Proverbios.
19.
Dule-emargi-gakansaar-sunmakedba, bur nuedid, dule-wileged inniki-nanadii gued. 
Itoakwaa ibmar-imaksulidi, nuedsulid. Dule gwae-gwae-ibmar-imakedi, gadi noar-ibmar-imakdaed. 
Dule-binsaedsulidaedi, e-binsaedsulidba yogasaar nanaddaed. Geb sogdedaed: “An-akargusadi, Bab-Jehováʼginye.” 
Dule, ibmar-nuegan-nikadba bukidar aimar-nikuega gued. Ar dule-wilegeddi, na e-aise-bakale, egi bangued. 
Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansili na gwen san-onogosulid. 
Dulemar-bukidar, dule-obinebak-ibmar-uked-e-aiga-guega amimalad. Bela dulemar, dule-ibmar-binsa-uked-e-aiga gumalad. 
Ar bela dule-wileged-e-gwenadgan, dule-wileged-isdar-dakele, e-aimar-bursunna, bur bule isdar dakoed. Dule-wilegedi, na e-bendakega e-aimar-amidiguo-inigwele, bipisaar amiosulid. 
Dule ibmar-magar-itoged-amiedi, na e-san sabed. Na ibmar-durdaksad imakele, ibmar-nued amioed. 
Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansaar-sunmakedi, na burgwed-amioed. 
Dule-binsaedsulidaedi, ibmar-mani-gargerbad-nikuedi, egi nosulid. Dule-maiga-gudiid-bursunna, bur bule dule-dummagan-e-dummadga-guedi egi nosulid. 
Dule-binsaed-nikadaedi, na urwed wisi bargaed. Dule-egi-nosad-egi-nossuliyob-dakeddi, e-nug dummarbaa imaked. 
Rey-urwedi, achumigur-nono-wawaad-uurmakedyob gued. Ar rey-e-nued-binsaeddi, gagangi boo-bateyobi neg-imaked. 
Machi-binsaedsulidaedi, na e-bab-wile-itogega imaked. Ome-e-ulus-ulusdaedi, dii-yakedyob gued, binna-binna sui-wioged. 
Nega, degi, ibmar-nuegan, babgan uked. Ome-binsaed-nikadaeddi, Bab-Jehová uked. 
Wieguedi, dulega gabed-uked. Dule-wiegala ukudmaada gudii guoed. 
Dule-Bab-Dummad-Igar-Maidba-ibsaedi, dukin san-bendaked. Dule-Bab-Jehová-Igar-Mesisad-isdar-dakeddi, burgoed. 
Dule-wilegedga-ibmar-ukedi, Bab-Jehováʼga-ibmar-uknaiyob gued. Bab-Jehová dule-ibmar-uksadga gannar ibmar uked. 
Be-machi nued-nanaegala, bipigwadgi be unao. Be sabsur-odurdakalile, melle oburgwedse be imako. 
Dule-gadi-urwedi, sabsur-odurdaklegoed. E-urwed-bargaega egi binsa alamakleged, aka bur bule uluddaed. 
Bega-binsaed-uklegedi, be itoge. Be-unaedi mer be isdar-itoge, ar dule-binsaed-ibedga be guoed. 
Dule ibmar-imakega bukidar igar-amied, degi-inigwele, Bab-Jehová-ibmar-imakbiedbi imakleged. 
Dule emar-innikii-eba-daed abeged. Dule-gakansiliba, bur nuedid, dule-wilegedga-gued. 
Bab-Jehová-dobekwaa-nanaedi, dula-gudii dule-imaked. Bogidik-gudii dule-imaked, mer-bonigan-nikuega dule-imaked. 
Dule-wiegala mas-gunnega bateyagi e-argan ododaenad, degi-inigwele, wiedba e-gayaba mas odosulid. 
Dule-binsaedsulidaedi, unnila sabsur-odurdakedgi ibmar-durdaked. Dule-binsaed-nikagueddi, na ibmar-durdakega irgwen-ounaed abeged. 
Dule e-bab-ibe-ibmar-atursaedi, neggi e-nan-ononnobalidi, a-dule, machi-isganad, dule-binged-satedid. 
Machi, dule-be-unaed be itosulile, binsaed-nikaguedgi be bangudoed. 
Dule-ibmar-daksad-gakansaar-soged igar-nabolenaidgi dodoged. Dule-isgana ibmar-isganaginbi sunmaked. 
Dule-emargi-dododimaladga sabsur-odurdakleged-igar guagwar maid. Dule-binsaedsulidaedga bibyoleged-igar guagwar maimogad.