1 Mo hande Isima꞉elo tapakema꞉ta꞉ Idiepi nane Diosepe hatuku pua mo kinina꞉ da handeteke haena꞉ leeke amina꞉ you some ma꞉nda꞉ Podipa pa꞉ta꞉ tapaemekeme. 2 Mo Tekehalita꞉ Diosepe yaapo hayeke ekima꞉ ipika꞉ pieke hau paeyao epeayekeme. Ipikita꞉ mo ipika꞉ pahameke e pokao hayeke Idiepi halina꞉ da pa꞉ta꞉ pelia hayekeme. 3 Kutupa koto somema꞉ta꞉ mo Tekehalita꞉ Diosepe yaapo hayekeeki yalo ipika꞉ pieke hau paeya tapaoma꞉ ota꞉ epeke tupa꞉ piekeeki handeekeme. 4 Koto ekina꞉ Podipama꞉ta꞉ mo wekima꞉ pieke hau manuna꞉ ta꞉na꞉ma꞉ homolo hata꞉ta꞉ ipika꞉ puki pi e pokaasa꞉ some haena꞉ alo hata꞉ta꞉ ipika꞉ da make ipika꞉ wia hayeke ala꞉ta꞉ ala꞉ta꞉ paeyaona꞉ handeteke hala꞉ you hali haena꞉ leekeme. 5 Koto natena꞉ kini peaata꞉ mo Diosepe hayeke ekina꞉ Tekehalima꞉ta꞉ mo Idiepi halina꞉ da pa꞉ta꞉ wieke alemanu paeyao make oni e nina꞉ haemeke alemanu make paeyao epeayekeme. 6 Podipama꞉ta꞉ mo ipika꞉ wia hayeke alemanu paeyao sikita꞉ Diosepena꞉ kiki pa꞉ta꞉ u moneaaso hata꞉ ipikita꞉ ala꞉ta꞉ ma꞉nda꞉na꞉ hone na wikita꞉ pa nolo pieke nena꞉ homeke hone wiekeme.

Diosepeta꞉ loke panka hali seliapo hayekeme. 7 Kutupa hao hao peaata꞉ ipika꞉ you somena꞉ wetekema꞉ta꞉ mo wekina꞉ da tunkulolo hata꞉ da panda꞉ nane polupana꞉ pana꞉e laa honke leekeme. 8 Koto leeke mo wekima꞉ kiaaso hata꞉ mo wanda꞉ pa꞉ta꞉ alota꞉ Handa꞉e. Yaka you halima꞉ta꞉ do I̱ halo ekina꞉ ipika꞉ da pa꞉ta꞉ ula꞉ alemanu paeyaota꞉ hone bao hala꞉me. Ipikana꞉ma꞉ta꞉ ala꞉ta꞉ ala꞉ta꞉ paeyao I̱ma꞉ handeteke hano la꞉la꞉me. 9 Ipikana꞉ma꞉ta꞉ mo ipiki pa꞉ta꞉ ula꞉ honkopu kone I̱ pa꞉ta꞉ make ala꞉ta꞉ ala꞉ta꞉ paeyao handeteke hano la꞉la꞉pate neke homeke dia꞉me. Koto ekina꞉ pa I̱ma꞉ta꞉ Koda꞉ pa꞉ta꞉ hoke hau pitolo hata꞉ do nakana꞉ma꞉ ale hoke hauta꞉ ekipa peonope laa leekeme. 10 Mo wanda꞉ma꞉ta꞉ hoto paeyao Diosepe honke la꞉tia pulu hayekepate mo wanda꞉ yaapo ota꞉ na polu peekeme. 11 Kutu piekepate nate ma꞉nda꞉na꞉ta꞉ Diosepeta꞉ oni da pa꞉ta꞉ e pokulueke alo peekepate mo da pa꞉ta꞉ e pokao haemeke tapake ma꞉nda꞉ make ota꞉ na haemekeme. 12 Koto ekina꞉ mo wanda꞉ma꞉ mo wekina꞉ dau hokulupeke mineke hata꞉ alota꞉ Oni da panda꞉ pa꞉ta꞉ dika꞉ polupana꞉ pana꞉ epoma leekepate mo wekita꞉ ipika꞉ dauta꞉ mo wanda꞉na꞉ kiki pa꞉ta꞉ hola꞉mea wia haena꞉ hama pindipa opolu baeyekeme. 13 Mo wanda꞉ma꞉ta꞉ mo wekima꞉ ipika꞉ dau mina꞉pa꞉lao hama opolu baeya꞉ eki hando haota꞉ 14 kota꞉ mo wanda꞉ma꞉ ipika꞉ da pa꞉ta꞉ e pokaemeke mandane wanda꞉hali pa꞉ta꞉ e̱ wi alo alota꞉ Do ale handa꞉pee. Do hande yaka halikima꞉ hatuku epea꞉ Hibulu wekima꞉ta꞉ niki yala꞉ peake hau pa꞉la꞉mee. Ipikana꞉ma꞉ta꞉ yaka da panda꞉ pa꞉ta꞉ a꞉pa I̱ minuluekema꞉ pia꞉pate I̱ma꞉ ota꞉ anekema꞉ e̱ wi tieke loa꞉me. 15 Mo ipikana꞉ma꞉ta꞉ I̱ma꞉ e̱ wi loa꞉eki opu haota꞉ kota꞉ ipika꞉ dau wina꞉ wina꞉ pea hama opolu bao pa꞉la꞉mee leekeme. 16 Mo wanda꞉ma꞉ta꞉ Diosepena꞉ dauta꞉ pa wia pita mo wekina꞉ you some epeeke handaa waleekeme. 17 Kutupa mo hande amba꞉ leekeeki kone paa laa halolo alota꞉ Mo nakana꞉ma꞉ hande hatuku epe pa hameke e pokaasa꞉ Hibulu wekima꞉ta꞉ yala꞉ peake hau puluekema꞉ yaka da panda꞉ pa꞉ta꞉ epea꞉me. 18 Kutu piekepate pa mo I̱ma꞉ e̱ wi loa꞉ dina꞉ta꞉ do ipika꞉ dau wina꞉ wina꞉ pu hama opolu baeya꞉me leekeme.

19 Kota꞉ Diosepena꞉ you somema꞉ kotoeki opu haota꞉ tetoma꞉ homolo hata꞉ 20 Diosepe minina꞉ laata꞉ mo kinina꞉ dipula haliweki pitaeyeke ale pa꞉ta꞉ dipula pitina꞉ leekeme. Kutupa Diosepeta꞉ koto pa꞉ta꞉ hao hayekeme. 21 Pate mo Tekehalita꞉ Diosepe yaapo hata꞉ ipiki epeayekeeki yalo mo dipula handeteke hayeke halima꞉ make Diosepe yaapo ta꞉na꞉ma꞉ homeekeme. 22 Koto ekina꞉ mo somema꞉ta꞉ Diosepeta꞉ mo mandane dipula haliweki paeyao handeteke haena꞉ laa make mo dipula da pa꞉ta꞉ pieke haumanu paeyaota꞉ ipikana꞉ma꞉ handeteke haena꞉ leekeme. 23 Mo Tekehalita꞉ Diosepe yaapo hata꞉ ipika꞉ pieke haumanu paeyaota꞉ pu epeayeke handaa mo dipula handeteke hayeke somema꞉ta꞉ Diosepema꞉ handeteke haena꞉ leeke ale manuta꞉ ipikana꞉ma꞉ pa na handeteke hayekeme.