogsadgi an alamaknaid, melle bingeguega be an-imako. 
Be-Igar-Islidik-Mamaidba an gwae ibsaoed, ar gwage-weligwar an-imakdaed. 
Bab-Jehová, Be-Igar-Mamaidgi be an-odurdake, an eba nanadii guoed. 
Be-Igar-Maidba-nanaegala, Be-Igar-Maid magar-itogega be an-imake. Geb gwage-ulubgi bela-belad eba an nanadii guoed. 
Be-Igar-Islidik-Mamaidba be an-iduge, ar agi an wergued amied. 
Unnila Be-Igar-Mamaidbarbi-binsaega be an-imake. Melle ibmar-baiganbina-surbinsa-itoged be an-imake. 
Melle ibmar-binsarmaladbina-sogega be an-imake. Be-Igar-Maidba-nanaega be an-imake. 
Igi be dule-be-dobee-nanadimaladga be ibmar imaksa, deyobi, an-be-mai-guedga be Ibmar-Imakoye-Sogsad, be imake. 
Mesagwar-imaklegedgi an dobe-itodiidgi be an-onoge, ar Be-Igar-Nabogedi, we, ibnuedid. 
Be-Igar-Islidik-Mamaidbina an nue-soged. Be-igar-innikii-imakedba dula-gudii be an-imake. 
Bab-Jehová, igi na be Sogsa-Gusa, deyob be-sabgued be anse oyoge, deyob dule-bendaked be anse oyoge. 
Deyobi, dule-isdar-an-dakmaladga an sogoed. Ar Be-Ibmar-Sogsadgi an bensulid. 
An-gwabinduku, ibmar-inniki-soged be imake. Ar Be-Igar-Mamaidgi an bensulid. 
Be-Igar-Mamaidba an degisadegu ibsadii guoed, Deyob degisadegu an imakoed. 
An bonisuli nanadii guoed, ar an Be-Igar-Islidik-Mamaid amisad. 
Be-Igar-Mamaidgi reymar-asabin an sunmakoed, gwen an bingeguosulid. 
Be-Igar-Islidik-Mamaidbina an nue-soged, an egi wergued. 
Be-Igar-Islidik-Mamaid an nue-sabedbali, an-argan an onakoed, Be-Igar-Maidgi an binsaoed. 
An-be-mai-guedga be Ibmar-Sogsa-Gusadi be ebinsao, a-Gayaburba-abdakagwar-gudiguega, be an-imaksad. 
An bukib-binsaedba-wile-itodiidgi, a-Gayaburba baisur-itogega an-imaked, Be-Ibmar-Sogedi, an-ogannodaed. 
Dule-san-dummarba-imakmalad angi nue-isdar sunmakdimalad, degi-inigwele, andi Be-Igargi bangudisulid. 
Bab-Jehová, be epenne Be-Igar-Nabosadi an ebinsaed. A-Igarmala, an-gwage-baisur-itogega imaked. 
Dule-isganamar Be-Igar-metemaladi, sae-itogega an-imaked. 
An we-napneggi sikwas-gudiidgi, Be-Igar-Mamaid, an-namakedga gusad. 
Bab-Jehová, mutikgusale, an be-ebinsaardaed. Be-Igar-Sogedba an nanabied. 
Be-Igar-Islidik-Mamaid-sogedba-nanadiguedi, angi siid, an imakedsegad. 
Bab-Jehová, bebi angadga gued, Be-Gayaburbaba-nanaoye an sogsad. 
Bela-bela gwagegi an be-amidiid. Be-Ibmar-Sogsadba ise-wile be an-dake. 
An-daedgi an binsaargua, Be-Igar-Mamaidba an gannar nanaded. 
Be-Igar-Islidik-Mamaid-sogedba nanaegala, an undar-binsadii gussulid. 
Dule-isganamar an-gaegala, an-ebirdimalad. Degi-inigwele, Be-Igar-Maidi an gwen-iessulid. 
Be-Igar-Inniki-Maid-nukad, an bega dog-nuedye-sogegala, nega-gabigwenbali an gwichiguardaed. 
