Zacarías.
4.
Geb baliwitur-anbo-sunmaknaidi anse gannar nonikid. Agine, ar igi-dule-gabmaile, odakledae, deyobi an-odaknonikid. 
Geb anse egisded: “¿Ibu be dake?” An abin-sogded: “Gwallu-olo-sunnabiid-candelabroʼye-nugad an daked. Geb birgine, olivo-gwallu-siged-nika an dakbalid. Gwallu-olo-sunnabiid-birgine, gwallu-senigana gugle (7) siid. Degi, e-warmar gugle (7) nikabalid. A-warmarbali, olivo-gwallu ese warmaked. 
Deginbali, gwallu-olo-sunnabiid-dikarbali olivo-sapi sarbo gwichibalid. Olivo-sapi-wargwen, gwallu-olo-sunnabiid-nuedsik gwichid, baiddina, argan-sapiledsik gwisbalid.” 
Geb baliwitur-anbo-sunmaknaidse an egisded: “Dummad, wede, ¿bela ibu obare?” 
Baliwitur anga sogded: “¿Ar be wissurde, we ibu-obare?” An ega sogded: “Dummad, an wissuli.” 
Degisoggu, baliwitur anga sogdesunnad: “Bab-Jehová Zorobabelʼga weyob sunmaknaid: ‘Sordamar-bila-onogedginsulid, garganguedginsurbalid. Unnila An-Burbaba ibmar imaklegoed.’ Deyob, Bab-Jehová-Bela-Gangued-Nikad soged. 
Yar-dummad-siid, ¿ar na be doa-itosunna? ¡Ar be Zorobabel-asabinni unnila neba gued! Zorobabel akwa-nued begi ononai guoed. We akwa-yeerdakmaladba sognanai gumaloed: ‘¡Doggus yeerdakleye!’ ” 
Geb sorbali, Bab-Jehová weyob anga sogded: 
“Zorobabel Babse-goled-neg-sobegala, akwasailamar urbisad. Na e-sunnad neg-sobnaid obelononikoed.” Deyobi, bemar wisgumaloed, Bab-Dummad-Bela-Gangued-Nikad bemarse an-barmiarye. 
Dulemar-gebesaila-ibmar-burwigan-imakledgu egi-bengusmaladi, Zorobabel e-argangi dubgi-gingwa-naid-gani dakarmalale, weligwar itodmaloed. We-gwallu-gwagugle-guedi (7), Bab-Jehová-e-ibya gued, bela neg-dirbir-naidgi nakulediid. 
Geb baliwiturse an egisded: “We-olivo-sapi-warbogwad-gwichid, wargwen, gwallu-olo-sunnabiid-nuedsik-gwichid, baiddi, sapiledsik-gwichid, wede, ¿ibu obare?” 
An baliwiturse egisdebalid: “Gwallu-e-war-olobiid-warbogwad-dikarba olivo-anagan-walabogwad-gwigwichid, agi e-gwallu iirmakmaid, wede, ¿ibu obarbali?” 
Baliwitur an-abin-imakded: “¿Ar be wissurde, wede ibu-obare?” Geb an ega sogded: “Dummad, an wissuli.” 
Geb baliwitur anga odulodsunnad: “We-olivo-sarbogwadi, dule-nug-imaklegarmaladid. Bab-Jehováʼga-arbaega, nug-imaklesmaladid. Ar Bab-Jehová, bela napaneg-naid-ibedid.”