Jeremías.
47.
Faraón, Gaza-neggweburgi-gwichigued-iduale, Bab-Jehová-gayaburba, e-gayaburba-barsoged-Jeremíasʼse nonikid, adi, Filistea-dulemargi ega sunmakegar. 
Bab-Jehová weyob soged: “¡Dad-nakwed-argan-sapiledsiki, diwar-nodanikid be dakmala! Bela yala-ododanikid, bela yalagi-ibmar-bukwad ododanikid, neggweburmar, degi, e-dulemar-bukwad ododanikid. ¡Dulemar bela oimakdemalad! ¡Napneggi-dulamar-bukwad bela ogormakdemalad! 
Babgan molimar-nag-gole itoarmargu, ur-napaginmalad-e-nagmar-bipirmaknaid-gole itoarmargu, degine, ur-napaginmalad-gole itoarmargu, babgan dobedbali niga-argwatemalad, na e-mimmigan iedmalad. 
Bela Filistea-dulemar-obeloged-iba nonikid, Tiro-sorda-bendakmalad-obeloged-iba, degi, Sidón-sorda-bendakmalad-obeloged-iba nonikid. Bab-Jehová, Filistea-dulemar obelogoed, Caftor-demar-gakaba-dulemar-bukmalad obelobaloed. 
Gaza-dulemar nono-swiri imakdemalad, Ascalón-dulemar geg-sunmake gudmalad. Bemar-nebagi-bukmaladi, ¿sanagwadse na be dukin san-daas-daas imaksuli gumaloe? 
”¡Duledar-wiles! Bab-Jehová-es-suid begi nosa. ¿Ar sanagwadse be bar anmar-oburgosurye soge? ¡Es-suid, be-ukayaba be doge! ¡Boo be mege, melle be anmar-gindake! 
”¿Ar sunna es-suidde boo megosi? Ar Bab-Jehová, Ascalón-dulemar-ogilogega, demar-gakaba-bukmalad-oburgwega ega igar uksad.”