1 Ka꞉leisia wanda꞉halio ikita꞉ you hoeta꞉la꞉ pate ya꞉la꞉me. Epima꞉ hoeyao pa꞉la꞉pe. Mo hande Yesu Ketiso ti manda homeeketa꞉ ikana꞉ma꞉ ika꞉ lekema꞉ handa honema꞉ kone pikisa leke muemena꞉yeke ya pima꞉ ota꞉ tikitiki la kua꞉me. 2 Ameta꞉ ya lota꞉ pitoloeki homeke doma꞉ ikana꞉ma꞉ hombo peape. Ikana꞉ma꞉ Koda꞉na꞉ Sipitidita꞉ mo pi ula꞉eki manuma꞉ pea꞉peke ala꞉eki opua pimi ekima꞉ mimipe o mo pi seliapo opua koto pi pa꞉ta꞉ hone tulaeme ekima꞉ mimipe. 3 Ekipa do pamba꞉ na piki hau pea pelemepe. Ika꞉ Ketiso pa꞉ta꞉ da꞉ta haleme ekita꞉ Koda꞉na꞉ Sipitidina꞉ welema꞉ kini peaeyeke yekepate pa ameta꞉ ikana꞉ma꞉ ika꞉ lokena꞉ welema꞉ pu paeyaalimikipe. 4 Holi Sipitidina꞉ welema꞉ pua꞉tiki pu haeme hau manuta꞉ pa ekie hone witemepe. Dia꞉me. Ota꞉ hau teke wala꞉la꞉me hone witolome. 5 Ikana꞉ma꞉ mo pi ula꞉eki manuma꞉ pea꞉pa꞉peke ala꞉eki opua puemena꞉yeke handa Koda꞉ma꞉ ipika꞉ Sipitidi iki pa꞉ta꞉ kiaata꞉ mo na handeke haumanu iki pa꞉ta꞉ peao hala꞉pe o mo pi seliapo opua hone tulaamena꞉yeke handa kutu pu hala꞉pe.

6 Mo hande Eipoloha꞉ma꞉ pa꞉ta꞉ pieke hau hone umana꞉e. Mo Baiboloma꞉ alota꞉

10 Epi amedama꞉ mo Lo Pi ula꞉eki pitolo ekima꞉ta꞉ I̱ ana꞉na꞉ epeaalieke laa hone ti laeya꞉ka꞉na꞉ta꞉ kota꞉ ipikita꞉ mo Koda꞉na꞉ esihou pi oto pa꞉ta꞉ hala꞉me. Kota꞉ mo Baiboloma꞉ alota꞉ Epima꞉ mo wape pea ula꞉ pi ula꞉eki paeyao ota꞉ tana꞉ paeyaona꞉ opua na pu haya꞉ka꞉na꞉ta꞉ kota꞉ koto some epita꞉ Koda꞉ ipika꞉ esihou pi yu wia hala꞉eki oto pa꞉ta꞉ hala꞉me ala꞉me. 11  Koto ekita꞉ mo Baiboloma꞉ dupa la꞉la꞉me. Hali epima꞉ ipika꞉ Koda꞉ pa꞉ta꞉ hone tulaleme ekina꞉ Koda꞉ma꞉ epeao ipiki yaapo haena꞉ lea꞉ka꞉na꞉ta꞉ koto ekima꞉ homeke da꞉ta halieke la꞉la꞉eki opuata꞉ do hone wita꞉la꞉ ekita꞉ niki pa꞉ta꞉ ota꞉ peneme ya꞉la꞉me. Ma꞉nda꞉ epita꞉ mo pi ula꞉eki pu haleme ekina꞉ Koda꞉ma꞉ epeao ipiki yaapo haena꞉ na lea꞉ka꞉ta꞉me. 12 Pi ula꞉ ekima꞉ pita꞉la꞉ hau pita꞉ Koda꞉ pa꞉ta꞉ hone tulaasa꞉ hau yaapota꞉ ota꞉ mandake na pelepeme. Koto pa꞉la꞉ ekima꞉ta꞉ mo Baiboloma꞉ alota꞉ Hali epima꞉ mo pi ula꞉eki paeyao homeke a꞉nda꞉ na mina꞉pa꞉lake pu haya꞉ka꞉na꞉ta꞉ koto someta꞉ da꞉ta halieke ala꞉me.

