Proverbios.
29.
Dule, nuedgi-ega-ibmar-sogleged amba itossulile, wiledaklesuli, sabsur ukiagwale, sarsolegoed. 
Dule-innikidamalad nasgudele, neggwebur yeer itodaed. Dule-isganamar negsealile, neggwebur bukib binsaddaed. 
Dule, binsaed-nueganbina itogerbale, weligwar e-bab-saed. Dule, gambanuchu-samaladgi mani-miele, bela na mani-nikadi obeloged. 
Rey, igar-innikigwadba-negseedi, yar-nue-innikii sedaed. Ar rey, unnila neggweburgi mani-gaedginbi binsaerdi, neggwebur-wioddaed. 
Dule, e-aiga yamo-nueganbi-sunmakedi, e-ai-yardakega sunmakdaed. 
Dule-ibmar-isgana-imakedi, dukin e-isguedse yamoleged. Dule-innikiidaeddi, weligwaledba namakdaed. 
Dule-nueddaedi, dule-wilemalad-bendakdidaed. Dule-ibmar-isgana-imakeddi, dule-wilemaladgi binsadasulid. 
Aimargi-gadi-dodomaladi, neggwebur-oimaker saed. Dule-binsaed-ibegandi, bogidik neg-imaked. 
Dule-binsaed-ibedi, dule-binsaedsulidbo abin-abin-imakele, amba ebo-urwodibe, ebo alledibe, gwen igar nudakosurmalad. 
Dule-gindakmaladi, dule-nuegan-sae dakdamalad, dule-nuegan-oburgwebidamalad. 
Dule-binsaedsulidi uludele, bar galedasulid. Dule-binsaed-ibeddi, nabir san-bargaed wisid. 
Dummadga-negdakmaid gakansaedba-ebipiledele, bela ega dummaganga-arbamaladi ibmar-isgana-imakedga guoed. 
Dule-wilegedi, mesagwar-dule-imakedbogwa emarbimalad. Bab-Jehová ebobela magar-atake imaksad. 
Rey, igar-innikigwadba dule-wilemaladga igar nabogele, e-yar-seedi, degisadeguoed. 
Sarsolegedi, nuedgi-sabsur-ibmar-sogedi, binsaed-nikaa dule-imaked. Mimmi-uayasulidaeddi, e-nan-bingedar imaked. 
Ibmar-isgana-imakmalad bukidarale, isgued bukidardaed. Dule-nueddamaladdi, dule-isganamar-bergued dakoed. 
Be-mimmi be unaele, bonisuli-gudii be-imakoed, weligwaled bega ukoed. 
Bab-Dummad-gayaburba barsoglesulile, neggwebur yogasaar nanaddaed. Dule Igar-Maid-sogedba nanadiile, egi ise-nued binsaleged. 
Mai, uayasuli-gualile, gayaginbi-ega-ibmar-soged unnisurdaed. Nabir ibsaegala, wis bibyoleged abeledabalid. 
Dule nue-binsasulidgi-sunmakedi, nue be dake. Ar dule-binsaedsulid-sunmaked-bursunna, bur bule yogasaar sunmakdaed. 
Dule, na e-mai, bipigwad-akar unadii nanassulile, sorba, bukib-binsaed-dummad ega ukoed. 
Dule-urwegala, urwed onogerbadaed. Dule-yaisur-urwedi, yeer-isguddaed. 
Dule-san-dummarbadaedi, nug-bipii guoed. Dule-san-bipi-imakeddi, nug-dummarbaa guoed. 
Dule, ibmar-atursaed-duleba-akaedi, dukin na san-wioged. Dule-ibmar-atursaed-galenonikile, amba dule-eba-akadidse ise-egisar-gunanaidibe geg barsoged. 
Ar be dulemar-dobee-itogele, dukin be yamolegoed. Be Bab-Jehováʼgi-bensulile, bonigangi be ollorgudoed. 
Dule-bukidar, dummadga-negdakmaid ega-ibmar-imakegala amidamalad. Unnila Bab-Jehováʼbi dulemarga igar-nabomaid. 
Dule-innikimaladi, dule-ibmar-isgana-imakmalad isdar dakdaed. Dule-ibmar-isgana-imakmaladi, dule-innikimalad isdar dakdamogad.