Ezequiel.
21.
Bab-Jehová anga sogded: 
“Dule-machi, Jerusalénʼsik be atake, anse-goled-neggi-ibmar-guoedgi be sunmake, Israel-yargi-ibmar-guoed iduakwaa be soge. 
Bab-Jehová weyob-sogye, ega be soge: ‘An begi yoleged. Begi dule-nuegan-bukwadi, dule-isganamar-bukwadi an-es-suidgi an oburgoed. 
Begi dule-nuegan-bukwadi, dule-isganamar-bukwadi an oberguoed. A-ulale, dad-nakwed-sapiled-akale, dad-nakwed-argan-nuedsikidse, an-es-suid bela dulemar-ogilogoed. 
Deyobi, bela dulemar wisgumaloed, ani an Bab-Jehová, an-es-suid e-uka-yaba-maid an onosa, e-uka-yaba bar an odogosuli.’ 
”Dule-machi, na be gwage-ulubgi-nunmakedgi bela dulemar-wagab ise-boar imake. 
Ar bese egichiarmalale: ‘¿Ar ibiga weyob be boe?’ Ega be sogoed: ‘Ar ibmar-guoed-gayaburba-ular, an boe. We-gayaburba bela dulemar-niga egwannoed, bela gargangued sate namaloed, bela dobedba wawanmakdemaloed.’ ¡Ibmar-guoedi bato modanikid! ¡Emisgwa guoed! Ani an Bab-Jehová-Bela-Gangued-Nikadi weyob soged.” 
Bab-Jehová anga sogdebalid: 
“Dule-machi, ibmar-guoed iduakwaa be soge: ‘Bab-Jehová-Bela-Gangued-Nikadi weyob sogye, be soge: ” ’Es-suid-nugar bato nue-imakar maid, Es-suid-nugar bato datarmakale maid. 
Dulemar-ogilogega nugar imaklesad, dakarmakega odatarmaklesad. ” ’An-machi-e-gaapoledi, suar-binsaledyob daksamaladgi ¿anmarde, weligwar-itogoe? 
” ’Ebugega es-suid odatarmaklesad. Es-suid nugar imaklesad, datarmakale imaklesad, dule-gindakedga-ukega deyob imaklesad. 
” ’Dule-machi, be gole, be nunmak-itogedba boe, ar we-es-suid an-dulamar-oburgoed, ar we-es-suid bela Israel-dummagan ogilogoed. Bela Israel-dummagan, an-dulamarba burgwemarmogoed. ¡A-ulale, bukib-itogedba be binasgar-bibyoge! 
” ’Bab-Jehová-Bela-Gangued-Nikadi weyob soged: Ar we-ibmarde wilubdakleged-igalad. Ar es-suid amba rey-gaapoledse-bakar, gwen dobsulid. Reydi, berguoed.’ 
”Dule-machi, ibmar-guoed iduakwaa be soge, argan be god-god sae, es-suidga be soge: ‘¡Dulemar-naibi-saye, be gannar naibisabarye!’ We-es-suid dule-oburgwedid, bela dulemar bela ese earwilegoed. 
Bela ese-niga argwatemaloed, degi, bukidar ese burgwemaloed. Es-suid-dule-gindakedi, neggwebur-yawagakmargi bato an nasiksad. We-es-suid dakar-gaega odatarmaklesad, dule-ogilogega nugar onikulesad. 
Es-suid-dule-gindaked, argan-nuedsik, be bipinmake, argan-sapiledsik be bipinmake, bela dulemar be naibisae. Es-suid-dule-gindaked, bitisiki be bipinmakbie, asiki be bipinmake. 
”Argan an god-god imakmogoed, an-urwemaid bogilegoed. Ani an Bab-Jehová-guedi, soged.” 
Bab-Jehová anga sogsabalid: 
“Dule-machi, igar warbo be sobe, adi, we-igarmarba Babilonia-e-rey es-suidyalaba dagegar. We-igar-warbogwad yar-soggwengi onodagoed. We-igarmar-doglemaidgi, nug be nasike, adi, magar daklegega, bitid-neggweburse igarmar warmakmai. 
