1 Kutupa ipikana꞉ma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Do haleme wanda꞉hali mandaneeki manuta꞉ a̱i̱ na homeke pa hata꞉ kone Koda꞉ ipika꞉ welema꞉ ipika꞉ Kilu Tombuao Hala꞉eki epolo pa꞉la꞉ ekita꞉ handilimikie leekeme.

2 Kutupa hoto yunki mindiki hata꞉ hao Yesuma꞉ Pida Dia꞉mesi Dioni tepo handa꞉ meaata꞉ pote tumiki pa꞉ta꞉ pua ika꞉siki haemekeme. Kutupa ika꞉ leke popeleke nane hata꞉ Yesuna꞉ loke wonu piliekeme.

3 Kutupa ipika꞉ daumanu make pa̱a̱ peaata꞉ hake wopu piekeme. Kenke hali ma꞉nda꞉ma꞉ koto tupa꞉ dau hake peaapeke na ya꞉la꞉me. 4 Kutupa Elaidia Mosesi yaapo opolo a꞉paata꞉ Yesu ame̱le̱ pi pi lo haemekeme. Kutu pitolo haena꞉ koto disaipolo hali tepoma꞉ handemekeme. 5 Pidama꞉ Yesu pa꞉ta꞉ alota꞉ Tekehalio. Do pa꞉ta꞉ do haloma꞉ ekita꞉ a꞉pa꞉la꞉me. Sale da tepo a꞉eyamono lae laata꞉ Homeke naka꞉eki ma꞉nda꞉ Mosesina꞉eki ma꞉nda꞉ Elaidiana꞉eki pea a꞉eyamono lae leekeme. 6 Pututuma꞉ homemeke handaa Pidama꞉ pi loluekema꞉ hayekepate hone na wiekeme.

7 Kutupa koama꞉ iki tu̱ peaaso haena꞉ mo koa tukiki pa꞉ta꞉ pi ho̱la̱꞉makema꞉ la꞉niaeyekeme dupa. Kotota꞉ yaka puki piki wekie. Ipika꞉ pi opua꞉pa꞉peke la꞉niaeyekeme. 8 Kutupa koto kone koto hali tepoma꞉ lekema꞉ lekema꞉ pimikipate hali ma꞉nda꞉ na handeke Yesu homeke handemekeme.

9 Potena꞉ hola꞉pa꞉niaaso hata꞉ Yesuma꞉ iki hando alo hata꞉ alota꞉ Oli handemeeki ma꞉nda꞉ pa꞉ta꞉ na lapa꞉peke. Wanda꞉halina꞉ Eiyeketa꞉ ota꞉ homa paa tiao haya꞉ka꞉na꞉ alota꞉ Ana꞉ pilieke leekeme. 10 Koto ekina꞉ ika꞉ kone pi wia miniki hata꞉ ota꞉ homa paa tiaalieke laa lea꞉ ekita꞉ lota꞉ lota꞉ pimikime. 11 Yesu pa꞉ta꞉ lota꞉ pimikime dupa. Pa ekipeke mo wape pea wala꞉tiki pu haleme haliwekima꞉ titina꞉ amba꞉la Elaidia ipilieke lo halemepe lemekeme. 12 Kutupa Yesuma꞉ iki pa꞉ta꞉ alota꞉ Titina꞉ amba꞉la Elaidia ota꞉ ipilieke. Ala꞉ta꞉ ala꞉ta꞉ tikitiki yao wina꞉yeke ipilieke laata꞉ Mo hande Wanda꞉halina꞉ Eiyeke pa꞉ta꞉ tanda tieke mu yaala꞉ma꞉ homao kiaalo peleme ekita꞉ eki eki pa la꞉la꞉pe leekeme. 13 Kutu piliepate I̱ma꞉ iki pa꞉ta꞉ alome. Elaidia amba꞉la epea꞉pate pa mo Baibolo bukana꞉ wape pa꞉la꞉ tupa꞉ ika꞉ hone pa꞉la꞉ ekimanu ipiki pa꞉ta꞉ pimikime leekeme.

