Jeremías.
9.
Ani Jeremías, an-neggweburginmalad-girgusadba, ibginedba, degi, mutikidba, an bodii guega, an-nono, dii-aryomaiyob guena yeerban. An-ibyanis, dii-aryogwisdaeyobi gusana yeerban. 
An nega-dulesulidganba, obunnoged-neg nikana yeerban. An-neggwebur-mete an naoenad. We-dulemargi an banguoenad. Ar bela we-dulemala, galagwensur-nanamaladid, ar bela we-dulemala, dule-yardakmaladid. 
Bab-Jehová soged: “Gakansamalaga guakwaa gudidamalad, warsi-guagwar-ganikidyob gudidamalad. We-yalagine, igar-napiragwad sated, gakansaed neg-gagas naid. Aka bur nue-ege neg-nadapid. Ani an Bab-Dummad-gued gwen an-daksurmalad. 
”Be-aimar-warwargwengi nue salakarmar, melle gwenadganse-bakar, egi be bensuli guo. Ar bela gwenadganmar dule-yardakedbiid. Bela aimar, na e-aimar-dikarba yogasaar sunmakdimalad. 
Na muchub-muchub yardakdimalad, dule-wargwensaale, napiragwadgi sunmaksurmalad. Na gakansaedgi nue-durdaksa gudimalad, gakansaedginbi binsadimalad.” 
Bab-Jehová soged: “Be, Jeremías, dulemar-yardakmalad-abargi be gudiid, amar emar-yardakmaladba magar an-dakbisurmalad.” 
A-ulale, ani Bab-Jehová-Bela-Gangued-Nikad weyob soged: “¿Ibu-ibmar-baid bar an-dulamarga an imakbalosunna? An we-dulemar urukergebed, an we-dulemar wilubdakergebed. 
Ar e-gwabin-duku sigu-dule-gindakedyobid, unnila gakansaar-sunmakedbi wismalad. E-aibo nuedgi sunmakdaed, ar e-ulubgindi yamogedgi binsadamalad.” 
Bab-Jehová soged: “Degite, a-ulale, ¿an sabsur-odurdakosurde? An sabsur-odurdakergebed. ¿We-dulemar an buged-mai imakosurde? An imakergebed. 
”Yalaganga boega an be-imakoed, yalaganga akiginnega an be-imakoed. Nega-dulesulidgan-e-gaganmarga oakudii an be-imakoed, ar bela neg-olloo nai guoed. Ar dulemar bar agi gudii guosulid, molimar-goledi bar itolegosurbalid. Bela nuumarse-bakale, ibmar-durganse-bakale, duurmakdemaloed. 
”Jerusalén-neggwebur napi akwabi ganna-ganna-bukwa an imakoed, achu-sapur-uaya-ganna-ganna-e-negga an imakoed. Judá-neggweburmar-e-sailaga-gubukwad neg-ollobi an sioed, dulemar-sate an imakoed.” 
Ani Jeremías weyob sogded: Ar we-ibmar magar-itogegala, ¿doa binsaed-ibed-gudii? ¿Ar doaga Bab-Dummad sunmaksa, adi, dule-baidga we-ibmar-sogmogagar? ¿Ar ibiga anmar-yar bergusnai? ¿Ibiga anmar-yar nega-dulesulid-naidyobi dule gwen nanasuli ollo-nai? 
Bab-Jehová soged: “Ar Israel-dulemar an-Igar-Maid an ega uksadgi aibatemalad. An-sogedba ibsassurmalad, a-Igarba nanassurmalad. 
Aka e-binsaed-isganaba nadmalad, bab-dummagan-Baalʼmarba nanasmalad. E-babgan-e-odurdaksadba nanasmalad.” 
Israel-e-Bab-Dummad-Jehová-Bela-Gangued-Nikad weyob sogbalid: “We-dulemar ibmar-gagbiremalad-gunnega an imakoed, degine, dii-ina-nusubiid-gobega an imakbaloed. 
Wemar, yar-baid-baid-nanaidgi-aisakiega an imakoed. Wemar, degi, e-babgan we-yarmar-gwen-dakdisurmaladse an oduurmakoed. Es-suidyalaba an baleginnoed, bela obelogedse an imakoed.” 
Bab-Jehová-Bela-Gangued-Nikad weyob soged: “Nue be itomar. Omegan-dule-burgwismaladga-bomaladse be gornamar. ‘Bur nue-yeer-bomalad dagmaloye,’ be sogo: 
Gwae-gwae dagmalo. Anmar-ular bodamala. Anmar-ibyanis bela-bela aryogoed, anmar-ibyanis ena-ena naoed. 
Sión-yala-akale, dule-boedi, degi, dule-akiginnedi, weyobi, itoleged: Anmar nue oitolesmar, nue-anmar-obingegsasmalad. Anmar we-yalagi nomalargebed, ar bela anmar-neguyamar obelosmalad. 
”Omegan, an-gayaburba nue be itomar. An-ibmar-soged nue be itomalo. Be-bunamala, bukid-binsaleged-namakedgi be odurdakmar. Be-aimar muiga-bolegedgi weyob be odurdakmar: 
‘Burgwedi, anmar-negse dognoniki, anmar-neg-yawagakba dogsad. Burwigana-magaba-gudidimalad obelolesad, sapingana-magaba-ambikulegedgi-bukmalad obelolesad.’ ” 
Bab-Jehová soged: “Muimar, napagi ibmar-isganayob omilede guoed. Igi dule-ibmar-gwag-wesale, napagi-babatismalad-omileddae, gwen bar dule wedasuli, deyobi, muimar napagi omilede guoed.” 
Bab-Jehová weyob soged: “Dule-binsaed-ibed, melle na e-binsaed-nue-nikadgi san-dummarba itogo. Dule-gandikid, melle na e-gangued-nikarbadgi san-dummarba itomogo. Dule-mani-ibed, melle na e-mani-nikarbadgi san-dummarba imakmogo.” 
Bab-Jehová soged: “Ar dule na nug-dummarba-imakbiele, magar-an-dakedgi na nug-dummarbaa imakdo. Ar dule na wergubiele, ani Bab-Dummad-Jehová-gued-magar-an-dakbalidgi, wergusundo. Ani an dulemar-sabgumaiye, degi, ani an igar-innikii-imakedye, be wisidba, be wergusundo. Ani an igar-maidba we-napneggi-ibmar-imakedgi be wergusundo. Ar weyob ibmar-imaklegedi, an yeer daked.” 
Bab-Jehová soged: “Bela dule-abgan-uka-duku-sikarmalad, anse-sabsur-odurdakleged-ibagan ega danikid. 
An we-dulemar sabsur-odurdakoed: Egipto-dulemar, Judá-dulemar, Edom-dulemar, Amón-dulemar, Moab-dulemar, degine, bela dulemar-nega-dulesulidganba-bukwamalad, dulemar-burgwarmaladse-golega na nono-swiri-imakmaladi, wemar an sabsur-odurdakoed. Ar bela dulemar-yar-baid-baidgi-bukwamalad, degi, Israel-dulemarse-bakale, e-gwage-ulubgine anba dasurmalad.”