1 Mo hepenina꞉ Kilu Tombuao Hala꞉ ekita꞉ do tupa꞉e. Nate homeke ma꞉nda꞉na꞉ hali homeke ma꞉nda꞉ma꞉ mandane haliweki yenki haluekema꞉ ipikana꞉ma꞉ ipika꞉ waini pu e pokaena꞉yeke da ka꞉la꞉paaso siki weilu peekeme. 2 Mandane haliweki handa꞉ wia ipikana꞉ma꞉ alota꞉ Ikana꞉ma꞉ mulupeleme manita꞉ nate homekena꞉ 1 kina kulueke leekeeki opitolo haena꞉ iki paeyaoma꞉ homeke hone wimiki handaata꞉ mo e pa꞉ta꞉ tapaeyekeme. 3 Kutupa mo somema꞉ paa 9 koloka꞉ tupa꞉ paa la꞉ka꞉la mo makedi hama pua koto pa꞉ta꞉ mo mandane e na pokaemeke haliwekimanu handa꞉ wiekeme. 4 Kota꞉ ipikana꞉ma꞉ koto haliweki pa꞉ta꞉ alota꞉ Ikana꞉ma꞉ ya e pua pokaemeka꞉na꞉ta꞉ I̱ma꞉ iki pa꞉ta꞉ yenki ota꞉ ana꞉na꞉ kone kulueke leekeme. 5 Kota꞉ mo haliwekima꞉ ipika꞉ pi opua e pokolo pemekeme. Mo somema꞉ kutu piki hauta꞉ paa natepa pita꞉ tepo nate leke yaapona꞉ make paa piekeme.

6 Welealo nate leke yunki hata꞉ teke pa꞉ta꞉ ipikana꞉ma꞉ mo makedi hama paa pua mandane haliweki handeekeme. Iki pa꞉ta꞉ pua alota꞉ Pa ekipeke do natena꞉ nate lekemanu paeyaota꞉ pa paeyaaso pimipe laa iki pa꞉ta꞉ lota꞉ piekeme. 7 Ikana꞉ma꞉ hombo peaaso alota꞉ Yenki e pokomono ma꞉nda꞉ma꞉ niki na mia꞉me. Koto lemeke ipikana꞉ma꞉ alota꞉ Kota꞉ a꞉pa꞉la꞉me mo ya waini pu e pua pokaape leekeme.

8 Nate pambolo pulu haena꞉ta꞉ mo hande e teke halima꞉ mo e haliweki handeteke haena꞉ leeke hali pa꞉ta꞉ alota꞉ Mo haliweki wi laa mombelao ika꞉ yenkimanu hala꞉peke. Yenki halolo hata꞉ mo ota꞉ wetepe siki kini pea e pokeme haliwekina꞉eki amba꞉la kini pea hala꞉tiki puaata꞉ ota꞉ titina꞉ kini pimi haliwekina꞉ ekita꞉ paeyaaso hata꞉ hala꞉peke leekeme.

9 Koto leeke opuaata꞉ ipikana꞉ma꞉ mo welealo nane nate leke yunki hata꞉ kini pea e pokeme haliweki homeke homeke pa꞉ta꞉ 1 kina hale hale piekeme. 10 Kutu piekeeki handaata꞉ mo ota꞉ da panake ka꞉la꞉paaso siki kini pu mea pokolo pemeke haliweki ika꞉ yenki muluekema꞉ ipuluta꞉ Nika꞉ yenkita꞉ ota꞉ haka꞉ta꞉pao kilieke hone wimikipate pa iki pa꞉ta꞉ make homeke tupa꞉ 1 kina ombu haleekeme. 11 Kutu mo wetepena꞉ yenki mimi haliwekima꞉ ika꞉ yenki meaata꞉ mo e pokaemeke teke hali pa꞉ta꞉ tulu tulu pi wopu alo hata꞉ alota꞉ 12 Do ota꞉ wetepena꞉ mi haliwekita꞉ pa 1 aowa homekena꞉ e pokaemepate nikita꞉ da ka꞉la꞉paaso kini pea nate holiki tiekena꞉ poka pua welealo naneta꞉ naoma꞉pate pa nakana꞉ma꞉ iki pa꞉ta꞉ hale mandake piki yenki niki pa꞉ta꞉ make kiteleme lemekeme.

