Cantares.
8.
Be, an-sus-gargwenadina yeerbana, an-nangi be nuugusmogana yeerbana. Degina, igarba an be-abingunonikidgi an be-ibe wagar uoenad, dule gwen anga akar sogosulinad. 
Argangi-gasa an be-imakoenad, an-nan-negse an be-sedoenad, agine, sabgued-igargi be an-odurdakoenad. Vino-wawadikidgi be-ogobega an be-imakoenad, an-nur-granada-nisgi an be-ogobbaloenad. 
Bitigi, e-sakwa-sapiled an-nono-urba mesisana gadin. Bitigi, e-sakwa-nueddi angaagwar an-imakena gadin. 
Omegan-Jerusalénʼginmalad, an bemarga ise-wilegagwar soged: “Melle be an-ome-nue-sabesailad an-ibe odakmalo, Melle be ese gormalo, na atakbiedba atakdagoed.” 
¿We doa negsulidganba e-sui-gukingi birikwaa-mai-akas nakwedaniki? Sui-nue-sabgulediid namaked Manzana-sapi-urba, an be-odaksad. A-sapi-urbali, be-nan nunmakedgi be-odenoniki gusad. 
Be-gwagegine an-sedii be gue. Be-swidagine an-wilub narmakar be sedii imake. Ar sabgued-e-ganguedi burgwed-igaryobid, gege dule e-igar gaed. Suibina-soglegedi, sulibinsa emar-imaked. Sabgued-itolegedi, soo-dummad-gwabunyemaiyob itoleged. Bab-Dummad deyob imaksad. 
We-sabgued-sooyobidi, dii-dummadi gege oginned, diwarmarbela gege we-sabgued obelobalid. Dule-gwensak sabgued-bakega, bela e-ibmar-nikad ukdele, we-dulegi dodoledoed. 
Anmar-bun senigwad, amba yoo e-nuu mullugudaged. Dule anmarse nikuega egisdanikile, ¿igi anmar abin sogosunna? 
Ar galu-matusulidyob-guena, anmar e-birgi nega-dummad-manibiid soboenad. Ar yawagakga-guena anmar urwala-e-urgo egi nasikoenad. 
An galu-matusulidyob gued, ar an-mam, neg-suigan-warbo-gwichiyob gued. Agala, an-sui-nue-sabesailadga, an gwage-bogidikid uked. 
Salomón, Baal-Hamón-yargi nainu-gwensak nikanad, ega akwemalaga, dulemarga manigi-urmaksagusad. E-nainu-sanmaksale, we-dulemar ega war-wargwen mani-sibu-milibo (2,000) senonidamalad. 
Salomón, mani-milibogwad be sue, bemar-dule-nainu-akwemalad, mani-sibu-dulataled-ilabakegwad (400) be sumarmoga. Ar an-nainudina, unnila angadid. 
Be, dutugalu-abargi gudiid, anmar-aimar be-sunmaked itobigudimalad. Be-gaya-itogega be anmar-imake. 
An-sui-nue-sabesailad, gwae be dage. Goe-sapuryob be abarmakdage, yalamar-wawadikid-yapanned-abargi gwae be abarmakdage.