Oseas.
2.
Bab-Jehová soged: “Agine be-gwenadganse, ‘Bab-Dummad-dulamarye’ be gormaloed. Be-bunmarsedi, ‘Wiledaklegarmaladye’ be gormarbaloed. 
”Be-nan abargi-odolegega be imakmar, egi be yolemar. Ar we-ome, bar an-omesulid, bar an e-suisurmogad. Melle gambasamalad-damaladyob bar san-imake, machergan-egi-wergued obeloge. 
Ar deyob imaksulile, igi-gwalulesad-ibagi aidenonigusadyobi an imakoed. Uka-swili an imakoed. Nega-dulesulidganga an imakoed. Napa-dinnaregedga an saoed, uku-uku-itogedba-burgwega an imakoed. 
An e-mimmigan wile dakosulid, ade, gambasaed-mimmiganad. 
E-nande, gambasaedid. Ar we-ome-mimmigan-baksadde bingedsulidaedid. Ar ade, we-ome weyob sogsad: ‘An-suiganmarba an nabie, amar anga masgunned ukdaed, amar anga gobed ukmarbalid, amar anga mor-wawaad, degi, lino-dubgi-mor-sobaled ukdamarbalid, amar anga olivo-gwallu, degine, gobed-nuegan ukdamarbalid.’ 
A-ulale, ani an Bab-Dummad, an e-iduar igar omuroed, e-iduar ikomar-mie-mie an saoed, adi, degidbali, bar igar amiosulid. 
Ar e-suiganbina surbinsa miamakdii guoed. Gwen amisulidbali weyob sogdoed: ‘Bur an-sui-sailaginedse an gannar naoe, iduardi bur an nued gudiinad.’ 
Ar we-ome ani an ega masgunned-ukedye binsassulid, ani an ega vino-binigan-ukedye binsassulid, degi, olivo-gwallumar-ukedye, gwen binsassulid. Ar ani an ega manimar, olomar an ega omelosad. Degite, ¿igi-wede we-ibmarmar imaksasunna? ¡Aka Baal-bab-dummadyob-imaklemalad egi sobsad! 
”A-ulale, ibagan-omosadgi, e-annik gannar an bela an-ibmar-gwagmar-ega-uksad, an-vino-nuegan-ega-uksad an suoed. Mor-wawaad an ega yoega-uksad, degi, lino-dubgi-mor-sobarmalad an ega-uksad, bela gannar an ei sunonikoed. 
E-suigan-asabinni obingegsaegala, uka-swana an ogwisguoed. We-ibmargi gwen wakinnosulid, ar guedsegad. 
E-wergudiid bela an ei obelogoed: E-ibamar-onoged, e-nii-binigangi ibamar-onoged, degi, e-obunnoged-ibamar, e-itoakwaa-ibamar-onogedgi ibamar-onoged, e-ibe bela an obelogoed. 
E-uva-nainumar an ei bela maada imakoed, higuera-sapimar an ei bela obelogoed. Ar ‘we-ibmar an-suigan anga uksaye’ gordiid. Sapurbi-moodo nai an imakoed, ibmar-durgan-sapurbarmalad bela e-ibmar-naid ei gunmalaga an imakoed. 
An we-ome sabsur-odurdakoed, ar bab-dummadyob-imaklemaladga ina-wawagan-oburmakdii gusad. E-suiganba-naega olargan biiri yodii gusad, ordubmar ena nasikdii gusad, ar gwen angi binsassulid, agala, an sabsur-odurdakoed. Ani an Bab-Jehová-guedi we-ibmar soged. 
”Anbina-sogega an imakoed: Nega-dulesulidganba an sedoed, ega sabedgi nuekwaa an sunmakoed. 
Agi, Acor-nebagi, uva-nainumar gannar an ega obiroed, sabsur-odurdakleged-neba an ega weligued-nebaga imakoed. A-nebagine igi-nuchukwa-unni angadga gusa, degi, igi-Egipto-yargi-noargusgu angadga an imaksa, deyob an gannar imakoed.” 
Bab-Jehová weyob soged: “A-ibagangine, ‘an-dummadye’ be anse golosulid. ‘An-suiye’ be anse goloed. 
Be-bab-dummadyob-imaklemalad-e-nug-biega bar an be-imakosulid, degi, bipisaale bar ese be gorsii guosulid. 
A-ibagine, we-ibmar-durgan mer bese achamalaga an imakoed: Ibmar-durgan-sapurbarmalad, mulamar, ibmar-durgan-unimalad. Deginbali, we-yargine, warsigi-urweleged an obelobaloed, es-suidmargi-urweleged, bila-onolemaladi an obelobaloed, adi, bela na dobedsuli gabdii gumalagar. 
An-omega degisadegu an be-imakoed, igar-soglemaidba an-ome-sunnadga an be-imakoed. Ar an bela-bela be-sabsoggu, deyob an be-imakoed. 
An be-nikuoed, an be-dikarba noosulid. Degidbali, magar be an-daknonikoed, ani an Bab-Jehová gue.” 
Bab-Jehová soged: “A-ibagine, mogirmar dii-wiega an imakoed, geb abali, napaneg ibmar-gwag-oniega an imakoed. 
Degidbali, trigoʼmar ainidagoed, vino-binid bukidar ainidagoed, olivo-gwallumar obinebakaoed. Bela we-ibmarmala, an Jezreel-neba-onasguega imakoed. 
An-dulamarga napaneg an uknonikoed, angadgarbi an-dulamar an imakoed. ‘Wiledaklegarsurmaladi’ an wiledaknonikoed. ‘An-dulasurmaladse, an-dulamarye,’ an gornonikoed ‘An-Bab-Dummadye,’ anse gormarmogoed.”