Oseas.
4.
Israel-dulemar, Bab-Jehová-gayaburba be nue itomar, Bab-Jehová dulamar-bukwadga igar-nabogesokalid. Bab-Dummad weyob soged: “Ar an-dulamar-abargine, dule-innikidaed bergusad, emar-sabgued bergusbalid, an-igar-amimalad bergusbalid. 
Aka bur we-ibmarmar burgusad: Gakangi yamo-ise-sogar-sogleged, gakansaed, atursaed, negsichigi-abirgunagwarsuli-nanaed, dule-gindakmalad. ¡Dulemar gindaklemamaigus nanaed! 
A-ulale, yar-naidgi wile-itoleged-dummad nagunonikoed, egi-dulemar-gudidiidi niga-galakudmaloed. Sapurgi ibmar-durgan-bukwamaladi, bela burgwidmaloed, nuumala, uamarse-bakale, bela girgudoed. 
”Melle bemar dule-bamaladgi na be gwisgumalo, melle be dule-bamaladse urwemarbalo. An-urwenaidi, unnila dule-irwa-anse-goledgi an urwenaid. 
Ar bemala ibginedbali, degi, mutikidbali, oitolenonimaloed. Bemarbali dule-an-gayaburba-barsoged ibitononimarmogoed. ¡Be-nan an be-ibe obelogoed! 
Ar an-dulamar aku an-daksamaladbali bela burgwismalad. ”Ar be aku an-daksamarsoggu, dule-irwa-anse-goled-igargi an be-obanmarmosunnad. Ar be an-igar-mamaid be obachasoggua, be-wagan-danimaloed an iemosunnoed. 
Ar dule-irwa-anse-gormalad-mergudedbali, aka bur bule angi yoled-nanaed. Degisoggu, an e-nug-odummoged-anar, anse wilemaloed. 
An-neggwebur-e-isguedgi mas gundimalad, aga bur gatik an-neggwebur-isgued abemalad. 
Degi-inigwele, dule-irwa-anse-gormalad sabsur-anse odurdaklemaloed, degine, dulamar e-damaladba sabsur-anse odurdaklebaloed. 
”Bab-Jehováʼgi bangusmalad. Agala, aisaar mas-gunmalo-inigwele, gwen immelegosurmalad. Degine, negsichigi-galagwensur-nanamalo-inigwele, gwen dula-omelogosurmalad. 
”Vinoʼgi mumgudimaladbali, gambasamaladbali, oes gudidimalad, bar itodisurmalad. 
An-neggwebur-dulamar suar-nuchuse idakmalad, a-suar ega ibmar sogdaed. Galagwensur-negsichigi-nanamaladbali aku-neg-itoge gudmalad. Negsichigi-galagwensur angi-yolegar nanadimalad. 
Yar-birigangine, yar-mullugangine, sapimar-urba e-bab-dummaganga ina-wawad oburmakdamalad, degi, ibmar-ogumakar ukdamarbalid. A-ulale, e-bunamala, galagwensuli negsichigi-nanaddamalad, degi, e-balamar abirgunagwarsuli negsichigi yoleddamalad. 
Be-bunamala galagwensuli negsichigi-nanadimalad-ular, be-balamar abirgunagwarsuli negsichigi-yoledimalad-ular, an sabsur-odurdakosulid. Ar ade, e-suimarmoga gambasamaladba nanadimarmogad, degi, bab-dummagan-neggi-gambasamaladbo ibmar-ogumakar ukmarbalid. Degisoggu, neggwebur aku-neg-itogedbali, bela bergudoed. 
”Ar Israel-dulemar galagwensuli negsichidgi nanadimalad, Judá-dulemar, bemardi mer be deyob damarmogad. ”Judá-dulemar, melle Gilgalʼye-neg-nugadse be namalo, melle be Bet-Avénʼye-negye-nugadse be namalo. Melle be ‘Bab-Jehová-nuggi’ ise-sogar-imakmalo. 
Ar Israel-dulemar moli-bebe-nikad-bunolo-uayasulidyob guded. Degisoggu, ar igi sibad-wawaad-sapingana nainu-olloledgi gagangi omalenaidae, ¿ar Bab-Jehová, deyob Israel-dulemar-imakoe? Bar deyob imakosulid. 
Efraín-dulemar bab-dummadyob-imaklemaladgi alakwaa seledimalad. Mer ese bar gormar, ar na deyob nanabimarye soged. 
Ar Efraín-dulemar sisa-gobed ei bergudele, gambasaedgine burguddamalad. Ar e-dummagan-yar-semaladbela, igar-isgana-imakedbina sogdamalad, 
A-ulale, e-bab-dummaganga ibmar-ogumakar-ukmalad-ular, bingegunanai gudmaloed, burwa-ooregedbali bela bergumaloed.”