1 Tai pefine a'i lai nomo ma'e marepi erasi a'i tote wawesiyenamisiya. Serai nomo eimane lo henerai. Pefine a'i, nomo Owane Sitewi lo eimane henerai tepa'asiye. Lu taune omo omo werese sahe, lowe Owane Sitewi lo marepi tote umasi ta'ame. Serai lowe lai etiri ape so'oru ta'ama. Nomo Owane Sitewi lo eimane pefine a'i ne. [Jo 1:12-13; 16:3] 2 Kaiyemo mo ano! Nowe pereye a'i nomo Owane Sitewi lo eimane henerai. Sosu nowe ye'ewi su, nomo piye henerairowa awere? Nomo so'oru ta'ama. Ahowa, sosu etiri ta nomo so'oruwesiya. Krais si tame itoraiyei su, nomo le siyerowa. Serai nowe ape se nomo le wou aiwawe a'i heneraiyei. Sosu marepi hepene nomo lo wara'i a'i henerairowa. [2 Ko 3:18] 3 Lu taune werese Krais lo marepi tote umasiyei su, lowe marepi lowe lo wara'i a'i, Krais aiwawe a'i, irosiya. Krais lai yo seni wara'i pefine a'i ne.

4 Lu taune yo seni luwaru a'i irowei su, le Owane Sitewi lo yo peri arisiyei. Pefine a'i, yo seni luwaru a'i ape Owane Sitewi lo yo peri ma'e ai atu tiyatisiya. 5 Ahowa, fene etiri ape so'oruwesiya. Krais hi awei ma'e yo seni luwaru a'i au sasari pamoweyei ne itorai. Krais lo marepi hepene papu irosiya ape, yo seni luwaru a'i irorowata. [Jo 1:29; 1 Pi 2:22-24] 6 Lu taune tamo Jisas lo marepi umasisiya su, lowe yo seni luwaru a'i ironamirowata. Lu taune yo seni luwaru a'i ironamiteyei su, lowe Jisas ne tote umasi ta'ame. Sosu le ne wanu so'oru ta'ama.

7 Kaiyemo mo ano, Weiyai! Lu taune tamo marepi fene lo owe ape tatai anite. Krais lai yo seni wara'i a'i tene! Serai lu taune tamo yo seni farere a'i irowei su, marepi lowe lo wara'i a'i ne. 8 Sepei luwaru a'i pefine a'i, Satan, tu naifa weriyei weriyei yo seni luwaru a'i ironamiteye. Serai lu taune tamo yo seni luwaru a'i ironamiyei su, le Satan ma'e fai. Sosu Owane Sitewi lo meni eime itorai su, le a'i lai sepei Satan lo wiyawi au ani luwaruwe po'uteyei ne itorai. [Jo 8:44] 9 Owane Sitewi lo meni eime lai lu taune papu irowei su, lowe Owane Sitewi lo eimane pefine a'i heneraiyei. Marepi hepene he'i a'i lowe lo, Owane Sitewi lowe ma'e auwe ape, marepi hepene weriyei weriyei ironamitorowa. Serai le yo seni luwaru a'i irorowata. Lu taune tamo Owane Sitewi lo eimane henerai su, lowe yo seni luwaru a'i irorowata. [1 Jo 5:18] 10 Lu taune tamo Owane Sitewi lo eimane heneraiyei su, eiwerai lowe so'oruweyei awere? Aiwawe lu taune tamo sepei luwaru pefine a'i, Satan lo eimane henerai su, eiwerai lowe so'oruweyei awere? Peri ano wanure! Lu taune tamo yo seni luwaru a'i ironamisiya su, lowe Owane Sitewi lo eimane ta'ama. Sosu aiwawe a'i, lu taune tamo Owane Sitewi lo lu feni marepi erasi a'i tote wawesiyenami ta'ame su, lowe Owane Sitewi lo eimane ta'ama.

