Marcos.
14.
Oburgwilegoenad-Iba-onoleged, degi, Madu-Inasuli-Gulleged-Iba-onoleged ibabo-napid. Dule-irwa-Bab-Dummadse-gormalad-e-dummagan, degi, Garda-Narmaked-Dulemar igar-amiarmalad, igi-saele, yamo-yardakar Jesús-gamalodibeye, adi, oburgwemalagar. 
A-ulale, na muchub-muchub sogdemalad: “Mer anmar ibagi Jesús-gamaloye. Abakale, Jesúsʼbina dulemar urwearmalarye.” 
Jesús Betania-neggweburgi Simón-naibe-buna-yaa-maleged-nika-gudigusad-neggi mas-gunsigua, ome-wargwen gwallu-wawa-nued, nardoʼye-nugad, gargerba-baklegedi, bute-akwa-alabastroʼgi-sii senonikid. Ome bute-nono-bichisgu, Jesús-nonogi gwallu-wawa eosad. 
Gwenna-gwenna-bukmalad sae-itode sogdemalad: —¿Ibiga we-ome binsarsunna gwallu-wawa-nued wiosa? 
Ar we gwallu-wawa mani-dummarba nabir uklegoenad, adi, wileganaga a-mani uklegegar. Dulemar omegi sunmaknanai guarmalad. 
Jesúsʼdi sogded: —Mer be omegi sunmakmar. ¿Ar ibiga bemar ese urwemala? Ar we-ome ibmar-imaksad dog-nued angi binsasad. 
Ar bemar-abargi dule-wilegana degisadegu gudiguoed. Bemar dule-wilegana-bendakbiele, sunna be bendakoed. 
We-ome, unnila na sunna-ibmar-imakedba ibmar-imaksad. An-diglegoedga iduakwaa an-san gwallu-wawagi magsad. 
Napira an bemarga soged, we-napneggi bia Bab-Dummad-Gayaburba-Nuedgi sunmaklegoe, we-ome-ibmar-imaksad-ebinsamalaga egi sunmaklemogoed. 
Judas Iscariote, Jesús-sapingan-ambe-gakabogwad-wargwenad (12), darba Jesús-ukega dule-irwa-Bab-Dummadse-gormalad-e-dummaganse nadegusad. 
Judío-dummagan, Judas-itosmargu, weligwar itosmalad, ega mani ukmaloye sogsamalad. Degisoggu, Judas igar-amiarsunnad, igi-saele darba Jesús-ukodibeye. 
Madu-Inasuli-Gulleged-Iba gebe-onodedgi, gusgu Oburgwilegoenad-Ibagi-sibad-wawaad-oburgwiledaedgi, e-sapingan Jesúsʼse egichiarmalad: —Oburgwilegoenad-Ibagi-mas-gulleged gunnega, ¿bia anmar bega guagwar ibmar-imaknabi be anmar abege? 
Jesús na e-sapingan-warbo barmisad, ega sogsad: —Neggweburse be namar. Agi dule-wargwen gwidugi dii-semai bemargi nodagoed, eba be namalo. 
A-dule bia dogdapoe, a-neg-ibedga be sogmaloed: ‘Odurdaked-saila sogye: ¿Bia Oburgwilegoenad-Ibagi an, an-sapinganmala mas-gunnoed-neg siiye?’ 
Geb neg-ibed, niba-aila-birgi neg-dummad bato guagwar nuesaar-sii bemarga oyogoed. Agi bemar anmar-mas-gunnoed guagwar urbemaloed. 
Jesús-sapingan-warbogwad neggweburse nadmarsunnad. Neggweburse dogdapmalad, ar igi Jesús emarga sogsagusa, deyobi dakdapmalad. Degisoggu, masgullegoed guagwar urbismalad. 
Neg-mutikgudgu, Jesús na e-sapingan-ambe-gakabogwadmala (12) nonimalad. 