Ani an, dulemar-be-dobekwaa-nanadimalad-e-aid. Ani an, Be-Igar-Islidik-Mamaidba-nanadimalad-e-aid. 
Bab-Jehová, ¡Be-Igar-Mamaidgi be an-odurdake! We-napneg-naidgi bela be-sabgued-nikadi oyolenaid. 
Bab-Jehová, bee be, Be-Ibmar-Sogsadbali, be nued an-nidii gusad. 
An Be-Igar-Islidik-Mamaidgi an bensulid. Agala, gatik-ibmar-wisgued be an-imake, ibmar-mag-itoged be an-imake. 
An sabsur-odurdakleged-iduale, an-itolegedba galagwensuli an gudii daed. Emigindi, Be-Gayaburba-Sogedba an nanadiid. 
Bab-Dummad, bedi dule-nuedid. Be, ibmar-nuegan-imakedid. ¡Be-Igar-Mamaidgi be an-odurdake! 
Dule-san-dummarba-imakmaladi angi isdar-sunmakmalad. Degi-inigwele, andi gwagegi bela-belad Be-Igar-Islidik-Mamaid-sogedba an nanaed. 
We-dulemar, gwage-dutusurmaladid. Andina, Be-Igar-Maidgi wergudiid. 
Bur-nueddo, an sabsur-odurdaklesgu. Abali, an Be-Igar-Mamaid durdaknonikid. 
Be-Igar-Maidi, olo-mili-milibalidba bur bule ibnuedid. Be-Igar-Maidi, mani-mili-milibalidba bur bule anga ibidar-nuedga gued. 
Bee be, we-napnegse an-barmialid, bee be, anga burba uksad. Be-Igar-Mamaid-durdakegala, nono-nued be anga udage. 
Dulemar-be-nug-ogannodimalad an-dakalile, weligwar-itodmaloed, ar an, Be-Gayaburbagi, bensuli gudiid. 
Bab-Jehová, an wisid, Be-Igar-Mamaidi innikigwadbiid. Degisoggu, nabiridba sabsur-be-an-odurdaksado. 
Be-sabguedi, an-gwage-baisur-itoge imaked. Ar Be-Anga-Sogsagusadba be imaksad. 
Be-wile-dule-dakedi, anse be oyodage. Dula-gudii be an-imakdage. Ar Be-Igala, weligwar an-imakedid. 
Dule-san-dummarba-imakmalad, obingegsalesun, ar binsarsunna an-ogakansadimalad. Andi Be-Igar-Islidik-Mamaidgi bur binsaoed. 
Dulemar-be-nug-ogannodimalad, gannar anbo-atogega be imaksun. Dulemar-Be-Igar-Mamaid-wismalad, gannar anbo-atogega be imaksun. 
An-gwage Be-Igar-Mamaidba innikii nanasun, adi, an melle bingeguegar. 
Bab-Jehováʼye, bela-belad be-an-bendaked an abdakdiid, Be-Ibmar-Sogsadgi an bensulid. 
Be Anga-Ibmar-Sogsad-abdakdiidbali, an-dala galakuded. An weyob soged: “¿Sana wede gwage-baisur-itogega be an-imaknonikoe?” 
Bato an seredgus-inigwele, wagar-bapigwargus-inigwele, amba Be-Igar-Mamaid gwen an iedisulid. 
¿Bule napi an dula gudii guoe? ¿Sana be, dule-an-balegindimalad-sabsur-odurdakoe? 
Dule-san-dummarba-imakdimaladi, an-yardakega igar amismalad. Be-Igar-Sogedba-nanadisurmaladi, an-yardakega igar amismalad. 
Bela Be-Igar-Mamaidi innikigwadbiid. ¡Bab-Dummadye, be an-bendake! Binsarsunna an-balegindimalad. 
Napneggi an-oburgwednaga gusmalad. Degi-inigwele, andi Be-Igar-Mamaidgi gwen bangussulid. 
Be-sabed-dummarba-nikadbali, be anga burba-ogannosun. Be-Igar-Mamaid-sogedba an nanaoed. 