13 Mo e teke halima꞉ iki homeke ma꞉nda꞉ pa꞉ta꞉ Someo laa alota꞉ Opie. I̱ma꞉ neke na makealome. Nakana꞉ma꞉ nate homekena꞉ e pokaala꞉ ekita꞉ 1 kina ana꞉ pa꞉la꞉me laa homeke hone wiki handaata꞉ 14 naka꞉ yenki mea da pue leekeme. I̱ma꞉ mo hande ota꞉ wetepe sale nane mua꞉ hali pa꞉ta꞉ make do neke pa꞉ta꞉ kua꞉ tupa꞉ kone haluekema꞉ hone pa꞉la꞉me. 15 Ya manima꞉ta꞉ ya hone pa꞉la꞉ tupa꞉ kone pea꞉peke dia꞉ ya꞉la꞉pe o I̱ma꞉ ta꞉na꞉ma꞉ homolo hata꞉ mandane wanda꞉hali pa꞉ta꞉ ale mandaneeki pa halo halo ekina꞉ neketa꞉ I̱ yaapo ta꞉na꞉ma꞉ na homelepe laa lota꞉ piekeme. 16 Koto pi Yesuma꞉ lo a꞉mbolo hata꞉ alota꞉ Koto ekina꞉ mo ame biki na ula꞉ mandane wanda꞉hali woputa꞉ titina꞉ haena꞉ laata꞉ mo ame biki tieke ula꞉ mandane wanda꞉hali woputa꞉ wetepe halo yapilimikie laa leekeme.

17 Yesuma꞉ Diutuseleme pota꞉na꞉ ipika꞉ disaipolo haliweki homeke talo pu mea pulu hata꞉ alota꞉ 18 Opua꞉pe. Nikita꞉ ame Diutuseleme da teke nane ta opa꞉liaasoma꞉ handepe. Koto pa꞉ta꞉ta꞉ mo yeni peao haleme teke haliwekima꞉ make mo Lo Pi wape pea wala꞉tiki pu haleme haliwekima꞉ make Wanda꞉halina꞉ Eiyeke mea puata꞉ homena꞉e laa ma̱leke lilimikie. Kutaata꞉ ikana꞉ma꞉ ipiki mo Diendaili haliweki pa꞉ta꞉ mea pua halimikie. 19 Koto haliwekima꞉ ipiki kitaaso hata꞉ ipika꞉ lokena꞉ dopi tao yumbua baota꞉ homena꞉ lilimikie. Kutupa ipikita꞉ nate tepo wiaata꞉ paa tiao da꞉taa halieke leekeme.

20 Kutaata꞉ Sepedina꞉ wetekema꞉ ipika꞉ eiyeke yaapo ame̱le̱ Yesu pa꞉ta꞉ a꞉pa tumiki yotuao panda꞉ pitolo hata꞉ ala꞉ta꞉ ma꞉nda꞉ honke leekeme. 21 Yesuma꞉ alota꞉ Neketa꞉ aleke hone peleke pitelepe leekeme. Koto leeke mo wanda꞉ma꞉ hombo peaaso alota꞉ Nakana꞉ma꞉ Kini hali pitilipi natena꞉ do ya weki yaapo naka꞉ popeke nanema꞉ weki ma꞉nda꞉ pitu make hoeya꞉ nanema꞉ weki ma꞉nda꞉ pitu pina꞉ pi la꞉ witolo I̱ pa꞉ta꞉ la꞉ wie leekeme.

22 Koto leekepate Yesuma꞉ mo wanda꞉na꞉ eiyeke yaapo pa꞉ta꞉ alota꞉ Ipilika꞉ honke alepe ekita꞉ hone wotu na wiki hata꞉ alepeme. I̱ma꞉ mo ka꞉nda꞉ pa꞉la꞉ ekina꞉ kapona꞉ nolua꞉ ekita꞉ ipilikana꞉ma꞉ make napa꞉peke yelepe leekeme. Ipilikana꞉ma꞉ ipika꞉ pi hombo peaaso alota꞉ Diki ana꞉ pa꞉la꞉me lepekeme.

