Lucas.
23.
Geb degi, bela-dulemar-igar-itobukmalad ainidmargu, Pilatoʼse Jesús-sesmalad, adi, ega igar-itogegar. 
Geb degi, Judío-dummagan weyob Jesúsʼgi sognai guarmalad: —Anmar we-dule dulemar-binsaed-gadii itosad, sogdii, mer Roma-Dummad-Césarʼga mani ukoye. We-Jesús na dukin sogdiid, ede reyye, ede Cristoʼye. 
Geb degi, Pilato Jesúsʼse egichialid, ega sogded: —¿Ar be Judíoʼmar-e-Rey? Jesús, abin-imakdegu, sogded: —Ar bede soged. Napirado. 
Degine, Pilato, dule-irwa-Bab-Dummadse-gormalad-e-dummaganga, degi, dulemar-bukmaladga sogded: —An dakgua, we-dule gwen ibmar-oakalossur an daked. 
Ar dulemar bur bule sogdemalad: —We-Jesús dulemar-oimakdiid. Bela Judea-yalaganba dulemar-odurdakdiid. Galilea-akar onoalid, emide, wesegus naid. 
Geb degi, Pilato itoargu, dulemar soge, we-dule Galilea-akar noarye, egisdesunnad: —¿We-dulede, Galileaʼginedi? 
Pilato itoargu, Herodes-negdakmaidgi Jesús daniki, Herodesʼse barmissunnad. Ar ade, deun Herodes Jerusalén-neggweburse gudimogad. 
Herodes, Jesús-dakargu, weligwar itosad. Ar ade, dikasurgus Jesús-dakbigudiid. Degi, Herodesʼde, dulemar Jesúsʼgi-bukidar-sunmaked itodiid. Degisoggu, Herodes binsadsunnad, Jesús e-wagab ibmar-dakledisulid ega imakoergebye. 
Herodes, Jesúsʼse bukidar ibmar-egisnai gualid. Ar Jesúsʼdi gwen abin-imaksasulid. 
Degine, dule-irwa-Bab-Dummadse-gormalad-e-dummagan, degi, Garda-Narmaked-Dulemar Herodesʼga gannar-gannar Jesúsʼgi sunmaknanai guarmalad. 
Geb degidbali, Herodes, e-suar-ibganmala, ibgwensur Jesús-dakded, egi dododed. Reymaryob ega mor-nued yosmarsunnad. Geb degi, Herodes, gannar Pilatoʼse Jesús-barmisad. 
A-ibagine, Pilato, Herodes-ebo gannar ai-nuedga gunonikid. Ar ade, iduardi ebo urwedimalanad. 
Geb degi, Pilato, dule-irwa-Bab-Dummadse-gormalad-e-dummaganse, negsemamaidse, degi, bela-dulemarse, gochad. 
Geb amarga sogded: —We-dule-be-anga-senonimalad, egi be anga sognonimalad, we-dule, neg-gagadiiye. Ar bemar-wagab an ese ibmar egichisad. Degite, we-dule neg-ichodiiye bemar sogedi, gwen an deyob daksulid. 
Ar Herodesʼbela gwen-neg-oakalossuli daksamogad. A-ulale, gannar anse we-dule barmialid. Degisoggu, Jesús gwen-neg-oakalossursoggu, oburgwilegewilubsulid. 
Unnila an nue-sabsur-odurdakoed. A-sorba, an we-dule onogoed. 
Ar ibagi, gusgu Pilatoʼde igar-maidba dule-wargwen-esgaryagi-mellesiid onodaed. 
Ar dulemar-bukidar-bukwaddi bela dule-wargwennayob oimakdemalad, sogdemalad: —¡We-Jesús be oburgwe! ¡Barrabás be anmarga onoge! 
We-Barrabásʼde Jerusalénʼgi, Roma-dulemargi gwisgusad-ular, degi, dule-oburgwisbalid-ular, esgaryagi metegusmalad. 
Pilato Jesús-onobiedba idu-sogsadyobi gannar dulemarga sogdebalid. 