Bab-Jehová, Be-Gayaburbadi degisadeguad, nibneggi, Be-Gayaburbadi gwen gwagmaisulid. 
Be-innikidaedi, degisadeguad. Napneg be nasiksad, innikigwadba nagusad. 
Be-Igar-Uksadbali, emi-iba-akale, we-ibmarmar amba bukwad. Bela we-ibmarmala be-sogedba ibmar-imakbukwad. 
Be-Igar-Maid, weligwar an-imaksasulina, bukib-binsaedba an bato bergusbinnenad. 
Bipisaale, Be-Igar-Mamaid an gwen iegosulid, ar we-igarbali, be an-san-burba dula imaksad. 
Bab-Jehováʼye, be an-bendake, andi, begadga-gued. Andi, Be-Igar-Islidik-Mamaid ulubse baramidiid. 
Dule-isganamar an-obelobigudimalad. Andi, Be-Igar-Mamaid-magar-itogega alamakdiid. 
Bela ibmarmar e-bergued-nika an dakdiid. Unnila, Be-Igar-Islidik-Mamaidbi gege bergued. 
¡Be-Igar-Maidbina an nue soged! Bane-bane an egi binsadaed. 
Be-Igar-Mamaidi, an-isdarmaladbali bur bule binsaed-nika an-imaked. Ar Be-Igar angadga an imaksad. 
Bela an-odurdakmaladba bur bule an ibmar magar-itoged. Ar an Be-Igar-Mamaidgi binsadigu daed. 
Girmarba bur bule an ibmar magar-itoged. Ar an Be-Igar-Mamaid-sogedba nanadiid. 
Be-Gayaburba-Sogedba-nanaegala, bela igar-isganagi an bangusad. 
Be-Igar-Mamaidgi an bangussulid, ar bee be an-odurdaksad. 
Ibibayobi Be-Gayaburba anga ochii gue. Achanis-maedba bur bule anga ochii gued. 
Be-Igar-Mamaidbali, an binsaed-nuegan amidiid. A-ulale, bela gakan-igarmar an isdar daked. 
Be-Gayaburba gwallu-meegwadyobi an-iduedga gued. Neg-ibegwalebayobi anga igar oyoged. 
An bega ibmar-ise-sogar-sogsadi, an imakedsegad. Be-Igar-Mamaid-sogedba an nanadii guoed. 
Bab-Jehová, an bela-bela bato nue dummad-wilediid. ¡Be-Gayaburba-sogedba be an-ogannoge! 
Bab-Jehová, an bega ibmar-sogedi be abingasana gadin. Be-Igar-Mamaidgi be an-odurdake. 
Bonigan-abargi an-sandi gudiid, degi-inigwele, Be-Igar-Maiddi an iedisulid. 
Dule-isganamar an-yardakbimalad, degi-inigwele, Be-Igar-Mamaidgi andi bangudisulid. 
Be-Igar-Mamaidi, degisadegu angadga-guega an susad, ar an-gwage-weligwar imakdaed. 
Degisadegu, an-burgwedsega gwage-ulubgi Be-Igar-Mamaid-sogedba nanadioye an sogsad. 
Dule-wagar-darbo-damaladi, an isdar daked. Be-Igar-Islidikiddi, an nue-sabed. 
Bab-Dummad, bedi an-odukuega gued, bedi an-sigu-abgaedibayobi anga gued, Be-Ibmar-Sogsadi, an edarbediid. 
“¡Dule-isganamar, be angi bangue! An-Bab-Dummad-Igar-Mamaidba an nanabied.” 
Be-Gayaburba-Maidbali, be an-ogannoge, agi an dula gudiguoed. An-ibmar-edarbediidgine, melle bingeguega be an-imake. 
Be an-bendake, adi, an bendaklegoed. Be-Igar-Mamaidgi, an weligwar itodiguoed. 
Dulemar-Be-Igar-Mamaidgi-nodimaladi, be isdar dakdaed. Ar gakansaedginbi binsadidamalad. 
