Proverbios.
17.
Urwed-abargi san-nued-gunsiidba bur-nuedid, weligwaledgi madu-dutusulid-gunsiir. 
Mai-binsaed-ibedi, machi-galagwensurdaed-e-dummadga gudiguoed. Mai-binsaed-ibedi, machi-galagwensurdaed-e-gwenadganba e-babgan-ega-ibmar-obesad nikumogoed. 
Olo, soogi wilubdakleged, bormo-crisolʼgi mani wilubdaklebalid. Dule-e-binsaeddina, Bab-Jehováʼse wilubdaklemogad. 
Dule-isgana, dulemar-gaya-isgana-sunmakedba ibsaed. Dule-gakansaegwa, dule-gaya-isgana-sogedba gudiid. 
Dule dule-wilegedgi-dododiidi, Bab-Dummadgi dodoged. Dule, dule-wileged-naibi-itodiidga-allediidi, odurdaklegedsegad. 
Dad-e-werguedi, e-wagan-nikadgi siid. Mimmigan-e-werguedi, e-babgangi simogad. 
Dule-binsaedsulidaedi, gaya-nuegan-sunmakedi egi nosulid. Dule-dummagan-negsemamaid, gakansaar-sunmakedi, egi nosurmogad. 
Dule manigi-emar-binsaed-gaed-gudiidi, na binsadaed, ede, ina-nika-gudiiye. Ar deyobi, yogasaar ibmar-amididaed. 
Dule, dule-egi-isgusad-egi-isgussuliyob-dakedi, ai-nikued-igar ogannoged. Ar dule, dule-egi-isgusadga ibmar gannar-gannar-obarele, aimar-isdaradga imaked. 
Dule-itoakwaa-binsaedga sabsur-ibmar-soglegele, irgwen-itogaled. Dule-binsaedsulidaeddina, molidubgi ila-dulataledse (100) bibyolenaidibe, amba itosulid. 
Dule-uayasatedaedi, gusgu urwed-amididaed. Ibagwengine, dule-eba-bur-egi-obined abingunonikoed. 
Dule-binsaedsulidaed e-ibmar-imakedgi-alamakdiid-abinguedba bur-baisulid, wiob-urwediid-abingued. 
Dule, ibmar-nued-ega-imaklesad-ular, ibmar-ichakwa-ukdibe, e-neguyagine, bipisaale bonigan berguosulid. 
Dule, urwed-onoye-sogele, diwar-dummad-noedyobi, dummad-neg-gagaed. Degisoggu, bur-nuedid urwedgi yog-banguar-imaked. 
Bab-Jehová ibmar-sogbo isdar daked: Dule, dule-ibmar-oakalosad, ibmar-oakalossulidyob daked. Dule, dule-ibmar-oakalossulid, ibmar-oakalosadyob daked. 
Dule-binsaedsulidaedga mani-uklenonikile, ¿igi imako na itoge? ¿Egi binsaed-nikagued amio na itoge? Suli. Ar edi, dule-ibmar-wissulidid. 
Dule, ai-guedgine, gusgu ai-sabguerbad. Degisoggu, boni-dummad-ibagan-nonikile, gwenad-gargwenadyob gued. 
Dule-itoakwaa-binsasulidi, yogasaar emarbogwa igar-mesed, dule-mani-gasad-anar mani-bennukega gubalid. 
Dule-isguedbina-itogerbadi, unnila urwedbina gudidaed. Dule-san-dummarba-imakedi, na dukin boni-amidaed. 
Dule-gwage-isgana, bipisaagwale ibmar-nued amiosulid. Dule-gadi-gakansaar-sunmakedi, ibmar-isgana egi aibinoed. 
Dule, machi-binsaedsulidaed-nikale, bukib-binsaed ega uked. Dule-binsaedsulidaed-e-babga-guedi, wergued egi amilesulid. 
Dule, gwage-weligwaled-nikale, ina-nuedga gued. Gwage-wile-itolegeddi, niga-obated. 
Dule-isgana dukuar dule-baidse manigi binsaed galeged. Agala, ibmar-galagwensuli-imakleged geg bergued. 
Dule-itoakwaa-binsaedi, binsaed-nued-nikuedginbi binsaed. Dule-binsaedsulidaeddina, aku neg-itoged, gabdakedginbi gudiid. 
Dule-binsaedsulidaedi, e-bab-ourwed gudiid. E-nanga, gwage-nunmaked-uked gudibalid. 
Dule-ibmar-oakalossulid sabsur-odurdaklegele, ibnuedsulid. Dule-ibmar-innikidamalad naibi-imaklegele, ibnuedsurbalid. 
Dule-magar-neg-itogedi, nabir na e-gwabinduku bargaed. Dule-itoakwaa-binsaedi, nabir na san-bargamogad. 
Dule-binsaedsulidaedi bogidik gudiile, binsaed-ibedyob daklemogad. Sunmaksurbalile, dule-itoakwaa-binsaedye, egi binsalebalid.