Amós.
8.
Bab-Jehová-Bur-Gandik-Maid, negburgan anga oyosbalid: Garbagi sapi-san-gorogwad-bukwa an daksad. 
Degi, anse egichided: —Amós, we, ¿ibu be dake? Degi, an abin-sogde: —Garbagi sapi-san-gorogana-bukwa an daked. Degidgine, Bab-Jehová anga sogded: —Israel-dulemar-e-bergued-ibagan warmaknonikid. Ibmar-san-gorogwayobi berguoed. Israel-dulemarga e-isgued bar an eliosulid. 
Bab-Jehová-Bur-Gandik-Maid sogded: —A-ibagangi, reyneggi-namaklemalad, boedga guoed. Dulemar-bukidar yogasaar burgwar-burgwar omilede gumaloed. Degi, bogidikidgi muimar yogasaar metemaloed. 
Nue be an itomalo, bemar, dulemar-wilegana sabsur-imakmalad, bemar, dule-wilegana obelodimarbalid. 
”Bemar sogmalad: ‘Anmar ibmar-gwagmar manigi ukega, ¿sana we nii-gebe-gwisgusad-e-iba berguoe? Anmar ibmar-gwag-orosgi-dakleged-trigo manigi ukega, ¿sana we itoged-iba berguoe?’ ”Bemar ibmar-nibirgi-uked bur ichee-gued abediid. E-manidi odummoged abediid. Emar-yardakega nibir-nuedsulid ebudamalad. 
Orosgwaggi-dakleged-e-solamar bemar manigi ukdamalad. Bemar dule-wilegana manigi bakdamarbalid, degi, dule-ibmar-abedimalad nag-uka-gwagwengi unnir bakdamarbalid.” 
Bab-Jehová, Jacob-dulemar-e-san-dummarba-imakedgi, ise-sogar sogded: “Ibmar be imaksamaladi, an gwen iegosulid. 
Deyob bela neg-guoed-ulale, ¿napade giglimakosuli? ¿Bela e-dulamar boosurmala? Bela napa, Nilo-diwar-engumaiyobi megoed, dogdoed. Agi Egipto-diwar-ilideyobi, ilidoed.” 
Bab-Jehová-Bur-Gandik-Maid sogdebalid: “A-ibagi, yorukudba dad-galegega an imakoed, degi, napneggi ibginedba negsichid an nasikoed. 
Be-iba-onomalad ise-bukib-binsaleged-ibaga an imakoed. Degi, be-namakmalad, namakmalad-ise-bukib-binsaedga an imakbaloed. Bukib-binsaleged-e-mor-yoega an bemar-imakbaloed. Degi, be-nono swanga-imakega an be-imakbaloed. Machi-wargwennagwad-burgwisar, ega bonanaidaeyob ise-boar bemar bomaloed, degi, ibagan nunmaked-dummad-nai bergudoed.” 
Bab-Jehová-Bur-Gandik-Maid sogdebalid: “Ibagan-danikid, napneggi an ukud-dummad nasikoed. We-ukudde, masgulleged an obarsulid, degi, uku-uku-itogedgi-dii-gobleged an obarsurbalid. An obaredi, dulemar an-gayaburba-itobiedba uku-uku-gudiguoed, an obared. 
Degisoggu, dulemar, Bab-Jehová-Gayaburba-amiega, igarsuli demar-mataganba namaloed. Igarsuli dad-nakwed-argan-sapiledsik, degi, dad-nakwedsik gudii gumaloed. Degi-inigwele, Bab-Jehová-gayaburba gwen amiosurmalad. 
”A-ibagine, yagana-yeerdaklemalad, sapingana-gandikmalad, uku-uku-itogedba negoedmaloed. 
Dulemar Samaria-dorgan-e-isgudiidga ise-sogar sogdamaladi bergumaloed, bar-durguosurmalad Amarde sogmalad: ‘Dan-neggwebur-e-bab-dummad-dula-gudiidba ise-sogar an bega sogye.’ Degi, sogdamarbalid: ‘Beerseba-neggwebur-e-bab-dummad-dula-gudiidba ise-sogar an bega sogye.’ ”