Napneggi dule-isganamar-bukwadi, ibmar-isgana-milediidyob be daked. A-ulale, an Be-Igar-Mamaidbina nue-soged. 
An be-dobedbali, be-asabin an wawanmakgwichid, Be-Igar-Nabolemalad-dobee an itoged. 
Igar-inniki-imaklemalad an imakdiid. Melle dule-mesagwar-an-imakdimaladga be an-urmako. 
An-be-mai-guedga, igar-nueganbi-guega be imako. Melle dule-san-dummarba-imakmaladi mesagwar-an-imakega be imako. 
Be an-abonogega, an be-abdakdiidba an-dala mommoleded. Be-Igar-Sogsad anga-guedi, an edarbediid. 
Sabed-dummarba be nikadbali, be-mai be sabguo. Be-Igar-Mamaid be an-odurdake. 
Andi be-mai gued. An Be-Igar-Mamaid-durdakega, Be-Igar-Mamaid mag-itoge be an-imake. 
Bab-Jehová, ar Be-Igar-Mamaidba nanasurmarsoggu, be-ibmar-imakbied be imaksunna. 
Bela ibmarmar-baiganba bur bule Be-Igar-Mamaid bur an sabed. Be-Igar-Mamaidbina olobali bur bule an bina soged. Olo-sunnadbali bur bule an bina itoged. 
A-ulale, Be-Igar-Mamaidbali an nanaed. Bela Be-Igar ibmar-baiganbali nueganbi an daked. Bela gakan-igarmardi an isdar daked. 
Be-Igar-Mamaidi doggus-ibnuedid. A-ulale, an e-sogedba nanadiid. 
Be-Gayaburbagi sunmakledele, magar ibmar-itogega anmar-imaked. Dule-ibmar-wissulid magar-ibmar-itogega imakbalid. 
An bela-bela Be-Igar-Mamaid-durdakbiedbali, Be-Gayaburbabina an nue soged. 
Bab-Dummad, wile-be-an-dake. Igi be gusgu dule-be-nug-odummodimaladi wile be dakdae, deyobi, be an-dakmoga. 
Be-Igar-Sogsadba-nanaega be an-imake. Melle igar-isgana angi obinega be imake. 
Dule-ibmar-sabsur-imakedgi be an-ollor-imake, ar an Be-Igar-Mamaidba an nanabied. 
Be-ise-nued-binsaedi be-maiga be oyoge. ¡Be-Igar-Mamaidgi be an-odurdake! 
Be-Igar-Mamaidba bar nanasurgusmalad-ulale, an-ibyanis suurmakemaid. 
Bab-Jehová, bedi dule-innikigwadid, innikigwadba bedi igarmar nabogedid. 
Be-Igar-Mamaid-be-uksadi, bela innikigwadbiid. Be-Igar-Mamaidgi bengulesulid. 
An-isdarmalad Be-Gayaburba-Maid-iedmaladbali, an bela-bela nue sae-itoged. 
Be-Gayaburba isedar-swilidikidid, a-ulale, an Be-Gayaburba nue-sabed. 
Andi san-bipi-imakdiidbali, ibgwensur daklediid, degi-inigwele, Be-Igar-Mamaidi, an iedisulid. 
Be Igar-Inniki-Imakedi, degisadegu innikigwadbiid. Be-Igar-Mamaidi, napiragwadid. 
Surbinsa an itononikile, Be-Igar-Mamaiddi weligwar an-imaked. Suli-suli an itononikile, Be-Igar-Mamaiddi weligwar an-imaked. 
Be-Igar-Mamaiddi, gusgu innikigwadbiid. A-igarba nabir gudiguega, a-igar-magar-itoge be an-imake. 
Bab-Jehová, bela-bela gwagegine an bese goled. Be an-abinsae. Be-Igar-Mamaid-sogedba an nanabied. 
An-bendakye an bese goled. Ar Be-Igar-Mesisad-sogedba an nanabied. 
Bese bendakleged egisegala, wakudaryalaba an gwisguardaed. An Be-Gayaburbagi bensulid. 