Ar dulemardi oimakdemarbalid: —¡Nakrusgi bioke! ¡Nakrusgi bioke! 
Geb Pilato gannar ilapaagi dulemarga sogdebalid: —Ar degite, we-dulede, ¿ibu-ibmar-isgana-imaksa be dakmarsunna? Ar gwen ibmar-isgana imaksasur an daked. Degisoggu, oburgwilegewilubsulid. Unnila an nue-sabsur-odurdakoed. A-sorba, an we-dule onogoed. 
Ar dulemardi binnasuli oimakdemalad, nakrusgi Jesús-biokye, sogdemalad. Ar degite, dule-irwa-Bab-Dummadse-gormalad-e-dummagan, degi, dulemar-oimakbukwad-sogedba bur imaklesad. 
Geb degi, Pilato dulemar-egisbukwadba imaksasunnad, Jesúsʼga nakrusgi-oburgwed-igar mesissunnad. 
Pilato, dulemarga, Barrabás-Roma-dulemargi-gwisgusadi, emar-oburgwisad-ular-esgaryagi-mellesiid, onossunnad. Geb Pilato suar-ibmalaga Jesús-uksasunnad, adi, dulemar, e-itolegedba Jesús-imakmalagar. 
Roma-suar-ibgan Jesús-sesmargu, dule-wargwen Jerusalénʼse-dani abinguarmalad. We-dulede, Cireneʼginedid, Simónʼye nugad. Gandikidgi a-dule-gasmalad, agine, e-gukingi nakrus-mesismalad, adi, Jesús-sorba nakrus-semai guegar. 
Dulemar-bukidar Jesús-sorba duurmaknadap gusmalad. Omegandi, Jesúsʼga bonadapi, degi, bukib-binsaedba ega oimaknadapi gusmalad. 
Jesús omegansik aibiridgua, amarga sogded: “Omegan-Jerusalénʼginmalad, mer anga be bomar. Na dukin be bomar, be-mimmiganga be bomar. 
Ibagan nonikoed, dulemar sogdamaloed: ‘Omegan-geg-mimmi-nikumaladgi ise-nued binsalesye. Omegan-gusgu-muu-neggi-geg-gurgin-nikumaladgi ise-nued binsalesye. Degi, omegan-mimmigan-onussurmaladgi ise-nued binsalesye,’ sogdamaloed. ‘Ar we-omegandi na-e-mimmiganba gwen wilegosulid.’ 
Geb degi, dulemar sabsur-wilenaidba yarmarga sogdemaloed: ‘¡Be anmargi batedage!’ Yar-mulluganga sogdemaloed: ‘¡Be anmar-omursunna!’ 
”Anbela an gwen-neg-oakalossulid-inigwele, weyob an-imaknanaid. Dule-neg-oakalosar-bulesunna, bur bule wiomalodo.” 
Suar-ibgan dule-isganamar-warbo oburgwemalaga Jesúsʼba semai gusmarbalid. 
Nonogarye-neg-nugadse mosmargu, agi nakrusgi Jesús-bioksamalad. Dulemar-isgana-warbogwad nakrusgi bioklesmarmogad. Wargwen, Jesús-argan-nuedsik ogwichismalad. Baiddi, Jesús-argan-sapiledsik ogwichismalad. 
Degi, Jesús sogded: “Bab-Dummad, we-dulemar isgussuliyob be dako, ar wissurmalad ibu imaknanai.” Degi, suar-ibgan Jesús-morgi dodoarmalad, wilubdaknai-guarmalad, igid-mor emargadga guodibeye. A-sorba, Jesús-mor mimismarsunnad. 
Degine, dulemar-bukidar neg-gunaid dakbukwa gusmalad. Ar neggwebur-dakmamaidi, Jesúsʼgi dodonai gusmalad, sogdedamalad: —Ar ede, dule-baigandi nabir bendaksad. Ar we Cristoʼle, Bab-Dummad-susadile, na dukin bendakdo. 
Amba suar-ibgan Jesúsʼgi dodonanai gusmarmogad. Geb gobega, vino-gagbid ega senonimalad, 
ega sogdemalad: —Ar be Judíoʼmar-e-Reyle, na be dukin bendakdo. 