11 Tu naifa weriyei peri ta, fene wanuwe ape apou a'i te'esiya, “Nomo lu taune werese ma'e marepi erasi a'i tote wawesiye tiyatite.” [Jo 13:34] 12 Fene meni Kein lo yo seni owe ape umasire. Sepei Satan meni ape ya'oreye. Serai le pa'ise topo lo aine tera'eye. Piyene le pa'ise topo lo aine tera'eye awere? Wanure! Meni ape lo pa'ise yo seni farere a'i irowe. Sosu Kein lo marepi le ma'e tote luwaruweye. Serai le pa'ise lo aine tera'eye. [Stt 4:8] 13 Kaiyemo mo lu taune werese marepi luwaru a'i fene ne toteyei. Fene owe ape hepene se su'arite. [Jo 5:18-19] 14 Nomo lu taune werese ma'e, Krais lo marepi umasisiya ape, marepi erasi a'i tote wawesiyeteyei su, fene nomo aiwawe etiri ta so'oruwesiya. Hepene nomo lo temeniyerowata. Ahowa, marepi hepene nomo lo norohu mi mi pasi pasi weriyei ironamitorowa. Lu taune tamo marepi erasi a'i tote wawesiye ta'ame su, lowe hepene lowe lo temeniyerowa. [Jo 5:24] 15 Lu taune tamo tiyati ma'e ai marepi totenamiteyei su, lowe aine tera'eyei siye lu wou a'i ne. Sosu fene etiri ape so'oruwesiya. Lu taune tamo meni ta aine tera'eyei su, lowe marepi hepene he'i a'i weriyei weriyei irotorowata. [KTH 21:8]

16 Marepi erasi a'i tote wawesiyesiya ape, ape piye awere? Wanure! Ane fene ma'e au te'esiya. Meni ape Jisas Krais le nomo ne au temeniyeye. Serai nomo a'i lai kaiyemo mo nomo lo ne aiwawe a'i temeniyeyei. [Jo 13:1; Ga 1:4] 17 Meni ta etiri ma'aru tomu ne'ese irosiya. Sosu le meni tere'e ta etiri ma'aru ariye a'i se siyesiya. Meni ape lai meni tere'e ape au pati feraferei ta'ame su, meni ape Owane Sitewi lo marepi tote wawesiyeyei topo le papu iro ta'ame. [Lo 15:7] 18 Eimane ano, fene lu taune tiyati ma'e marepi erasi a'i tote wawesiyeyei su, fene peri ta ahi se owe ape toteyei. Ahowa, fene marepi erasi a'i tote wawesiyeyei su, fene lowe ma'e peri pefine a'i, sosu aiwawe a'i yo seni wisere a'i au irowei. [Je 2:15-16] 19-20 Nomo lu taune tiyati ma'e tote wawesiyenamisiya su, nomo etiri ape so'oruwesiya. Nomo Owane Sitewi lo marepi pefine a'i papu ironamisiya. Nomo yo seni luwaru a'i irowei su, marepi nomo lo orese a'i teriteyei. Ahowa, Owane Sitewi lai marepi fetaneye a'i nomo ma'e aurowa. Owane Sitewi lai marepi nomo lo ne erasi a'i totenamisiya. Sosu le etiri werese siye so'oruwesiya.

21 Kaiyemo mo ano, nomo apou a'i toteyei su, “Nomo yo seni luwaru a'i iro ta'ame.” Nomo fara'u Owane Sitewi ma'e aiyeyei. Nomo le ne marepi atoweiye a'i tote ta'ame. [Hi 4:16] 22 Nomo Owane Sitewi lo peri wanu umasiyei su, le etiri werese, nomo le ma'e te'e toweriye ape, nomo ma'e aurowa. Nomo yo seni farere a'i irowei su, Owane Sitewi lai nomo ne au wisereye nine'irowa. 23 Sosu a'i pe peri ano wanure! Owane Sitewi lo peri kairefi a'i apou a'i te'esiya. Fene werese Owane Sitewi lo meni eime ne, Jisas Krais, tote tawesite. Sosu aiwawe fene lu taune werese tiyati ma'e marepi erasi a'i tote wawesiyenamite. Peri hesi a'i ape Owane Sitewi lai nomo ma'e au te'eye. [Jo 6:29; 13:34] 24 Lu taune tamo Owane Sitewi lo peri kairefi a'i wanu umasiyei su, lowe le papu ironamiyei. Sosu aiwawe a'i Owane Sitewi lai lowe papu ironamiyei. Nomo apou a'i so'oruwesiya. Owane Sitewi lai Hepene Wara'i lo nomo ma'e ausai. Serai Owane Sitewi nomo papu ironamisiya su, le Hepene Wara'i a'i lo nomo ma'e eimawe arosai. Hepene Wara'i a'i lo nomo ma'e au atuatu areiyerowa. [1 Jo 4:13]