Ezequiel.
32.
Deunni, anmar birgambe-gakabogus gaka nii-warambe-gakabogwad-ibagwengus Babiloniaʼgi-bukwadgine, Bab-Jehová weyob anga sokalid: 
“Dule-machi, Egipto-rey-Faraónʼga, we-wile-itoged-namaklegedgi be namake: ‘Dulemar-yar-baid-baidgi-bukwamalad-abargi, achumigur-nono-wawaadyob be dakleged. Demar-ibdula-gacharsulid diwargi-nakwamaksiiyob dakleged. Be-naggi, dii gudure be imaked, e-sukemar binnasur-nakwamaksii be saed.’ ” 
A-ulale, Bab-Jehová-Bela-Gangued-Nikadi, weyob soged: “Amba be dulemar-bukidar-abargi-gudi-inigwele, an-saki an begi mioed, agi an be-gaoed. 
Napagi illi-illir an be-ebipioed, neg-ollornaidgi an be-metoed. Bela nuumar-gukudimaladi, be-birgi-bukuega an imakoed. Bela-ibmar-durgan-ursirmar, be-sangi immelegega an saoed. 
Yalaganba, be-san an mioed, nebagangi, be-muimar-omilede, an imakoed. 
Be-ablisgi napneg waladiki an imakoed, yarmar-e-birise waladiki an imakoed. Diwarmar be-ablisbi-mai an imakoed. 
Be burgwenonikile, negsichidbi-nai nibneg an imakoed, niisgwamar akinnega an imakoed. Dad-ibeler-iduar mogirmar an nasikoed, bar bipisaale, nii gaosulid. 
Be-ulale, bela nibneggi niis-dummagan-gananaidi, ginnega an imakoed. Be-yargi negsichidbi-nai an saoed. Ani an Bab-Jehová-Bela-Gangued-Nikad weyob soged. 
”Be yarmar-dakdisulidse gayaburba-moega an imakoed, bergusye be-wisgudamaloed. Bergusye be-wisguarmalale, bukidar dulemar-yar-baid-baidgi-bukwamalad dobedba wawanmakega an imakoed. 
Deginbali, bergusye be-wisgumaloedbali, bukidar neggweburmargi dobed-dummad-naguega an imakbaloed. Amarga an-es-suid an oyodele, e-reymar gwayidmaloed. Be-berguoed-ibagi, reymar dobe-burgwedbali, wawanmakdemaloed. 
”Bab-Jehová-Bela-Gangued-Nikadi weyob soged: ‘Babilonia-e-rey, e-es-suidgi be-ogilogoed. 
Dulemar-yar-baid-baidgi-bukwamalad-e-sordamar bur-isganamar, es-suidgi be-dulemar-ogilogega an imakoed. Amar Egipto-dulemar na san-dummarba-imakdiid obelogoed, bela Egipto-dulemar galakuoed. 
Bela e-molimar-bebe-nikad diwarmar-dikarba-mas-gundimalad an obelogoed, we-diwarmar bar dulemarse, degi, ibmar-durganse gudure guosulid. 
Geb degine, diimar an diree mesoed, olivo-gwalluyob binnaa aryomai an imakoed.’ ”Bab-Jehová-Bela-Gangued-Nikadi, soged: 
‘Egipto-yar, nega-dulesulidganga an imaksale, an e-ibe bela ibmar-nikad obergusale, degi, e-dulemar an bela ogilosale, geb wisgumaloed, ani an Bab-Jehová gue.’ 
”Dulemar-yar-baid-baidgi-bukwamalad Egiptoʼga, degi, e-dulemarga we-wile-itoged-namaklegedgi namakmaloed. ”Ani an Bab-Jehová-Bela-Gangued-Nikad weyob soged.” 
Deunni, anmar birgambe-gakabogus gaka nii-warambe-gakabogwad-ibatargus, Babiloniaʼgi-bukwadgine, Bab-Jehová weyob anga sokalid: 
“Dule-machi, Egipto-dulemarga-wile-itoged-namaklegedgi be namake, dulemar-yar-baid-baidgi-bukwamalad-e-dulemar bur gandikidmaladba, napa-uluba-burgwar-mamaidse be odoge. 
