Mateo.
17.
A-ibanergwad-sorbali (6), Jesús, bachik Pedro, Jacobo, degine, Jacobo-e-urba-Juan, yar-birse sesad. 
Jesús amar-asabin yar-birgi-gwichi, Jesús-e-san-dakleged gwagdegusad, na e-wagar dad-ibeler-gaeyobi gadegusad, degine, e-mormala, bela ise-sipumakar, bela dagudik, gwallubayobi daklenaded. 
Geb agi, Jesús-sapingan-warbaagwad dakdemalad, Jesús, Moisésʼmala, degi, Elíasʼmala sunmakgwichi. 
Geb degi, Pedro Jesúsʼga sogded: —Dummad, we nueddo, anmar wegi gudisaed. Ar be abegele, anmar wegi neg-matargana-gwapaa sobmalodo: Gwagwen bega, baid Moisésʼga, geb baid Elíasʼgarmo. 
Amba Pedro-sunmakgwichi, mogir mee emar-birgi nagunonikid. Geb agi mogir-imbaba gayaburba gollalid, sogded: “We, An-Machi-sabedid. We-Machigi an yeer itoged. We-Machi nue be itomar.” 
Ar Jesús-sapingan degi-gayaburba-itosmargua, yog napase asgun-sindigar sigidmalad, bela nue-dobe-ito nadmalad. 
Geb agi, Jesús e-sapingan-walik nonikid, geb ebunonikid. Ega sogded: —Be gwisgumar, mer be dobgumar. 
E-sapingan nono-onakwidmargu, dakdemalad, unnila bato Jesúsʼbi walagwen gwichi. 
Jesús e-sapingan-warbaagwadmala yar-birgi-aidearmargu, e-sapinganga ise-sabsur sogded: —Mer bipisaar bemar an-san-gwagsad dulemarga sogmalo. Geb ani Dule-Machi burgwisar, degi, gannar durgusad-sorba, geb be sogmalo. 
Geb degi, e-sapingan Jesúsʼse egichiarmarsunnad: —¿Ibiga degite, Garda-Narmaked-Dulemar sogmarsunna, Bab-Dummad-dule-wargwen-barmidagoye-sogsad-idu, Elías-inse nonigweloye? 
Jesús abin-sogded: —Ar napiragwad. Elías-inse nonikoed. Bela dulemar Bab-Dummad-Igargi-binsaega igar-nudaknonikoed. 
Ar andi an bemarga soged, Elías bato nonikid. Nonikid akudaksa gusmalad. Ar dulemar, igi imakbi-gusmala, deyob Elías-imaksamalad. Amba deyob ani Dule-Machi, amarse an odurdaklemogoed. 
Geb degi, e-sapingan Diigi-dule-oged-Juanʼnik-ega-ibmar-soged mag itosmalad. 
Jesús e-sapingan-warbaagwadmala dulemar-bukidar-bukmaladse aidenonimargu, dule-wargwen Jesúsʼse nonikid. Yokorgi sindigar Jesús-abin signonikid, ega sognonikid: 
—Dummad, an-machi wis be wiledake. Ar an-machi nue-odurdaklediid. Ani burwa-saar-daed. Imbagwenale, soogi argwatedaed. Imbagwenale, diigi argwatedaed. 
Ar be-sapinganga an-machi an senonikinad, be-sapingan anga gwen nudaksasurmalad. 
Jesús abin-sogded: —¡Be Babgi-bengumalad-dulemar! ¡Be Bab-igar-oakaloged-dulemar! ¿Ar bemarde an-suli geg be ibmar imakmarde? ¿Ar sana be ibmar durdakmaloe? Machigwa anga be sedamarsun. 
Geb degi, machigwa Jesúsʼse senonimargu, Jesús niaga binnasur ibmar sogded. Geb nia machigwagi noded. A-akale, machigwa nugussunnad. 
Jesús-e-sapingan Jesúsʼse bachikii ese gochamalad, ega sogdemalad: —¿Ar ibiga anmardi geg niaburba ono gusmala? 
Jesús abin-sogded: —Ar bemar ulubgi amba angi benmarsoggu, a-ular, geg be niaburba ono gusmalad. Ar napira an bemarga soged, ar bemar mostaza-gwagyob, wis bipi be angi bensurmalale, sunna be we-yarga sogsamalaled: ‘Wegi-siid be weba ainir,’ ar yar ainirisaled. Ar ibmar bela be imakedbimardo. 
”An-emis-nia-onosadgiid-onogegala, yogasaar geg dule onoged. Unnila mas-gunsuli, degi, Bab-Dummadse-goledgi, geb bemar sunna wegiid-niamar onoged.” 
Jesús Galilea-yargi e-sapinganmala bipirmakdimaladgi, ega sokalid: —Ani Dule-Machi, an-isdarmalad an-ganonimaloed, dulemarga an-ukmaloed. 
Geb agi dulemar an-oburgwemaloed. Degi-inigwele, ibapaagi gannar an durguoed. E-sapingan Jesús-deyob-ega-soge itoarmargu, nue-wile itodmalad. 
Jesús e-sapinganmala Capernaúmʼse modapmalad, dulemar-Bab-Dummadse-goled-negga-mani-galeged-weemalad Pedroʼse nonimalad, ega sognonimalad: —¿Ar bemar-odurdaked-saila, wede Bab-Dummadse-goled-negga-mani-galeged bennuksuli? 
Pedro abin-sogded: —Anmar-odurdaked-saila bennuked. Pedro negse dogdegua, Jesús-inse ega sunmakalid, ega sogded: —Simón, be dakegua, reymar-we-napnegginmalad, ¿doamargi we-mani gadamar be insae? ¿E-sordamargine? ¿Dulemar-baigangine? 
Pedro abin-sogded: —E-sordasurmaladgi mani galeged. Jesús, Pedroʼga sogdesunnad: —Degisoggu, e-sordamardi geg bennuksundo. 
Ar degi-inigwele, dulemar mer anmargi urwemalagala, mata-dummadse be nae, be ua-sona. Ua-gebe-be-sooedi, e-gaya be egaoed. A-e-gaya-yaba be mani-amioed. A-manigi bega, degi, anga, be mani-galeged bennukoed.