Mese-naba mas-gunsimargu, Jesús sogded: —Napira an bemarga soged, bemar-wargwen-anba-mas-gunsiidi, darba an-ukoed. 
Geb e-sapingan wile itodmalad, na warwargwengi Jesúsʼse egisdemalad: —¿Ani an be-ukoe? Baid sogdemogad: —¿Ani an be-ukoe? 
Jesús e-sapingan-abin sogded: —Bemar-ambe-gakabogwad-wargwenad, bategi anba-madu-wara-imaknaid, a darba an-ukoed. 
Napira an bemarga soged, ani Dule-Machi, ar igi Bab-Dummad-Gardagi angi narmakar-nai, ar deyob an burgoed. Ar dule-darba-an-ukoeddina nue-wilegoed. A-dule gwalulessulina, bur nabirindo. 
Mas gunbukmargu, Jesús madu-susgua, Bab-Dummadga dog-nuedye sogsad. Geb a-sorba, madu-bisge-bisge-imaksagua, e-sapinganga uksad, ega sogded: —Be sumar, we-madu an-sanad. 
A-sorbali, Jesús nog susbalid. Geb Bab-Dummadga dog-nuedye-sogsagu, e-sapinganga uksad, agi e-sapingan bela gobsamalad. 
Jesús e-sapinganga sogded: —We, an-ablisad. An-ablisgi Bab-Dummad dulemarbo igar-bini mesnaid. An-ablis dulemar-bukidar-ulale, milegoed. 
Napira an bemarga soged, bar an vino gobosulid. Geb iba-nonikoedse, Bab-Dummad-e-negdakmaidgi an vino-binid gobdapoed. 
Namaksamalad-sorbali, geb Olivo-yarse nadmalad. 
Geb Jesús na e-sapinganga sogded: —Belagwapa bemar emi-mutik angi bangudmaloed. Ar ade, Bab-Dummad-Gardagi narmakar naid: ‘Sibad-wawaad-edarbed an oburgoed, Geb agi sibad-wawaadmar bela duurmakdoed.’ 
Jesús sogdebalid: —Ar an gannar durgusad-sorbali, an bemar-idu Galilea-yarse naoed. 
Geb degine, Pedro, Jesúsʼga sogded: —Bela begi bangudmalale, andi begi banguosulid. 
Jesús, Pedro-abin sogded: —Napira an bega soged, emi-mutiki, gannir-irbo-namaked-iduar, be ilapaa an-osulogoed. 
Aka bur bule Pedroʼdi sogded: —Ar an beba burgweye sogele, an be-osulogosulid. E-sapingan-baigan bela degibi sogdemalad. 
Jesús na e-sapinganmala Getsemaníʼye-neg-nugadse nadmalad. Agi Jesús e-sapinganga sogded: “Wegi be ambikumar, andi an Bab-Dummadse gorgwelo.” 
Unnila Pedro, Jacobo, degi, Juan, eba sesagusad. Agi, Jesús nue-wile itoalid, degi, nue-surbinsa itoarbalid. 
Jesús na e-sapingan-walapaagwadga sogded: —Andi an ulubgi nue-bukib-itoged, sunna an burgwisar an itoged. Wegi be ambikumar, mer be gabmalo. 
Jesús sikwas nadgu, napagi yokorgi-sindigar sigdapid. Geb Bab-Dummadse gorsigusad, egi-nunmaked-danikoedi bitigi ega sunna osulogena gadinye. 
Jesús weyob sogsigusad: “¡Abba! (Abba obared Baba). Begardi, bela ibmar sunna guedbiid. Bitigi be anga dummad-an-wilegoed osulogena gadin. Degi-inigwele, an-ibmar-abegedba mer ibmar guo, unnila be-ibmar-abegedbarbi be ibmar imaksun.” 