Be-Igar-Mamaidgi-binsaedba, mutikidbali, an gabdasulid. 
Be dule-wile-nue-dakdasoggu, be an-itoge. Bab-Jehová, Be-Igar-Innikigwadba be an-ogannoge. 
Dule-isganamar-an-balegindimaladi, an-walikgudanikid. Amar, Be-Igar-Mamaidgi bangus gudimalad. 
Bab-Jehová, be an-walikaa gudiid. Be-Igar-Mamaidi, belagwable napiragwadbiid. 
Dikasurgus, an Be-Igar-Mamaid wisi gudiid, ar gusgu be a-Igar omesisad. 
An-wile-itodiidi be dake, bonigangi be an-ollor-imake, ar an Be-Igar-Mamaidi gwen an iedisulid. 
Be an-irwa gwisgue, be an-bendake. Be-Gayaburba-sogsadba be an-ogannoge. 
Dule-isganamargi, burbar-bendakleged-igar dikasur naid, ar Be-Igar-Mamaidi gwen-amisurmalad. 
Bab-Jehová, be-dule-wiledakedi dummarbaa gued. Be Igar-Nabomaidba, burba-dulad be anga uke. 
Dule-an-balegindimalad bukidarad, an-isdardakmalad bukidarad, degi-inigwele, Be-Igar-Mamaidgi an bangudisulid. 
An dule-yardakdimalad-dakalile, an sae-dakdaed, ar Be-Gayaburba-sogedba gwen nanadisurmalad. 
¡Bab-Jehová, be dake! Ibiyobi Be-Igar-Mamaid an sabe. Be sabgued-dummarba-nikadbali, burba-dulad wis be anga uke. 
Bela Be-Gayaburba-Mamaidi napiragwadid, Be-Igar-Maidi bela innikigwadba degisadegu maid. 
Ar binsarsunna dule-gandikmaladi an-balegindiid, an-gwage-ulubgine an Be-Gayaburba-dobekwaa nanadiid. 
Be-Gayaburbagi an weligwar-itoged, dule-ibmar-nuegan-gargerbamalad-amisadyobi, an egi wergued. 
Gakan-igar an sae-daked, an nue-isdarsunna-dakdaed. Degi-inigwele, Be-Igar-Maiddi an nue-sabed. 
Be-Igarmar nue-napiragwad-guedbali, an bali-bali be-nug odummoged. 
Dule-Be-Igar-Mamaid-sabgudimaladi, gwagegi bogidik itodimalad. Wemar igar-isganaba gege selemalad. 
Bab-Jehováʼye, wis be an-bendakena gadin. Ar Be-Igar-Mamaidbali an ibmar imakdiid. 
Bela-belad an Be-Igar-Mamaid-sogedba nanadiid, ar an Be-Igar nue-sabed. 
Bela Be-Igarmar-Mamaidba an nanadiid, ar bela be an-ibmar-saedi wisid. 
Bab-Jehováʼye, gandikidba an bese-goledi, bese warmaksun. Be-Gayaburba-Maidba magar-ibmar-itogega be an-imake. 
An bese ise-wilesakwaa-goledi bese warmaksun. Be-Ibmar-Sogsadba be an-bendake. 
Be-Igarmar-Mamaidgi be an-odurdaksad. A-ulale, an-gwabinduku be-nug ogannoged. 
Ar bela Be-Igar-Mamaid innikigwadbisoggu, Be-Ibmar-Sogsadgi an namaked. 
Bab-Jehováʼye, Be-Igar-Mamaidi angadga an imaksasoggu, gwae be an-bendakdage. 
Bab-Jehováʼye, wis be an-bendaked an be-abeged. Be-Igar-Maidi weligwar an-imakedid. 
Be-nug-odummogega, dula-gudii be an-imake, Be-Igar-Nabolemaladi, an-bendakega gusun. 
Sibad-wawaad-yoggus-gudibayobi, an gudiid. An-be-maiga-gudiid be amidage, ar Be-Igar-Mamaidi an gwen iedisulid.