23 Yesuma꞉ ipiliki pa꞉ta꞉ alota꞉ I̱ma꞉ nolua꞉ kapona꞉ta꞉ ipilikana꞉ma꞉ ota꞉ nelipipikie. Pate ya popeke nane kiki pita꞉ hoeya꞉ nane kiki yaapo pa꞉ta꞉ ma꞉nda꞉ epi pitulu pa꞉la꞉ ekita꞉ laata꞉ I̱ma꞉ lapeke na ya꞉la꞉me. Koto ya Apa꞉ma꞉ wamo pea tikitiki yao ula꞉ pila꞉ ale yaapota꞉ mo ipika꞉ mulu pa꞉la꞉ hali yaapona꞉ ekie leekeme.

24 Koto honke laeyekeeki mo hande mandane kiki yaapo disaipolo tonuma꞉ opuaata꞉ kota꞉ koto hama̱la̱꞉ pa꞉ta꞉ mineke pankemekeme. 25 Kutu pieketa꞉ Yesuma꞉ iki mea momba꞉lao alota꞉ Ikana꞉ma꞉ handelememe. Kenke ma꞉nda꞉ nane wanda꞉hali handeteke hao hala꞉ haliwekima꞉ ika꞉ wanda꞉hali ana꞉na꞉ kilu tombuao halememe. Kutupa ika꞉ hali tieke tiekema꞉ mo wanda꞉hali pa꞉ta꞉ Dupa꞉pe laa pi wotu hapolo halemepate 26 pa ikana꞉ma꞉ta꞉ iki tukiki pa꞉ta꞉ ma꞉nda꞉ma꞉ mo koto hau pina꞉ na lelimikie. Dia꞉me. Iki pa꞉ta꞉ hali epima꞉ I̱ tieke halueke hone wia꞉ka꞉na꞉ta꞉ kota꞉ ipikita꞉ iki paeyaona꞉ e pokaasa꞉ hali halieke. 27 Kutupa hali epima꞉ I̱ titina꞉ hali halueke hone wia꞉ka꞉na꞉ta꞉ kota꞉ ipikita꞉ mo hande Wanda꞉halina꞉ Eiyekema꞉ pita꞉la꞉ tupa꞉ iki paeyaona꞉ pahameke e pokaasa꞉ hali halieke 28 Pa ekipeke Wanda꞉halina꞉ Eiyeketa꞉ mo wanda꞉halima꞉ ipika꞉ e pokaena꞉ loluekema꞉ yeke na epeeke yekepate ipikana꞉ma꞉ pa ika꞉ e pokaaluekema꞉ make ipika꞉ da꞉ta꞉la꞉ ekima꞉ta꞉ iki wopuna꞉ hoke hauna꞉ yenki haluekema꞉ yeke epea꞉me leekeme.

29 Yesu ipika꞉ disaipolo tonu ame̱le̱ mo Dietiko mina꞉pa꞉lao pemekeme. Kutupa wanda꞉hali wopuma꞉ iki teli mea pemekeme. 30 Koto pulu haena꞉ta꞉ mo pota꞉ nepokona꞉ pitipiki leke holupiki hali yaapoma꞉ Yesu yopula꞉me pi opipikime. Koto ekina꞉ta꞉ ipilikana꞉ma꞉ wi alo alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉e lepekeme. 31 Koto lepeke handa wanda꞉hali wopuma꞉ta꞉ ipiliki pa꞉ta꞉ alota꞉ Pi na lapepema laa sa꞉sa꞉ pimikipate ipilikana꞉ma꞉ ota꞉ wi aneke hapu paa alo alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉e lepekeme.

32 Kutupa Yesuma꞉ pota꞉na꞉ hando hata꞉ wi laa alota꞉ I̱ma꞉ ipiliki pa꞉ta꞉ eki peaano alepepe leekeme. 33 Mo leke holupiki hali yaapoma꞉ ipiki pa꞉ta꞉ alota꞉ Tekehalio. Dika꞉ leke ki laae lepekeme.

34 Yesuma꞉ ipiliki pa꞉ta꞉ a꞉ta꞉ma꞉ homolo hata꞉ ipilika꞉ leke wataeyekeme. Kutu pieke pita꞉ma꞉ta꞉ ipilika꞉ leke ki laata꞉ epeke tupa꞉ handepekeme. Koto ekina꞉ta꞉ ipilikana꞉ma꞉ ipika꞉ hoki nane telimea pepekeme.