Ese be egise: ‘¿Ar bemar bamalad-dulemarba bur yeerdaklege? Emigindi, Bab-Dummad-akudakmalad-abargi, be napa-uluba-dogsa megmala.’ 
Dulemar-es-suidgi-burgwismalad-abargi burgwemarmogoed. Es-suid bato argangi ganimalad, Egipto-yar, degi, bela e-dulemar bergumaloed. 
Dulemar-bila-onoged bur dutusurmaladi, bur gandikmaladi, napa-uluba-dulemar-burgwar-mamaidgi, Egipto-dulemargi, degi, eba-nanaimaladgi sunmakmaloed. Weyob sogmaloed: ‘¡Bato napa-uluba dogsamala! Dulemar-Bab-Dummad-akudakmalad-es-suidgi-burgwismalad-abargi mellemamai.’ 
”Agi Asiria-dorgan maid, e-neg-uan-ebiris bela e-sordaganbo maid. Bela wemar es-suidgi burgwismalad. 
Bela we-napneggi dulemar-ogwayedigusmaladi burgwar-mamaid, es-suidgi burgwismalad. Emigindi, napa-uluba digles mamaid, Asiria-e-neg-uan-dikarba mamaid. 
”Agi Elam maid, e-neg-uan-ebiris bela e-sordaganbo maid. Bela wemar es-suidgi burgwismalad. Bela we-napneggi dulemar-ogwayedii gusmalad, Bab-Dummad-akudakmaladyob napa-uluba odoles mamaid. Napa-uluba burgwismamaid-abargi, dule-nugsulidyob mamaid. 
Elamʼga, Bab-Dummad-akudakmalad-es-suidgi-burgwismalad-abargi gas nasiksamalad. Emidi, Elam-e-neg-uan-dikarba mamaid. We-burgwismalad we-napneggi dulemar-ogwayedii gusmalad. Ar emigindi, napa-uluba burgwismamaid-abargi dule-nugsulidyob mamaid. Agi dulemar-gindaklesmalad-abargi megismalad. 
”Agi Mesec, degi, Tubal maid, e-neg-uan-ebiris e-sordaganbo maid. Bela wemar Bab-Dummad-akudakmaladid, es-suidgi oburgwilesmaladid, ar ade, we-napneggi dulemar-ogwayedii gusmalad. 
Mesec, degi, Tubal, dulemar-Bab-Dummad-akudaked-e-dule-bulegan-abargi diglessurmalad. We-dule-bulegandi bila-onosadgi e-gingimar-ebusad-gani, degi, e-nono-urba es-suid-mai diglesmalad. We-dule-bulegan we-napneggi dulemar-ogwayedigusmarsoggu, amba burgwisad-sorba, e-isgusad-ulale, e-garmar sabsur-imaklesad. 
”Agi be, Egipto, dulemar-Bab-Dummad-akudakmalad-abargi be bergus megoed, dulemar-es-suidgi-burgwismaladba be diglegoed. 
”Agi Edom e-reymarmala, degi, e-dummaganmala maid. Ar amba bela-bela gangued-nika-inigwele, amar dulemar-es-suidgi-burgwismalad-abargi digar-mamaimogad. Dulemar-Bab-Dummad-akudakmalad-abargi, napa-uluba digles mamaid. 
”Agi dad-nakwed-argan-sapiledsikid-e-dummagan, degi, bela Sidónʼginmalad maid. Na e-gangued-nikadba dulemar-ogwayedigusmar-inigwele, wemar dulemar-es-suidgi-burgwismaladba dule-nugsulidyob napa-uluba dogsa maimarmogad. Wemar, dulemar-Bab-Dummad-akudakmaladid. Emigindi, dulemar-es-suidgi-burgwismalad-abargi, napa-uluba digles mamaimogad. 
”Ar Faraón wemar-dakalile, geb na e-sordamar-burgwismaladba wile-itodiid berguoed, ar ade, Faraón e-sordamarmala es-suidgi burgwismalad. Ani an Bab-Jehová-Bela-Gangued-Nikad weyob soged. 
”Ar we-napneggi, dulemar-ogwayega, an Faraón-imaksa-inigwele, Faraón e-sordamarmala dulemar-Bab-Dummad-akudakmalad-es-suidgi-burgwismalad-abargi, diglemarmogoed. Ani an Bab-Jehová-Bela-Gangued-Nikad weyob soged.”