14 Kutupa ikana꞉ma꞉ mo mandane disaipolo haliweki haemeke alena꞉ opolo puaata꞉ koto haliwekita꞉ wanda꞉hali wopu hao popei yao yopua haemeke ekina꞉ handemekeme. Pa ekipeke mandane wape pea wala꞉tiki pu haemeke haliwekita꞉ hande disaipolo haliweki ame̱le̱ kake ne̱li pitolo hata꞉ haemekeme. 15 Kota꞉ koto kone mo wanda꞉hali paeyaoma꞉ Yesu handaata꞉ penkilipa ipiki pa꞉ta꞉ anke hao puaata꞉ pi pi lemekeme. 16 Kutupa Yesuma꞉ iki pa꞉ta꞉ lota꞉ pitolo alota꞉ Mo haliweki ame̱le̱ alekena꞉ pi pi alemepe leekeme.

17 Wanda꞉hali tukiki pa꞉ta꞉ hayeke hali ma꞉nda꞉ma꞉ ipika꞉ pi hombo peaaso alota꞉ Tekehalio. Yaka weki neke pa꞉ta꞉ hatuku epoa꞉me. Hoke temoko pila꞉ ekima꞉ pi na lo hala꞉me leekeme. 18 Kutupa mo hoke temokoma꞉ da꞉ka꞉pe miniki pita꞉ka꞉na꞉ mea lopao hala꞉me leekeme. Koto ekima꞉ ya wekina꞉ kake pa꞉ta꞉ dako hankoloma꞉ lia ipika꞉ kake lenkena꞉ lao hala꞉me leekeme. Kutupa ipika꞉ loketa꞉ tindipulu bao da̱o̱la hao hala꞉me la ombu alota꞉ Naka꞉ disaipolo haliwekima꞉ tolu lina꞉yeke honke loa꞉pate mo haliwekima꞉ ana꞉ na pia꞉me leekeme.

19 Yesuma꞉ iki pa꞉ta꞉ alota꞉ Ikita꞉ hone na tulaaseme wanda꞉halie. Nate ekipuna꞉ iki ame̱le̱ ombu hao hanope. Nate ekipuna꞉ ika꞉ ka꞉nda꞉ kiteleme ekimanu meonope laata꞉ I̱ pa꞉ta꞉ hatuku ipupe leekeme. 20 Koto leeke mo wekita꞉ ipiki pa꞉ta꞉ hatuku mea pemekeme. Pate mo hoke temokoma꞉ Yesu handaata꞉ mo weki lu keayekeme. Kutu pieke mo wekita꞉ ipika꞉ kake pa꞉ta꞉ dako hankoloma꞉ liaaso haena꞉ kenkena꞉ lopaaniao petepete pomiekeme.

21 Yesuma꞉ ipika꞉ ateke pa꞉ta꞉ lota꞉ pitolo alota꞉ Do hauta꞉ nate ekipuna꞉ pea pa꞉la꞉pe leekeme. Ipika꞉ atekema꞉ alota꞉ Panake wekisiki ya꞉pate kone pea pia꞉me laata꞉ 22 Hoke temokoma꞉ hoto eleke eleke ti uleke pa꞉ta꞉ make ikali pa꞉ta꞉ make ipiki hoeyaaluekema꞉ mea lopaatiki pu haya꞉me leekeme. Kutu pia꞉pate nakana꞉ma꞉ ana꞉ pia꞉ka꞉na꞉ta꞉ kota꞉ niki pa꞉ta꞉ a꞉ta꞉ma꞉ homa pa꞉ta꞉la꞉peke leekeme. 23 Koto leeke Yesuma꞉ ipiki pa꞉ta꞉ alota꞉ Aowe. Naka꞉ hone tulaasa꞉ ekita꞉ ana꞉ pia꞉ka꞉na꞉ kota꞉ I̱ma꞉ epeaalueke. Wanda꞉hali epi amedama꞉ hone tulaeka꞉na꞉ta꞉ hau paeyao pea꞉peke ya꞉la꞉me leekeme. 24 Kutupa koto kone mo wekina꞉ atekema꞉ wi alo hata꞉ alota꞉ Hone tulaasome. Ya hone na tulaasoeki nakana꞉ma꞉ pa꞉ta꞉la꞉peke leekeme.