Jesús gannar nonigua, e-sapingan-gabmai daknonikid. Geb Pedroʼga sogded: —Simón, ¿be gabmade? ¿Bipisaar wis be wachi-irgwensaar atakdii gussurde? 
¡Atakmala! ¡Bab-Dummadse-gormala! Adi, bemar isguedse mer galakumalagar. Napiragwa bemar-burbadi ibmar-nued-imakega guagwar gudiinad, ar bemar-sandi nolloo gued. 
Jesús gannar nadbalid. Igi iduar Bab-Dummadse-gocha, deyobi gannar Babse gochabalid. 
Jesús gannar nonibargua, e-sapingan gannar gabmamai daknonibalid, ar ade, gabed egi nue-obin itomalad. Degisoggu, aku-itomalad igi Jesús-abin sogmaloe. 
Jesús gannar ilapaagus e-sapinganse nanadanikid, geb ega sogded: “¿Bemar amba gabmamade? ¿Amba obunnomamade? Mer bar be gabmarsun. Wachidi bato omosad. Ani Dule-Machi, dulemar-isgudidimaladga uklesokalid. 
”¡Be gwisgumala! ¡Anmar nae! Dule-darba-an-uksokalid bato anmar-walikgusad.” 
Jesús amba sunmakgwichidgi, e-sapingan-warambe-gakabogwad-wargwenad, Judasʼye-nugad nonikid. Judasʼba dulemar-bukidar es-suidyalaba, degi, suarmar-annik-annik danimalad. A-dulemar, dule-irwa-Babse-gormalad-e-dummagan, Garda-Narmaked-Dulemar, degi, Judíoʼmar-girmar-dummagan, barmiar gusmalad. 
Judas, Jesús-darba-uksad, dulemarga weyob sogsagusad: “An dule-e-wagar-uoedi, a-duled. A be gamaloed, degi, nue-atinnar be sedmaloed.” 
Judas nonigua, Jesús-walikaa naded, geb ega sogded: —Odurdaked-saila. Geb ei-wagar usad. 
Geb degine, dulemar Jesús-gasmarsunnad. 
Agi Jesús-sapin-wargwen-gwichidi, es-suid-onosgu, dule-irwa-Bab-Dummadse-gormalad-e-dummad-e-mai naibi imaksad, e-ibe uaduk siksad. 
Jesús dulemarga sogded: —¿Ibiga dule-ibmar-atursaedyob es-suidyalaba, degi, suarmaryalaba be an-gadanimala? 
Bane-bane an bemar-abargi gudigusad. Bab-Dummadse-goled-neggi, an dulemar-odurdakdii gusad, degite, gwen be an-gassurmalad. Degi-inigwele, ar Bab-Dummad-Gardagi-narmakar-naidba ibmar guergebed. 
Geb degine, bela e-sapingan Jesús-metenadmalad, e-idu wakitemalad. 
Sapingwa-wargwen unnila atuedgi-bipirmakar Jesúsʼba nadapgusad. A-sapingwa gasmalad. 
Edi binnasur-guargu, atued-mide uka-swiri wakited. 
Dulemar dule-irwa-Bab-Dummadse-gormalad-bur-dummadse Jesús-senonimalad. Agi bela dule-irwa-Bab-Dummadse-gormalad-e-dummagan, Judíoʼmar-girmar-dummagan, degi, Garda-Narmaked-Dulemar ambikunonimalad. 
Pedroʼdi bannaba Jesúsʼba nadapgusad, degi, dule-irwa-Bab-Dummadse-gormalad-bur-dummad-neg-imbase warmakdapid. Agi Pedro waega suar-ibmala-abargi soo-walik sigdapid. 
Dule-irwa-Bab-Dummadse-gormalad-e-dummagan, degi, bela-Judío-dummagan-igar-nabiromalad, igar-aminanai-guarmalad, igi-saele Jesús-nodiid amimalodibeye, adi, Jesús-oburgwemalagar. Degi-inigwele, Jesús-nodiid gwen amissurgusmalad. 
