1 Aisa꞉kema꞉ Dieikope wi la ta꞉na꞉ma꞉ homa alota꞉ Keinani wanda꞉ ma꞉nda꞉ na mia꞉peke. 2 Kotoeki na pikita꞉ mo naka꞉ mei Beduelona꞉ da kenke Mesopoteimia nane pua mo naka꞉ awa꞉ Leibenina꞉ waneke tonu ma꞉nda꞉ hondo mea꞉peke. 3 Kutupa neketa꞉ tutu eleke elekena꞉ apa꞉ halena꞉ yeke mo Aneke Wele Wopupiki Koda꞉ma꞉ naka꞉ wanda꞉ milipi pa꞉ta꞉ neke epeaaso hata꞉ wekiwandiki wopu kina꞉e. 4 Kutupa ipikana꞉ma꞉ta꞉ Eipoloha꞉ma꞉ epeaaso pia꞉ tupa꞉ neke make naka꞉ monduma꞉ monduma꞉ pilipi wekiwandikina꞉ wekiwandiki paeyao epeaena꞉e. Kutupa make do neke hae kenketa꞉ mo Koda꞉ma꞉ mo Eipoloha꞉ma꞉ halea꞉ kenke ya꞉la꞉ ekina꞉ nakana꞉ma꞉ muelena꞉e. 5 Kutupa Aisa꞉kema꞉ Dieikopeta꞉ mo Iso pita꞉ Dieikope yaapona꞉ inkiki Lepekana꞉ beliki A꞉ta꞉mia hali Bedueloma꞉ mondu wieke hali Leibeni hayeke alena꞉ mo Mesopoteimia nane pena꞉ tapaeyekeme.

6 Aisa꞉kema꞉ta꞉ Dieikope epeao mo Mesopoteimia nane wanda꞉ weilu pena꞉ tapaeyekeeki Isoma꞉ opiekeme. Kutupa make Aisa꞉kema꞉ mo weki epeaaso hata꞉ Keinani wanda꞉ ma꞉nda꞉ ota꞉ na mea꞉peke leekeeki opiekeme. 7 Kutupa make Dieikopema꞉ta꞉ ipika꞉ apa꞉ ama꞉ yaapona꞉ pi opua Mesopoteimia nane amba꞉ peekeeki opiekeme. 8 Koto opiekeeki manuma꞉ta꞉ ipika꞉ atekema꞉ mo Keinani wanda꞉weki ota꞉ kiayekeeki hando hao 9 Isoma꞉ta꞉ mo Eipoloha꞉ma꞉na꞉ eiyeke Isima꞉elona꞉ waneke Mahala꞉di mulu peekeme. Mahala꞉dita꞉ Nebeiotona꞉ beliki yekeme.

10 Dieikopeta꞉ Biasiba mina꞉pa꞉lao Hatani poluekema꞉ peekeme. 11 Nate pambolo pulu haena꞉ta꞉ ale ma꞉nda꞉na꞉ opolo a꞉paata꞉ koto pa꞉ta꞉ peliekeme. Ipikita꞉ mo toopina꞉ ka꞉nda꞉ lia polueke alo polu holepeekeme. 12 Kutupa upa pitolota꞉ pota꞉ lapa꞉ ma꞉nda꞉ kenkena꞉ wia a꞉pa yotuao oli ya nane pekeeki handeekeme. Mo pota꞉ lapa꞉na꞉ta꞉ enisolomanu olina꞉ pua꞉tiki onina꞉ hola꞉pa꞉tiki pimikieki handeekeme. 13 Kutupa mo Tekehalita꞉ ipiki teke pa꞉ta꞉ a꞉pa hata꞉ alota꞉ I̱ta꞉ mo Eipoloha꞉ma꞉ pita꞉ Aisa꞉ke yaapona꞉ Tekehali Koda꞉e. I̱ma꞉ta꞉ do neke pelipa꞉lia hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. 14 Ikita꞉ do kenkena꞉ ula꞉ na yata꞉pea꞉peke ya꞉la꞉ dokolo paeyaoma꞉ handilimikie. Ikita꞉ ika꞉ da kenketa꞉ do kenke nepoko paeyao pa꞉ta꞉ putupolo baalieke. I̱ma꞉ta꞉ neke pa꞉ta꞉ yama꞉ make naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ make tutu paeyao epealueke. 15 Niminalo pele ekita꞉ dupae. I̱ta꞉ neke yaapo mandakena꞉ hata꞉ hane pekena꞉ make neke handeteke halueke. Kutupa neketa꞉ do kenke pa꞉ta꞉ paa hatuku ipulueke. I̱ma꞉ta꞉ mo pi la꞉ ulueki paeyaaluekema꞉ta꞉ neketa꞉ na mina꞉pa꞉lalueke leekeme.

16 Dieikopema꞉ u tiao alota꞉ Mo Tekehalita꞉ do haya꞉ka꞉ta꞉me. Ipikita꞉ do pate haena꞉ kone hone na wia pua꞉ka꞉ta꞉me leekeme. 17 Kutupa ipikita꞉ pala꞉ haaso hata꞉ alota꞉ Dota꞉ ota꞉ paala꞉piki alena꞉e laata꞉ Koda꞉na꞉ da yalo pa꞉la꞉me. Oli hepeni nane pula꞉ pota꞉ kake lomba꞉la꞉ alena꞉ yalo pa꞉la꞉me leekeme.

18 Kutupa ota꞉ da ka꞉la꞉paaso siki Dieikope tiao mo ipika꞉ hande ka꞉nda꞉ lia pelieke toopita꞉ hone u tialo piekeeki mea nokopeekeme. Kutupa mo toopi mandata꞉ olipi oeta holaa alota꞉ Dota꞉ Koda꞉na꞉ ekie leekeme. 19 Kutupa koto pateta꞉ Bedele leekeme. Koto pateta꞉ amba꞉ta꞉ Lusu lemeke alena꞉e. 20 Kutupa Dieikopema꞉ Tekehali pa꞉ta꞉ pi la꞉ witolo alota꞉ Kota꞉ neketa꞉ I̱ yaapo haeka꞉na꞉ta꞉ kota꞉ mo I̱ pulu pota꞉ kimisuta꞉ nakana꞉ma꞉ handeteke hao ne make aka꞉ make kika꞉na꞉ta꞉ 21 kutupa I̱ paa yaka apa꞉na꞉ da nane epeke tupa꞉ la꞉ka꞉la yapono leka꞉na꞉ta꞉ kota꞉ neketa꞉ yaka Koda꞉ yelieke. 22 Kutupa do paa hone ua꞉tiki poluekema꞉ nokopolo toopita꞉ mo neke pa꞉ta꞉ panda꞉puniao yeiya꞉ lalo polo alena꞉e. Kutupa I̱ma꞉ta꞉ mo I̱ kilipi ale paeyaota꞉ putupa kiki homekena꞉ mandane tonkoputa꞉ yaka minolo homeketa꞉ neke kulueke leekeme.