25 Yesuma꞉ wanda꞉hali wopu a̱i̱ya epemekeeki handaata꞉ mo hoke temoko hando alo hata꞉ alota꞉ Pi na lao pi na opuaasa꞉ temoko neke pa꞉ta꞉ dupiki pi alome. Koto weki mina꞉pa꞉lao opolu bao yopuata꞉ paa na honda꞉ pamba꞉peke leekeme. 26 Koto pi opuaata꞉ hoke temokoma꞉ hoke e̱ wi alo hata꞉ mo weki wopu mea lu keaota꞉ mina꞉pa꞉lao opolu bao yapeekeme. Kutu pieketa꞉ mo weki ota꞉ homeeke hali toko leke wiekeme. Koto ekina꞉ wanda꞉hali eleke elekema꞉ alota꞉ Ipikita꞉ ota꞉ homea꞉ka꞉ta꞉me lemekepate 27 Yesuma꞉ ipika꞉ kiki yola꞉ mea miniliaeyeke mo weki tiaeyekeme.

28 Yesuta꞉ da tukiki pa꞉ta꞉ honda꞉ pambaa ipiki honu make haena꞉ mo disaipolo haliwekima꞉ lota꞉ pitolo hata꞉ alota꞉ Nikana꞉ma꞉ mo hoke temoko tolu lia꞉peke na yeke ekita꞉ ekipape lemekeme. 29 Koto lemeke Yesuma꞉ iki pa꞉ta꞉ alota꞉ Kutupiki hoke temokota꞉ Koda꞉ pa꞉ta꞉ yeni pita꞉la꞉me ekima꞉ homeke tolu lia꞉peke ya꞉la꞉me leekeme.

30-31 Koto alena꞉ mina꞉pa꞉lao puaata꞉ mo Ka꞉lili nane lombei pu pa puaata꞉ ipika꞉ disaipolo haliweki pa꞉ta꞉ pi la haluekema꞉ta꞉ wanda꞉halima꞉ ipiki handaapena꞉ hone wiekeme. Ipika꞉ disaipolo haliweki pa꞉ta꞉ dupa waleekeme. Wanda꞉halina꞉ Eiyeketa꞉ haliweki oto pa꞉ta꞉ haena꞉ loluekema꞉ mea halieke. Kutu pia꞉ka꞉na꞉ta꞉ mo haliwekima꞉ ipiki limikie. Kota꞉ ota꞉ homiliepate hoto tepo wia paa da꞉taalieke leekeme. 32 Koto leekepate mo haliwekima꞉ta꞉ hone na wimikime. Kutupa paala꞉ma꞉ homolo hata꞉ lota꞉ na pimikime.