Bukidar yamo-gakansaar Jesúsʼgi sunmaknanai gusad. Degi-inigwele, na e-ibmar-sognanaidi gwen balillaa sogsasurmalad. 
Geb degine, gwen-gwen gwisgusmargu, yamo-gakansaar weyob Jesúsʼgi sunmakdemalad: 
—Anmar weyob Jesús soge itosmalad: ‘We-neg-Bab-Dummadse-goled-dulemar-sobsadi, an earoye. Geb ibapaagi an baid soboye, dulemar sobosurye.’ 
Degi-inigwele, amba e-ibmar-sognanaid gwen balillaa sogsurmalad. 
Geb dule-irwa-Bab-Dummadse-goled-bur-dummad, dummagan-abargi-gwisgusgu, Jesúsʼga sogded: —¿Be dulemar-abin-imakosuli? Be wemar-abin-imakega, ¿igi be sogmogoe? 
Ar Jesúsʼdi bipisaar sunmaksasulid, gwen abin-imaksasulid. Geb dule-irwa-Bab-Dummadse-goled-bur-dummad gannar Jesúsʼse egisdebalid: —¿Ar be Cristo, Bab-Dummad-Bur-Odummolediid-E-Machi? 
Jesús, abin-sogded: —Eye, ani an adi. Ani Dule-Machi, Bab-Dummad-Bela-Gangued-Nikad-e-argan-nuedsik sii be an-dakmaloed, degi, nibneggi mogir-imbaba-dani be an-dakmarbaloed. 
Geb dule-irwa-Bab-Dummadse-goled-bur-dummad, na e-mor siir-imaksad, oyogega, ede Jesús deyob-ibmar-sogsadi sae-itoye. Geb sogded: —¿Ar ibiga e-barsogmalad bar anmar abesunna? 
We-Jesús Bab-Dummad-nuggi-dodosad, bemar-sunnad itosmalad. ¿Igi bemar itomarmosunna? Bela dummagan-igar-itobukmalad sogsamalad, Jesúsʼga burgwed-igar maiye, degisoggu, oburgwilegergebye. 
Gwenna-gwenna Jesúsʼgi wiakdemalad. Jesús-ibya-edichamalad, geb e-wagar-bibyonai gusmalad. Ega sognanai guarmalad: —Ar be soge, doa be-sarsosa. Suar-ibmala wagargi Jesús-bibyonai gusmarmogad. 
Pedro aila-urba neg-imbagi sii, dule-irwa-Bab-Dummadse-goled-bur-dummadga-bunagwa-arbaed nonikid. 
Bunagwa, Pedro soogi wasii dakargua, nue-nuu dakdegu, ega sogded: —Be Jesús-Nazaretʼginedba gudidamogad. 
Pedroʼdi bunagwa-abin-osulosa, sogded: —Aku an dake. Deginbali, aku an itobalid ibu be anga soge. Geb Pedro neg-imba-dogedse, magaba noded. Geb agi gannir namakded. 
Bunagwa gannar Pedro-dakarbargu, dulemar-bukmaladga sogded: —We-dule, Jesúsʼba naimogadid. 
Pedro gannar osulosbalid. Sikwas-sorbali, dulemar agi bukmalad Pedroʼga sogdemalad: —Napiragwa be Jesúsʼba naimogadid, ar be Galilea-dolad, degi, be-sunmakedi a-dulemaryob be sunmakmogad. 
Geb Pedro gakansaar, gandikidba ise-sogar sogded: —We-dulegi be sunmakmaladi, an aku dake. 
Degi-sogsagu, gannir gannar namakdebalid, ase ilabogus namaked. Agi Pedro ebinsaas-naded igi Jesús ega ibmar sogsa: “Gannir-ilabo-namaked-iduar, be ilapaa an-osulogoye.” Geb Pedro ise-boar naded.