Igar-soggwengi nug-nasiklegoedi oyogoed, Amón-dulemar-neggwebur-Rabáʼse warmakmaiye. Igar-baidgi nug-nasiklegoedi oyomogoed, Judá-neggwebur-sakdigar-siid-Jerusalénʼse warmakmaiye. Wemar-igarbali, we-dulemarse Babilonia-e-rey es-suidyalaba naoed. 
”Babilonia-e-rey igar-warbogwad-abingunaidgi gwisgunonikoed. Geb sogdagoed biti-igarba ede naoye. Degidbali, ibmar-wisguega sigumar bigni-bigni imaknai guoed, e-nuchu-burwiganse idaknai guoed, degi, ibmar-durgan-e-binagi ibmar-wisgunai guoed. Adi, wisguega, ede, bitid-neggweburgi gwichiguoe. 
E-argan-nuedsik, Jerusalén-neggwebursik ega neg-oyolegoed, ase bila-ononaoed. Rey weyob igar ukdoed: ‘Neggwebur-yawagakmar-omukuega suar-dummagan-bular-ebipilemaladi guagwar urboye, arsanyob napa onakwemaloye, degi, neg-matusurmalad-walaled sobmarbaloye. Bila-onogega binnasur gormakmarye, dulemar-ogilomarye.’ 
”Ar Jerusalén-dulemar Babilonia-e-reybo bato igar-mesissoggu, ega be ibmar-guoed-iduakwaa-sogedi itogosurmalad, gakanye bimaloed. Degi-inigwele, Babilonia-e-rey deyob imakoedi, Israel-dulemar na e-isgusad-ebinsaega imakoed. A-ulale, Israel-dulemar yogasaar galemaloed. 
”A-ulale, Bab-Jehová-Bela-Gangued-Nikadi weyob soged: ‘Be-isgued-ebinsaega imaklesad, be-uayasulidaed wisgulesad, be-ibmar-isgana-imaked daklesad. A-ulale, bemar yogasaar galemaloed.’ 
”Israel-e-rey, bedi dule-gindakedid, dule-isganad, be-iba omosad, be-sabsur-odurdakleged-wachi omosad. 
Bab-Jehová-Bela-Gangued-Nikadi weyob soged: ‘Mor-gurgin-nonogi-bipirmakaled be unge, ologurgin be unge, ar bela ibmar gwagoed. Na dule-san-bipi-imakdiid odummolegoed, na dule-san-dummarba-imakdiid nug-mesagwar guoed. 
An bela negmar bibisgoed, akwamarbi-ganna-ganna-bukwa an imakoed. Weyopira, Babilonia-e-rey neg-imaknonikoed. A-dulega an igar ukoed, adi, deyopira neg-saegar.’ ” 
“Dule-machi, ibmar-guoed iduakwaa be soge: ‘Amón-dulemar Israel-dulemargi-dododimaladga, Bab-Jehová-Bela-Gangued-Nikadi weyob soged: Dulemar-ogilogega es-suid e-ukagi guagwar onolesmaid. Dulemar-oburgwega, odatarmaklesad. 
Es-suid, we-dulemar-isgana-e-dukar egwannoed, ar e-negburgan-daked gakanad, degi, e-ibmar-guoed-soged gakanbalid. Ar e-iba omosad, e-sabsur-odurdakleged-wachi bato omosad. 
” ’Es-suid, be-ukayaba be gannar megnae. Na be ibi-yargi daniki, na be bia-soblesa, agi, an bega igar itogoed. 
An-urwed be itogoed, an-sae-itoged sooyobi an begi barmidoed. Dulemar-ablis-eomaladga, dulemar-gindakmaladga an be-urmakoed. 
Sooga be gaganyob guoed, be-ablis bela yar-ganai guoed. Napneggi bar be ebinsalegosulid. Ani an Bab-Jehová-guedi weyob soged.’ ”