1 Pedro.
3.
Ar amba deyobmo, omegan, bemar be-sui-urbaligwa be nanamar. Deyobile, be-sui-Bab-Dummad-Gayaburba-abingabisulile, ega be sunmakedba, bur be-daedba Bab-Dummadba nagumaloed. 
Be-sui nue-innikii-nanae be-dakdagoed, egi nue-binsaed-nikaa-nanae be-dakdagoed. Abali, Bab-Dummad-Gayaburba abingaoed. 
Omegan, bemar nue-yeerdakle-guegala, we asgi ise-nudakar imakedginsulid, sailagia ise-nudakar imakedginsulid, ormar-nasikedginsulid, degi, mormar-gargemalad-yoedginsulid. 
Be-yeerdakleged-napiragwad be-gwage-ulubgi siid. We-yeerdakleged-napiragwaddi geg bergued. We, yeer-itogedgi-ibmar-imakedid, urwedgi ibmar imaksulidid. We, degidaedi, Bab-Dummadga bur ibi-nuedid. 
Ar epenne weyobi omegan-ulubgi-nue-Bab-Dummadba-akanai-gusmaladi, gudigusmarmogad, gwen Bab-Dummad-bengussurmalad. Amar na e-sui-sogedba ibmar-imakdii gusmalad. 
Sara be dakena, na e-sui-Abraham-sogedba ibmar-imakdii gusad. E-suise an-dummadye na gordii gusad. Emigindi, be ibmar-nuegan imakmalar, degine, dobsulidba be nanamalar, a-e-sisganga be gunonimaloed. 
Bemar, macherganmo, be-omegangi be nue-binsaed-nikaa-nanadii imakmarmo. Be-ome be nue akwemar, ar omegan anmarba bur nollogwad. Degi-inigwele, Bab-Dummad amba amarga anmar-sunnaa burba-geg-bergued ega uksamogad. Degisoggu, be-ome-e-nug-odummodii be nanamar. Adi, bemar Bab-Dummadse-gotele, Bab-Dummad be-itomalagar. 
Deginbali, napi an bemarga sogsun: Bela na be emarbi binsabukwa gumar, wile na be dakmaladba, na be muchub-muchub-bendakbukwa gumar, gwenatigwar na be nue sabgumar, wile na be dakmar, aigwar na be nanamar. 
Dule ibmar-isgana begi imaksale, mer abin ibmar-isgana be imako. Dule be-ukabsasale, mer abin imako, bur ibmar-nued ega be uke. Ar bemar wisid, Bab-Dummad bese gochamaladi, be-susmaladi, bega ibmar-nuegan ukegalad. 
Ar ade, Bab-Dummad-Gardagi sognaid: “Na dule nued-gudii gubiele, iba-nuegangi weligwar nanadii gubiele, ibmar-isganagi-sunmakedgi na e-gwabin bargaergebed. E-gaya na gakangi sunmaksuli guergebed. 
We-dule ibmar-isganagi banguergebed, ibmar-nued imakergebed. Ulubgi-bogidik-itoged bur amiergebed, aba bur nanadii guergebed. 
Ar ade, Bab-Dummad dule-gwage-swilidikid-nue-akwedaed, wemar-ese-goled nue itodaed. Ar dule-ibmar-isgana-imakmaladgindina, egi yoleged.” 
Ar bemar ibmar-nueganbi imakdiile, ¿doa-dule bemar-oakalogosunna? Geg be-oakalomala. 
Ar be igar-innikii-maidba-nanaed-ular, dulemar be-wiodiile, begi nued binsalesdo. “Melle be we-dulemar-ibmar-dobedi dobgumalo, melle be gwayebalo.” 
Bur be-gwagegi be sogmar, we-Cristoʼbi an-Dummadye. Ar dulemar bela bese egichialir, ibiga be Cristoʼgi-bensulidba degisadegu-dulagudigued be edarbedimarye. Amar-abinsaega be guagwar-gudii imakmar. 
Be a-dulemar-abin-imakder, mer na san-odummogar be sunmako. Nue na san-bargaagwar be a-dulemar abinsaoed. Ulubgi-gwen-isgudisuli-itogedgi be abin-imako, adi, be Cristo-sorda-guedgi dulemar-begi-binsa-gakansaar-sunmakmalad obingegsaegar. 
Ar ibmar-nued-saed-ular be-wioarmalar, we bur nuedid, ibmar-isgana-saed-ular be wiomaladba. Ar Bab-Dummad deyob abegele, nueddo. 
Ar Cristo unnila irgwennaa anmar-isgued-anar burgwisad. Cristo-dule-gwage-swilidikid, dulemar-isgana-anar burgwisad, adi, Bab-Dummadse dulemar-nidegar. Napiragwad. Cristo sanar burgwisad. Bab-Burba gannar-dulagudiguega Cristo-imaknonikid. 
Cristo burbale nadegusad, geb burbamar-galugi-gales-bukmaladga sunmakapid. 
Ar wemar, epenne Noé-ibagangi, Noé-ur-dummad-sobnaigusgu, Bab-Dummad-igarba gwen nanassurmalad. Bab-Dummad we-dulemar a-urse-doged-edarbedii gusad. Deunni, unnila e-walabaabak (8), muu-mulusadba san-onos gusmalad. 
Igi Bab-diigi-ogleged emi anmar-abonomogadyobi, we-Noé-ibagangi-dii-mulusad anmarga abonoleged-e-wilubga gunaid. We-anmar-abonolegedi, Jesucristo-gannar-durgusadgi anmar isguedgi abonolesimalad. (Ar diigi-ogleged anmar-sangi ibmar-isgana-naid elisulid. Unnila Bab-Dummadsik-nued-binsaega anmar-imaknonidaed). 
Ar emigi Cristo nibnegse-nadedgi, Bab-Dummad-argan-nuedsik sigidapid. Cristo bela wemargi obinnonikid: Baliwiturmargi, sailagan-burbarmaladgi, burbar-gangued-nikamaladgi obinnonikid. Degisoggu, bela wemar Cristo-sogedba-nanae gunonimarsunnad.