Jesús-nakrus-birgi, Griego-gayaba, Latín-gayaba, degi, Hebreo-gayaba, weyob narmakar-nai gusad: 
Dule-isgana-wargwen, Jesús-dikarba-nakrusgi-biokar-naimogad, Jesúsʼgi isdar-sunmaknai gusmogad, ega sogded: —Ar be Bab-Dummad-dule-yoedse-barmidagoye-sogsad-dulesursi. Degite, na be dukin bendake. Be anmar-bendakmoga. 
Agine, nakrusgi-biokar-naid-baid, Jesúsʼgi-isdar-sunmaknaid-abin-imakded, ese uluded, ega sogded: —Ar Jesús-sunnaa be burgwe-sognaimogad. Degite, ¿be Bab-Dummad-dobsurde? 
Ar anmardi nabiridba wilenaid. Ar anmardi, ibmar-isgana-imaksadba odurdaklenaid. Ar we-duledi, gwen ibmar-isgana imaksasulid. 
Geb degi, Jesúsʼga sogded: —Be Reyga-negdakmaidgi-danikir, be an-insao. 
Geb degi, Jesús, abin-sogded: —Napira an bega soged, emi-ibagi Neg-Nued-naidgi be anba gudiguoed. 
Degine, yorukugusgua, bela napneggi negsichid nagusad, wachi-irbaase naigusad. 
Degine, dad-ibeler gwen bar gassulid. Jerusalénʼgi Bab-Dummadse-goled-neggi, Neg-Islidikid-irwa-mor-naid, negabar achirmakde gusad. 
Geb degi, Jesús binnasur goted, sogded: “Baba, be-argangi an-san-burba an uksun.” Deyob-sogsad-sorba, Jesús burgwided. 
Roma-sorda-dulatar-sediid (100), weyob-ibmar-gusad daksagu, Bab-Dummad-nug ogannoded, sogded: “Ar we-dule, dule-nueddaed-napiragwadid, gwen-ibmar-oakalossulid.” 
Bela dulemar-bukidar, Jesús nakrusgi-burgwenaid-dakbukmalad, bela we-ibmargan-gusad daksamargu, bela-bela na bukib binsadmalad, na dukin-dukin binasgargi sarsonanai negse nadmalad. 
Ar bela Jesús-mag-dakmaladi, degi, omegan-Galilea-akar-eba-bipirmakdimaladi, bannaba we-ibmar-gunaid-dakbukwa gusmalad. 
Deun, Judío-igar-nabiromalad-wargwen, Joséʼye-nugad mai-gusmogad. A-dulede, Arimatea-neggweburginedid, Judea-yala-dolad. José dakleargu, dule-nuedid, dule-igar-napiragwadbadaed-duled. 
We-dulede, Bab-Dummad-e-negdakmaid nue edarbedimogad-duled. Joséʼdi, Jesús-oburgweye sogsamaladba gwen naigussulid, degine, emar-ibmar-imaksamaladba gwen akassurbalid. 
We-dulede, Pilatoʼse nadegusad, Jesús-mui egisdapid. 
José, Jesús-nakrusgi-burgwar-naid odesgu, atued-sibugi nue-obipirmaksad. Geb degi, José akwa-gwisar neg-uanga-siid-yaba, yoo-dule-egi-diglegedgi Jesús-mesisad. 
Deun, a-ibagi, Ibmar-Guagwar-Sied-Ibad, bato obunnoged-iba warmakdanikid. 
Omegan-Galilea-akar-Jesúsʼba-danigusmalad, José-Arimatea-sorba nadegusmalad. Neg-uan-siid daksamalad, degi, Jesús-diglesad bia mesilesad daksamarbalid. 
Omegan negse-nonimargu, ina-biseb-wawaad, degine, gwallu-wawagwad-nuegan guagwar urbismalad, adi, Jesús-muigi eonamalagar. Geb degine, omegan Moisés-Igar-Maidba obunnoged-ibagi obunnosmarsunnad.