Zacarías.
8.
Bab-Jehová-Bela-Gangued-Nikad-gayaburba anse nonibalid. Weyob anga sognonikid: 
“Ani Bab-Jehová-Bela-Gangued-Nikad, weyob soged: Sión-dulemarbina an bela-bela nue soged. An bela-bela nue-binasogedbali, an e-isdarmaladse sabsur-ulud gusad.” 
Bab-Jehová weyob soged: “An Sión-yarse gannar nonikoed, an Jerusalén-neggweburgi megnonikoed. Jerusalén-neggwebur Napiragwad-Neggweburye nuggunonikoed. Bab-Jehová-Bela-Gangued-Nikad-e-yar Islidikid-Yarye nuggunonikoed.” 
Bab-Jehová-Bela-Gangued-Nikad weyob soged: “Dadgana, muugana, Jerusalén-e-igarbali gannar sigdii gumaloed. Na seredgusmaladbali, e-gaapoled-sedii gumaloed. 
Masmala, bunamala, Jerusalén-igarganbali gannar dododii gumaloed.” 
Bab-Jehová-Bela-Gangued-Nikad weyob soged: “A-ibagan nonikile, dulemar-dula-napi-besmaladi, binsamaloed, gwen deyob ibmar-gued daklesurye. Ar angardina, ibmar-geg-gued nikasulid, Ani Bab-Jehová-Bela-Gangued-Nikad deyob soged.” 
Bab-Jehová-Bela-Gangued-Nikad weyob soged: “An-dulamar-dad-nakwedsik-bukwamalad an bendakoed, an-dulamar-dad-argwanedsik-bukwamalad an bendakbaloed. 
Jerusalén-neggweburgi-gudigumalaga, gannar dagmalaga an imakoed. Wemar an-dulamarga gunonimaloed. Ani an e-Bab-Dummadga gunonikoed, e-Bab-Dummad-innikigwad, e-Bab-Dummad-igar-innikigwad-imaked.” 
Bab-Jehová-Bela-Gangued-Nikad weyob soged: “Bemar, we-ibagangi, Bab-Dummad-gayaburba-barsogmalad e-ibmar-sogsad-itosmalad, be niga-gandik imakmala. Anse-goled-neg-soblesokargu, akwa-gebesaila-silesad-akale, we-gayaburba be itosmalad. 
Ar we-ibagan-iduale, dule-arbamalad gwen bennuklesurmalad, ibdurganmala gwen-masgi ogullesurbalid. Dule e-isdarmalad-ulale, aineba nadele, dobgunadapdaed. Ar an bela dulemar, na dukin-dukin-urwemalaga imaksad. 
Ar epenne an igi-dulemar-napibesmalad-imaksagusa, bar an deyobi imakosulid. Ani Bab-Dummad-Bela-Gangued-Nikad deyob soged. 
”Neg-bogidikidgi be ibmar digmaloed, uva-dubmar sanmakega guoed, napamar ibmar-sanmaknai guoed, nibnega e-boomar obadnai guoed. We-neggweburgi-napibesmaladga, bela we-ibmar egadga-guega an ukoed. 
Judá-dulemar, Israel-dulemar, mer dobgumalo, gatik niga-ogannomalo. Bemar, dule-yar-baid-baidgi-bukmalad-abargi, ibmar-isganayob ukabsales gusmalad. Emigindi, an be-bendakmaloed, ibnuedga be gunonimaloed.” 
Ar Bab-Jehová-Bela-Gangued-Nikad weyob soged: “Ar be-dadgan an-oulus-gusmargua, bar an wiledaksuli obelogedgi an binsasgusad. Ani Bab-Jehová-Bela-Gangued-Nikad deyob soged. 
”Emigindi, Jerusalén-dulemarga, Judá-dulemarga ibmar-nued-imakedgi an binsaed. Degisoggu, ¡mer dobgumalo! 
”Bemar we-ibmarmar imakergebed: Napiragwadgi ibmar sogmalo. Igar-nabolemalad-neggi, napiragwadgi, igar-inniki-maidba igar nabomalo. Ar deyob imaklegedi, ¡neg-bogidikid nasiked! 
Be-gwenadgangine, mer ichakwa be binsao, mer gakansaale emargi be gwisguo. Ar bela we-ibmarmar an isdardaked. Ani Bab-Jehová deyob soged.” 
Bab-Jehová-Bela-Gangued-Nikad anga sogdebalid: 
“Ani Bab-Jehová-Bela-Gangued-Nikad weyob soged: ‘Judá-dulemargala nii-walabakedgi, nii-walataledgi, nii-walagugledgi (7), nii-warambedgi (10), mas-gunsuli-gudiguedi, weligwaledga, yeer-itolegedga guoed, iba-dummad-weligwaledga guoed. Degisoggu, neg-bogidikidbina be sogmar, igar-napiragwadbina be sogmar.’ ” 
Bab-Jehová-Bela-Gangued-Nikad weyob soged: “Amba dulemar-yar-baidginmalad, dulemar-neggwebur-bamaladginmalad danimaloed. 
We-dulemar neggwebur-baid-baid-onodii gumaloed. Dulemar-a-neggweburgi-gudimaladga sogdimaloed: ‘¡Bab-Jehová anmargi nued-binsaega, anmar ese namarye! ¡Anmar Bab-Jehová-Bela-Gangued-Nikad amimarye! ¡Ar an Bab-Jehová-amimogoeddeeye!’ ” 
Bab-Jehová-Bela-Gangued-Nikad-amimalaga, Bab-Jehová-egi-nued-binsaed-amimalaga, Jerusalén-neggweburse, neggweburmar-bukidar, neggweburmar-yar-baid-baidgi-dutusur-bukmaladi, nonimaloed. 
Bab-Jehová-Bela-Gangued-Nikad weyob soged: “A-ibagangine, dule-bukidara gwabinduku-akar-akar-sunmakmaladi, bela-dulemar-yar-baid-baidgi-bukwamaladi, Judío-dule-wargwen-e-mordukugi akanai gumaloed, ega weyob sogmaloed: ‘¡Anmar beba-naega be anmar-imake! ¡Ar anmar wisgusad, Bab-Dummad bemarba gudiiye!’ ”