13 Hali epima꞉ ti manda endiaeya꞉ka꞉na꞉ta꞉ kota꞉ koto halita꞉ Koda꞉na꞉ esihou pi la꞉la꞉eki oto pa꞉ta꞉ hala꞉me mo Baibolona꞉ wape pea ula꞉ tupa꞉ Ketisoma꞉ mo pi ula꞉ ekina꞉ esihou pi niki pa꞉ta꞉ a꞉paama꞉na꞉yeke ipikana꞉ma꞉ nika꞉ anketeke mieke handaata꞉ mo esihou pita꞉ ipiki pa꞉ta꞉ yapeekeme. 14 Kutu pieke ekita꞉ mo hande Eipoloha꞉ma꞉ pa꞉ta꞉ Neke tamba꞉ mulueke laa la꞉ wieke pima꞉ta꞉ Yesu Ketiso pa꞉ta꞉ yama꞉ mo Diendaili wanda꞉hali make tamba꞉ meaata꞉ kota꞉ niki make Koda꞉ pa꞉ta꞉ hone tulaaso hata꞉ ipika꞉ pi la꞉ wia꞉ Sipitidi miomono piekeme.

15 Kame tonuo. Ameta꞉ I̱ma꞉ mo hande nate paeyao pu haloma꞉ hau ma꞉nda꞉ minolome. Hali yaapoma꞉ hau ma꞉nda꞉ puluekema꞉ dupupana꞉e laa pi la꞉ witolo hata꞉ toopi mini pika꞉na꞉ta꞉ ipilika꞉ ipilika꞉ kone ma꞉nda꞉ma꞉ koto pi la꞉ witelepeeki tunkula make hau ma꞉nda꞉ na apa꞉taapeke yelieke. 16 Koda꞉ma꞉ make koto tupa꞉ kone Eipoloha꞉ma꞉ pa꞉ta꞉ make ipika꞉ hoki nane epolo pieke hali pa꞉ta꞉ make ipika꞉ pi la꞉ wita꞉la꞉eki manuma꞉ la꞉ wiekeme. Baiboloma꞉ hoki nane epolo pieke haliweki ala꞉ pina꞉ teketa꞉ haliweki eleke eleke laa na ala꞉pate pa hoki nane epolo pieke hali ala꞉ pina꞉ teketa꞉ hali homeke homeke la ala꞉me. Mo koto hali bikita꞉ Ketisoe. 17 I̱ma꞉ do alo pina꞉ teketa꞉ Koda꞉ma꞉ Eipoloha꞉ma꞉ yaapo homeke hone witolo hata꞉ ota꞉ handeteke halueke laa Eipoloha꞉ma꞉ pa꞉ta꞉ pi la꞉ wiekeme. Koto ekina꞉ mo hande 430 bapi wetepeta꞉ Koda꞉ma꞉ Mosesi pa꞉ta꞉ haleeke pi ula꞉eki manuma꞉ mo amba꞉ Eipoloha꞉ma꞉ pa꞉ta꞉ la꞉ wieke pita꞉ ota꞉ na yambolo na paeyao pea꞉peke yeekeme. 18 Mo hande Koda꞉ ipika꞉ kita꞉la꞉ ale mea꞉peke teketa꞉ mo hande Lo Pi ula꞉ ekimanu pea mea꞉peke ya꞉ka꞉na꞉ta꞉ kota꞉ kotota꞉ mo Koda꞉ma꞉ la꞉ witolo hata꞉ kulueke laa la꞉ wiekeeki tekena꞉ na pitememe. Pate Koda꞉ma꞉ Eipoloha꞉ma꞉ pa꞉ta꞉ta꞉ pi la꞉ wiekeeki pa꞉ta꞉ yama꞉ haleekeme.

