Juan.
18.
Jesús, Babga-wegi-ibmar-sogsad-sorbali, e-sapinganmala dian-Cedrónʼye-nugad-obakar nadegusad. We-dian-dikarba, sapimar, degi, dutumar digar-naid. Agi Jesús e-sapinganmala ambikudapid. 
Judas, darba-Jesús-uknaid, a-neg wismogad. Ar ade, gusgu Jesús e-sapinganmala ase ambikunad damalad. 
Degisoggu, Judas, a-negsega Roma-sordamar-idudani gusad. Eba danigusmarmogad, dule-irwa-Bab-Dummadse-gormalad-e-dummagan-sogedba, degi, Fariseoʼmar-sogedba suar-ibmala-nugsalesmalad. A-suar-ibmala, Judasʼba gwallu-yalaba, acha-gwallu-sedani, degi, es-suid-sedani, gusmalad. 
Ar Jesúsʼdi bela egi-ibmar-guoed wissoggu, dulemar-abin noalid. Ega sogded: —¿Doa be amimala? 
Abin-sogdemar: —Jesús-Nazaretʼgined an amimalad. Jesús, abin-sogded: —Ani an a-duled. Judas, darba-Jesús-uknaid, amar-abargi deun gwichi gusmogad. 
Jesús amarga sogsagu, ani an a-duleye, amar sorsik sikirmakdemalad, degi, napagi aimukudmalad. 
Jesús gannar amarse egisdebarsun: —¿Doa be amimala? Gannar amar, abin-sogdemar: —Jesús-Nazaretʼgined an amimalad. 
Jesús, abin-sogded: —An bega bato sogsamalad, ani an a-duleye. Be an-amimalale, nabirdo. An-sapingansedi mer be achamalo. Be naega imakmalo. 
Ar weyob gusdo, adi, Jesús-ibmar-sogsadba guega: “Be-anga-dulemar-uksadi, wargwensaar an oyoggussulid.” 
Degi, Simón-Pedro, es-suid-sediid e-uka-yaba-maid-onosgu, dule-irwa-Bab-Dummadse-gormalad-bur-dummad-e-mai naibi-imaksad. E-uaya-nuedsikid ibe siksad. A-maide, Malcoʼye nugad. 
Geb degi, Jesús, Pedroʼga sogded: —Be-es-suid e-uka-yaba be odoge. Bab anga dummad-naibiguoedi ina-gagbid-gobedyobi, anga-uknaidgi ¿an wilegosurde? Suli. An wilegergebed. 
Geb Roma-suar-ibedmar, e-dummad, degine, Judíoʼmar-Bab-Dummadse-goled-neg-suar-ibmala, Jesús-gasmarsunnad, edichamalad. 
Anásʼye-nugadse Jesús-sesmargweled. Anásʼde, Caifás-e-sakad. Caifásʼdi, a-birgagi, dule-irwa-Bab-Dummadse-gormalad-bur-dummadga maid. 
We-dule-Caifás, deun, Judíoʼmarga binsaed-uksadid, ega sogsagusad, dule-wargwen neggwebur-anar bur burgwer, nabirye. 
Simón-Pedro, degi, Jesús-sapin-wargwen, Jesús-sorba nadapgusmalad. We-sapin-wargwenad, dule-irwa-Bab-Dummadse-gormalad-bur-dummad mag daksoggu, dule-irwa-Bab-Dummadse-gormalad-bur-dummad-e-neg-imbase Jesúsʼba dogsamogad. 
Ar Pedroʼdi magaba yawagak-naba gwisgusad. We-sapin-wargwen, dule-irwa-Bab-Dummadse-gormalad-bur-dummad-mag-dakedi magaba gannar noalid, geb ome-yawagak-dakedbo-sunmaksagu, negyaba Pedro-odosad. 
Geb degi, ome-yawagak-dakedi, Pedroʼga sokalid: —¿Ar be Jesús-e-sapinmosursi? Pedro, abin-sogded: —Suli, an e-sapinsuli. 
Ar neg damberbasoggu, Bab-Dummadse-goled-e-dummad-maigan, degi, suar-ibmala-Bab-Dummadse-goled-neggi-arbamalad, soo ogasmalad. Amar soogi wabukmargu, Pedro soogi-wamogaga, amar-abargi gwichi gusmogad. 
Degidgine, dule-irwa-Bab-Dummadse-gormalad-bur-dummad, Jesúsʼse e-sapingan-egichialid, degi, e-igar-odurdakdiid ese egichiarbalid. 
Jesús, abin-sogded: —An-sunmaksadi bela bakar-buud dulemar-asabin an sunmaksad. An gusgu Judíoʼmar-onmakedneggi, degi, Bab-Dummadse-goled-neggi bia Judíoʼmar ambikunoni-daedgi, an dulemar-odurdaksad. An-sunmaksadi, dukuar an sunmaksasulid. 
