Juan.
13.
Jesús Oburgwilegoenad-Iba bane-nagudoed-iduar, Jerusalénʼgi gudiid. Jesús na wisid, we-napneggi-gudiid e-Babse-gannar-naed-ibagan ega warmaksad. Ar Jesús we-napneggi-e-sapingan-bukwad nue-sabsoggu, nue bela-bela-sabgudii, e-burgwedse gussunnad. 
Jesús, e-sapinganmala sedo mas-gunbukwagua, nia-saila, Simón-machi-Judas-Iscarioteʼgi, Jesús-darba-ukega, burba-isgana oubosad. 
Jesús wisid, e-Bab bela ibmar-imakega ega igar-uksad. Degine, Jesús wisbalid, na ede Bab-Dummadgi danikid. Degi, ede Bab-Dummadse gannar nabaloed. 
A-ulale, Jesús mas-gunsigua, gwisgus-imaksad. E-mordummad esusad. Geb uka-elied-susgua, e-sadergi edichad. 
Geb degi, Jesús e-sapingan-nag-enukega bormoyagi dii eosad. Geb degi, e-sapinganga nag-enukded, degi, uka-elied-e-sadergi-naidgi ega nag-odinnosbalid. 
Geb degi, Jesús Simón-Pedroʼse nonikid. Geb Pedro ega sokalid: —Dummad, ¿be anga nag enukode? Sulirgebed. Be anga nag enukosulid. 
Jesús, abin-sogded: —An-emi-ibmar-imaknaid aku amba be itoged. Geb sorba mag be itodapoed. 
Pedro, Jesúsʼga sogded: —Be an-nag enukosur guoed. Jesús, abin-sogded: —An bega nag-enuksulile, geg be an-sapinga gued. 
Geb degi, Simón-Pedro Jesúsʼga sogdesunnad: —Dummad, ar be deyob-sogele, an-nagbi be anga enukosulid. An-argan, an-nono be anga enukbalirgebed. 
Jesús, abin-sogded: —Ar dule-obsamalad bar obed abesulid. Unnila e-nagbi napi-enuked abeleged. Ar ade, bato swilidik gudiid. Bemar bato swilidik gudimalad. Degi-inigwele, bela bemar swilidiksurmalad. 
Ar ade, Jesús wisid doa darba e-ukoe. A-ulale, sogsagusad: “Bela bemar swilidiksurmarye.” 
Jesús, e-sapinganga nag-enuksad-sorba, gannar e-mor-yosgu, mesese gannar signonikid. Geb degi, e-sapinganga sokalid: —Bemarga an nag-enuksad, ¿mag be itomala, wede ibi obare? 
Ar bemar nabir Odurdaked-Sailaye, degine, Dummadye, anse be gormalad. Ar ani an adid. 
Ar ani an Dummadid, an Odurdaked-Sailabalid. Degite, an bemar-nag enuksad. Bemar deyobi, muchub-muchub nag na ga enukewilubmarmodo. 
An bemarga oyosad, adi, bemar an-bega-imaksamaladyobi, bemar imakegarmo. 
Napira an bemarga soged: Dule-maiga-arbaedi, e-dummadba geg dummad gued. Degine, dule-barmilenaid, gege e-dummad-barmisiidba bur dummad gued. 
Ar we-ibmar bemar bato wismarsoggu, bemar eba imakele, bemargi nued binsalegodo. 
”Bela bemargi an sogsulid. Ar an wisid doamar an susa. Degi-inigwele, Bab-Dummad-garda-narmaklegaledba-guegala, bemar-wargwen darba-an-ukoed. Ar Bab-Dummad-garda-narmaklegaledgi sognaid: ‘Ar dule anba madu gunsiidi, angi aibinnoniye, an-isdaradga gunoniye.’ 
”Deyob-guoed-iduar, an bemarga soged, adi, degi-gunonikile, bemar mag-itos-namalagar, ani an Cristo gued. 
Napira an bemarga soged: An dule-barmidoed abingamalale, an-abinganaid. Ar dule an-abinganaile, Bab-Dummad-an-barmialid-abinganamogad.” 
Jesús deyob-sogsad-sorba, e-ulubgi bukib-binsaded, degi, e-sapinganga sogdesunnad: —Napira an bemarga soged, bemar-wargwenadi darba an-ukoed. 
Geb degi, e-sapingan muchub-muchub dakdemalad, wissurmalad doagi Jesús degisoge. 
E-sapin-wargwen, Jesús na nue-sabedi, e-dikarba sii gusad. 
A-dulesega, Simón-Pedro arbak achasad, adi, a, Jesúsʼse egisega, doa-dulegi wede deyob soge. 
Degi, a-dule, Jesús-binasgargi biligwa-mai Jesúsʼga sogded: —Dummad, ¿doa-dule arbak be-ukoe? 
Jesús, abin-sogded: —Ar doa-dulega madu waraa an ukoe, a-dule, darba an-ukoed. Jesús madu-owardikusgu, Simón-machi-Judas-Iscarioteʼga a-madu uksad. 
Judas, madu-bipi-ega-uklesad guchagu, nia-saila-Satanás egi dognonikid. Geb degi, Jesús Judasʼga sogdesunnad: —Ibmar-be-imakoedi, gwae bur be imaknasun. 
Ar e-sapingan-mese-naba-bukmaladi aku-itosmalad, ibiga Jesús deyob Judasʼga soge. 
Ar abar binsadmalad, Judas mani-saboged-sagu-sedisoggu, Jesús Judasʼga sogdakleye: “Anmar-ibmar-ibaga-abegedi be baknaye.” Ar ega sogbardibe: “Wileganaga wis be mani uknaye.” 
Judas madu-guchagua, yog-noar imaksad. Nodgua, bato neg mutikid. 
Geb degine, Judas-naded-sorba Jesús sogdesunnad: —Ar emigindi ani Dule-Machi, an-nug odummolesunnoed. Degine, anba Bab-Dummad-e-nug odummolemogoed. 
Ar ani Dule-Machi, Bab-Dummad-nug an odummogele, Bab-Dummad an-nug odummomogoed. Degi, ar emiskwaa an-nug odummogoed. 
”Mimmigan, wis-ichesaar amba an bemar-abargi gudii guoed. Igi Judíoʼmarga an sogsa, deyob, an bemarga sogmarmogad. Be an-amimalo-inigwele, bemar an-amiosurmalad. An-naesokalidse, geg be anba namalad. 
”Igar-binid an bemarga ukmarsunnad. Na be muchub-muchub sabgumalo. Ar igi an be-sabgusmarmoga, deyob be muchub-muchub sabgumarmogo. 
Ar na be muchub-muchub nue sabgumalale, bela dulemar mag be-dakmaloed, bemar an-sapingan gumalad.” 
Simón-Pedro Jesúsʼga sogded: —Dummad, ¿bia be nae? Jesús, abin-sogded: —Emigindi, an-naesokalidse geg be anba nagweled. Sorbardi, geb be anse naoed. 
Pedro ega sogded: —Dummad, ¿ibiga emigindi geg an beba nae? An be-ular-burgwega guakwaa an gudiid. 
Jesús, abin-sogded: —¿Be an-ular-burgwega guakwaa gudii? Suli, be guakwaa gudisuli. Napira an bega soged: Gannir-namaked-iduar, ilapaa be an-osulogoed.