Proverbios.
21.
Bab-Jehováʼgi, rey-e-binsaed diwar-iirmakmaiyob gued. Deyobi, rey, Bab-Dummad-ibmar-abegedba ibmar-imaked. 
Dule na war-wargwengi e-ibmar-imaked nueganbi-imakye binsaed. Ar Bab-Jehováʼdi, dule-ibiga-ibmar-imakbied, bato wisid. 
Bab-Dummad ibdurgan-ogumakar-ukedba, bur nued-daked, igar-inniki-imakleged, degi, innikigwadba-ibmar-imakleged. 
Emar-ibgwensur-dakedi, san-dummarba-imakedi, dule-isganamar-e-binsaedi, bela wemar isgumaladid. 
Nue-itoakwaa-igarmar-amilegedi, ibmar-nuedga gued. Gwae-gwae-igar-amilegeddi, ibmar-nuedga gusulid. 
Gakansaedgi ibmar-nuegan-ichesur-nikuedi, booyob berguddaed, dule-oburgwega gubalid. 
Dule-isganamar, dukin e-sabsur-ibmar-imakedse berguoed. Ar igar-inniki-imaklegedi, imakbisurmalad. 
Dule-isgana-e-daedi, innikisulid, boni-nikad. Dule-nued-daeddi, innikigwadid. 
Neg-dummadgi ome-gadi-urwedbo-gudisaedba, bur nuedid, neg-bipigwadgi-gudisaed. 
Dule-isgana unnila ibmar-isganaginbi binsaed. Ar bipisaale, wile dule-bamalad-daksulid. 
Dule-ibmar-nue-wissulid, dule-emargi-dododiid-sabsur-odurdaklegedgi ibmar durdaked. Dule-binsaed-nikagued ibmargi-odurdaklegele, dule-ibmar-nue-wissulidi ibmar durdaked. 
Dule-nued, dule-isgana-e-neg dakdedaed, igi dule-isgana e-ibmar-nikadi berguddae. 
Dule, dule-wileged-e-ibmar-egised itosulile, na ibmar-egichiarmogar, dulemar e-itogosurmarmogad. 
Ibmar-binsa-uklegedi dulemar-wagab-uksulidi, sae-itoged boo imaked. Ibmarbina-sogdiidgi a-ibmar bega-uklenonikile, sabsur-urwed boo imaked. 
Igar-innikigwad-imaklesale, dule-nued na yeer-itodaed. Dule-isganagardi, dobed nagunonidaed. 
Dule, itoakwaa nanadisulile, burgwarmai dakledagoed. 
Dule, galagwensuli-gudiguedginbi-binsaedi, dule-wilegedga guoed. Dule, mummudbi-gaamakdiidi, degi, ina-wawadginbi-mani-oediidi, bipisaale, mani-ibedga gwen guosulid. 
Dule-isgana, dule-nued-anar sabsur-odurdaklegoed. Dule-emargi-aibined dule-inniki-nanadiid-anar, sabsur-odurdaklegoed. 
Ome-gadi-urwed-nikuedba, ome-gadi-isdar-itoged-nikuedba, bur nuedid, ome-sate walagwen-gudisaed. 
Dule-binsaed-nikagued-e-neggi ibmar-nuegan obinebaka nikad, ina-wawadikmalad obinebaka nikabalid. Dule-binsaedsulidaeddi, bela ibmar-nikad binsa diiga imakdaed. 
Dule, igar-inniki-imakleged-amidiile, wile-dule-dakleged-amidibalile, san-dula-gudiguleged amied. Igar-inniki-imakleged amied. Nug-dummarba-guleged amibalid. 
Dule-binsaed-ibed dulemar-gandikmalad-ibe neggwebur sued. Dule-binsaed-ibed dule-gandikmalad-e-ibmargi-bensuli-gudiid-ibe e-ibmar obelobalid. 
Dule na itoakwaa-sunmaked, e-gwabinduku-bargabalid, bonigangi ollorgued. 
Dule-na-doggus-san-buled-imakedi, dule-na-san-dummarba-imakedi, dule-emar-mesagwar-imakedi, weyob egi sogleged, wilub-obicha sabsur-isdar-nanadiidye. 
Dule-wiegala bela ibmar nikubienad, degi-inigwele, budar arbaed. 
Dule-wiegala, dule-baid-ibe ibmar-abedii osedoddaed. Dule-nueddi, wilub-obicha ibmar uked. 
Bab-Dummad, dule-isganamar-ega-ibmar-ukedi, isdar-daked. Bur bule isdar daked, nabiridgi ega uksurmalar. 
Dule-ibmar-daksad-gakansaar-soged burgoed. Dule, a-duleba-ibsaeddi, deyob guedsemogad. 
Dule-isgana na ibmar-sogsadi gege ogwadaed. Dule-nueddi, na e-daed nudaked. 
Nue-binsaed-nikaguedi, nue-ibmar-wisiguedi, degi, binsaed-nuegana, gwen Bab-Jehováʼgi obinsulid. 
Dule bila-onogega moli guakwaa nasiked. Degi-inigwele, bila-onogedgi-nakwegala, Bab-Jehováʼgi siid.