Proverbios.
27.
Melle be san-dummarba-imakedgi binsao, ar be wissulid, ibagan begi igi-daniki. 
Melle be dukin san-dummarba-imako, dule-baigan be-nug-odummogedi, bur nabirid. 
Akwa ukusulid, ukubbela ukusurbalid, dule-binsaedsulid-e-urweddi, aba bur bule yeer-gangued. 
Urwedi, yeer-gangued. Sae-itogedgi-urwedi, dule-wioged. Nobeddi, geg bargaleged. 
Arbakee-sabgulegedba, bur nuedid, bakar-bega-ibmar-soged. 
Be-isdarad-yamo-be-wagar-uedba, bur nuedid, be-ai-nued sabsur-bega-ibmar-soged. 
Dule, nue-immeles-gudiile, bar ibmar abedasulid. Achanisse-bakar, budar madaed. Dule, ukudmaada-gudiirdi, ibmar-gagbiregedse-bakar gunned, ochigwayobi itodaed. 
Dule, dikasuli aineba gaamakdiidi, dikasuli nuu e-uugi gaamakdiyobid, neguyagi sate daed. 
Gwallu-wawadikmaladi, ina-wawadikmaladi, e-yapanned weligwar dule-saed, debayobi, ai-nued-binsaed-ukedi, dulega niga-ogannoged. 
Melle be-ai-obanedgi be binsao. Melle be-bab-e-ai-obanedgi be binsabalo. Melle be-boni-itodiidi, be-gwenad-negse be sedo. Bur be-gwenad-bebo-urwediidba, bur nabirid, dule-be-neg-dikarba-maidse be naed. 
Machi, dule-binsaed-nikaa be dae, weligwar be an-imake. Adi, an deebali, mesagwar-an-imakdimalad-gayamakoed. 
Dule-itoakwaa-binsaedi, boni-noed bato daksabindaed. Degisoggu, mer boni-noega imakdaed. Dule-binsaed-sateddi, boni-noalir akudakdaed. Degisoggu, egi nue wileddasunnad. 
Dule, dule-baid-ular mani-gasad-bennukoye-sogsale, mani-bennuksulile, e-ibe be mor weenao, dule-baid-mani-gasad-ular, be e-mor sioed. 
Dule bolegoedba binnasuli e-aise nuedgi-goler, e-ai-gabmaidga ukabsalegedyob gued. 
Ome-ursili, dii-wied-ibagi, dii-gargarmaknaiyobi gued. Urwedbi wisdaed. 
Dule, e-igar-gaye-sogele, geg gaed, burwayobid, burwadi geg galeged. Argangi ibmar-gwallu-geg-abingalegeyobid. 
Esgoro, esgoro-baidgi oswiswimakleged. Dule na ebo-idakmalale, igar-nuedse onomalad. 
Dule, sapi-nue-akwele, e-san gunnoed, dule, e-dummadga nue-nakulediile, e-nug odummolegoed. 
Igi diigi, magar wagar dakledae, deyobi, dule e-binsaedbali, na magar-daklesimogad. 
Igi-neg-uan ollorgusisuli, degi, burgwed-igar galemaisuli, debayobi, dule ibmarbin-gadisogedi, napi-ibmar abedaed. 
Bormo-crisolʼgi mani wilubdakleged, soogi or wilubdaklemogad, duledi, e-nug-odummolegedgi mag-daklemogad, igid-dule gue. 
Dule-binsaedsulid be nagele, amba uki be nagbalile, degi, ibmar-gwagyob be osarwele, amba e-binsaed-sateddi, e-ibe be osulogosurguoed. 
Be-sibad-wawaadmar nue be dakdii sao, be-molimar gatik nue be akwedii sao. 
Ar ibmar-nuegana, degisadeguadsulid. Manimala, degisadeguadsurbalid. 
Sapur emilesale, gagan-aradik ainidagoed. Sapurgi gagan-dutugana weledagoed. 
Sibad-wawaadmar bega mor-yoed ukoed. Sibaddi, bega nainu-bakega guoed. 
Sibad-e-nunis bukidar be nikuoed, adi, bedi, be-ome, be-mimmigana egi nabir itomaloed, degine, bela-bega-arbamaladi, yeer-itomarmogoed.