19 Kutu pia꞉ka꞉na꞉ta꞉ kota꞉ mo hande Mosesina꞉ pi ula꞉ ekita꞉ eki pina꞉ la haleekepe. Koto pi ula꞉eki manuta꞉ mo amba꞉ Koda꞉na꞉ la꞉ wiekeeki taapuna꞉ apa꞉tao wiki hauta꞉ mo hoke hoke haumanu peneme yao waluekema꞉ wiekeme. Koto pi ula꞉eki manuta꞉ pa u pelia pua mo hande Eipoloha꞉ma꞉na꞉ hoki nane epolo pieke hali ipikita꞉ Koda꞉ma꞉ amba꞉ pi la꞉ wieke hali opolo ipuluta꞉ paeyaena꞉e. Mo Lo Pi ula꞉eki manuta꞉ homeke hali ka꞉pa pa꞉ta꞉ yama꞉ enisolo tonuma꞉ hala꞉niaeyekeme. 20 Pate homekena꞉ pi laluekema꞉ ka꞉pa hali hata꞉ e pokaapeke na ya꞉la꞉me. Kutupa Koda꞉ ipikita꞉ ota꞉ homeke hala꞉me.

21 Koto alo ekina꞉ta꞉ mo pi ula꞉eki manuma꞉ta꞉ mo Koda꞉na꞉ pi la꞉ ula꞉eki hoeyaaluekema꞉ wia pa꞉la꞉pe. Dia꞉me. Ota꞉ dia꞉me. Mo pi ula꞉eki homekema꞉ wanda꞉hali da꞉taapeke ya꞉ka꞉na꞉ yoluta꞉ kota꞉ kotota꞉ paeyaoma꞉ koto pi ula꞉eki opua miniki hata꞉ Koda꞉ yaapo tikitiki halo pimipate 22 pa mo Baiboloma꞉ alota꞉ kenke paeyaota꞉ hoke hauna꞉ wele oto pa꞉ta꞉ ula꞉me ala꞉me. Koto ekina꞉ Koda꞉ma꞉ mo Yesu Ketiso pa꞉ta꞉ hone tulalemeeki tekena꞉ta꞉ I̱ma꞉ kulueke laa la꞉ ua꞉ ekita꞉ mo hone tulaaso haleme wanda꞉hali pa꞉ta꞉ halo hala꞉me.

23 Amba꞉ mo hande hone tulaasa꞉ ekina꞉ nate a̱i̱ na epea꞉ toma꞉na꞉ta꞉ mo Lo Pi ula꞉eki manuma꞉ niki paeyao dipula mea mo koto epolo pa꞉la꞉ hone tulaasa꞉eki peneme yaena꞉ ho̱linda꞉ pu pamba haya꞉me. 24 Koto ekina꞉ mo hone tulaasa꞉ hau pa꞉ta꞉ yama꞉ Koda꞉ yaapo tikitiki yao hamono mo Lo Pi ula꞉ ekima꞉ niki handeteke hatiki puaata꞉ Ketiso ipulu kinaeyekeme. 25 Kota꞉ ameta꞉ mo hone tulaasa꞉ ekina꞉ nate opolo a꞉pa꞉leke handaata꞉ mo Lo Pi ula꞉eki manuma꞉ niki pa na handeteke hala꞉me.

26 Iki paeyaota꞉ hone tulaasa꞉eki pa꞉ta꞉ yama꞉ Yesu Ketiso ame̱le̱ apa꞉tao Koda꞉na꞉ wekiwandiki halememe. 27 Ikana꞉ma꞉ Ketiso ame̱le̱ ta꞉ma꞉ni pea hamena꞉yeke bapitaisi peaya꞉me. Koto ekina꞉ta꞉ ameta꞉ ikana꞉ma꞉ Ketisona꞉ da꞉taasa꞉ ekita꞉ aka꞉ leke pambao halememe. 28 Koto pa꞉la꞉ ekima꞉ta꞉ kota꞉ mo Diu tapake pita꞉ Diendaili tapake yaapo make ata꞉ka꞉ na pu mo e handeteke hala꞉ haliweki pita꞉ e pokaasa꞉ haliweki yaapo make ata꞉ka꞉ na pu mo wanda꞉ pita꞉ hali yaapo make ata꞉ka꞉ na pu piki iki paeyaota꞉ Yesu Ketiso ame̱le̱ apa꞉tao ota꞉ homeke tapake halememe. 29 Ikita꞉ Ketiso ipika꞉eki haemeka꞉na꞉ta꞉ kota꞉ ikita꞉ mo Eipoloha꞉ma꞉na꞉ hoki nane wanda꞉hali hata꞉ Koda꞉na꞉ kulueke laa pi la꞉ wiekeeki milimikie.