¿Ar ibiga be anse egissunna? Dulemar-an-itosmaladse, be egise, igi an sunmaksa. Ar amar wisid, igi an sogsa. 
Jesús degisogsagua, Babse-goled-neg-daked-suar-ibed-wargwen, Jesús-walik-gwichidi, wagargi Jesús-bibyosgu, ega sogded: —¿Ar weyob dule-irwa-Babse-gormalad-bur-dummad abinsalesi? 
Jesús, abin-sogded: —An noar ibmar sogsale, be anga sogdo, ibigi noar an sogsa. An ibmar napira sogsardi, ¿ibiga be an-sarsosunna? 
Geb degi, Anás, Jesús-atinnar dule-irwa-Babse-gormalad-bur-dummad-Caifásʼse barmissunnad. 
Deunni, Pedroʼdi amba soo-naba-wagwichidgi ega sogdemalad: —¿Ar be Jesús-e-sapin-wargwenadmosursi? Degi, Pedro osuloded, abin-sogded: —Suli, an a-e-sapinsuli. 
Dule-irwa-Babse-gormalad-bur-dummad-mai-wargwen, dule Pedro-e-ibe-uaya-siksad-e-gwenad, Pedroʼga sokalid: —Sapimar-digar-naidgi, degi, dutumar-digar-naidgi, Jesúsʼba be gudii, ¿an be-daksasursi? 
Pedro gannar osulodbalid, geb agi gannir yog namakaled. 
Geb degi, Caifás-neggi-gunanai, Pilato-neg-Pretorioʼye-nugadse Jesús-sesmalad. Deun, bato oibodanisoggu, Judío-dummagan melle na ised-nikuegala, Pilato-negse dogsasurmalad. Ar dogele, ised-nikumalodole, degi, Judíoʼmar-ibagi sibad-wawaad gunmalosurdole. We-sibad-wawaad Oburgwilegoenad-Ibagi gundamalad. 
Degidbali, Pilato Judíoʼmarse nononisunnad, ega sogded: —Degite, ¿ibi-ular we-dulede be anse sedanimarsunna? ¿Ibi oakalossunna? 
Abin-sogdemar: —We dule-isganasulina, anmar bese sedanisulinad. 
Geb degi, Pilato Judío-dummaganga sogdesun: —Be we-dule nidmar, be-igar-maidba ega be igar amimalo. Judíoʼmar, abin-imakdemalad: —An geg ega igar amimalad. Bemar-Roma-dulemar anmarga igar uksasulid, dule-isgudimalad oburgodeeye. 
Jesús-ibmar-sogsadba-guega, deyob gusad, ar ade, sogsagusad, ede igi burgoe. 
Geb degi, Pilato e-neg-Pretorioʼye-nugadse gannar dogdebarsunnad, degi, Jesúsʼse gordapid, ega sogded: —¿Ar be Judíoʼmar-e-Rey-sunnadi? 
Jesús, abin-sogded: —¿Bee be, na be deyob soge? Igi, ¿dule-baid-bega-sogsadba be soge? 
Pilato, abin-sogded: —¿Judío-dule be an-daksi? Be-dulemar, degi, dule-irwa-Babse-gormalad-e-dummagan anga be-sedanimalad. ¿Ar ibu be oakalossunna? 
Jesús, abin-imakded: —An Reyga-meged-igar we-napnegginedsulid. An Reyga-megedi, we-napnegginedina, an-sordamar anbina urwemaloenad, adi, melle Judíoʼmarse an galegegar. Ar emigindi, an Reyga-megedi, we-napnegginedsulid. 
Geb degi, Pilato ega sogdesun: —Degisoggu, ¿be reysunde? Jesús, abin-sogded: —Ar bede soged, an reyye. Igar-napiragwadgi-sunmakega an gwalulesad. Agala an we-napnegse nonikid. Ar dule igar-napiragwad-sordale, an-gayaburba-soged itoged. 
Geb Pilato ega sogded: —¿Ar ibu igar-napiragwadsunna? Ar deyob Pilato Jesúsʼga sogsagu, gannar magaba Judíoʼmarse noalid, amarga sognonikid: —Ar we-dule gwen-ibmar-oakalos an daksulid. 
Ar bemar gusgu Oburgwilegoenad-Ibagi, dule-wargwen-esgaryagi-mellesiid bega onogega be anse egisdamarsoggu, ¿an bemarga Judíoʼmar-e-Rey-onobi be abemala? 
Geb degi, bela gannar binnasur gotemarbalid, sogdemalad: —Suli, we-duledi suli. Anmarga be Barrabás onoge. Barrabásʼdina, atursaed-duled.