33 Kapeneami da pa꞉ta꞉ puaata꞉ da tukiki pa꞉ta꞉ honda꞉ pamba hata꞉ Yesuma꞉ ipika꞉ disaipolo haliweki lota꞉ pitolo hata꞉ alota꞉ Ikana꞉ma꞉ pota꞉na꞉ ipulu hata꞉ aleke ata꞉ta꞉ pimipe laa leekepate 34 ikana꞉ma꞉ pi na leke pa pitimikime. Ekipeke mo pota꞉na꞉ ipulu hata꞉ epi tieke hala꞉pe laa ata꞉ta꞉ pimiki handaa pi na leke pa pitimikime. 35 Kutupa Yesuta꞉ pitiniao pita꞉ mo 12 haliweki wi laa iki pa꞉ta꞉ alota꞉ Hali epima꞉ titina꞉ I̱ halueke hone wia꞉ka꞉na꞉ta꞉ kota꞉ koto halita꞉ wetepena꞉ hali hano laata꞉ wanda꞉hali paeyaona꞉ e pokaasa꞉ hali hano lena꞉e leekeme. 36 Koto laata꞉ wekisiki ma꞉nda꞉ mea iki tukiki pa꞉ta꞉ haena꞉ laata꞉ mo wekisiki hopula꞉ mea iki pa꞉ta꞉ alota꞉ Hali epima꞉ dupiki wekisiki I̱ pa꞉ta꞉ hone witolo hata꞉ handa꞉ mia꞉ka꞉na꞉ta꞉ 37 kota꞉ I̱ kone handa꞉ mina꞉la꞉me. Kutupa hali epima꞉ I̱ handa꞉ mia꞉ka꞉na꞉ta꞉ I̱ homeke dia꞉me. Hande I̱ tapaeya꞉ hali make handa꞉ mina꞉la꞉me laa leekeme.

38 Koto leeke handaa Dionima꞉ ipiki pa꞉ta꞉ alota꞉ Disao. Hali ma꞉nda꞉ma꞉ naka꞉ biki alo hata꞉ hoke temokomanu tolu lia꞉tiki pia꞉eki handoma꞉me. Koto someta꞉ niki ame̱le̱ mandakena꞉ na pomieke handaa sa꞉sa꞉ puma꞉me leekeme. 39 Koto leekepate Yesuma꞉ alota꞉ Pa sa꞉sa꞉ na pea꞉pa꞉peke. Hali epima꞉ yaka biki alo hata꞉ wele pita꞉la꞉eki pia꞉ka꞉na꞉ta꞉ wetepena꞉ koto halima꞉ta꞉ yaka biki na hoeyaalieke leekeme. 40 Hali ma꞉nda꞉ epima꞉ niki pa꞉ta꞉ a꞉nda꞉ na lia꞉ka꞉na꞉ta꞉ ipikita꞉ nika꞉ halie leekeme. 41 Iki pa꞉ta꞉ ota꞉ pi alome. Ikana꞉ma꞉ta꞉ ya biki melemeke handaata꞉ hali epima꞉ ikali naaka꞉na꞉ ipi kanakena꞉ hola꞉ pamba iki kia꞉ka꞉na꞉ta꞉ ipika꞉ yenki ota꞉ milieke leekeme.

42 Hali epima꞉ do I̱ pa꞉ta꞉ hone tulaaseme weki wandiki sunu homeke ma꞉nda꞉ma꞉ hoke hau pina꞉ pu tiaena꞉ lea꞉ka꞉na꞉ta꞉ kota꞉ koto halina꞉ make pa꞉ta꞉ toopi hombeleke mea tonkao oni dawala pa꞉ta꞉ mo hali mea lopaeya꞉ka꞉na꞉ yoluta꞉ epolo pia꞉me leekeme. 43 Naka꞉ kikima꞉ hoke hau puelena꞉ lea꞉ka꞉na꞉ta꞉ koto kiki tunkulu baapeke leekeme. Kiki homeke hata꞉ hao hala꞉eki mika꞉na꞉ta꞉ epolo pa꞉la꞉pate kiki yaapo hata꞉ ti to hala꞉ alena꞉ peka꞉na꞉ta꞉ hoelieke leekeme. 44 (besi namba 48 handa꞉peke) 45 Naka꞉ ankema꞉ hoke hau puelena꞉ lea꞉ka꞉na꞉ta꞉ naka꞉ anke tunkulu baapeke leekeme. Anke homeke hata꞉ hao hala꞉eki mika꞉na꞉ta꞉ epelieke leekeme. Anke yaapo hata꞉ ti to hala꞉ alena꞉ peka꞉na꞉ta꞉ hoelieke. 46 (besi namba 48 handa꞉peke) 47 Naka꞉ lekema꞉ hoke hau puelena꞉ lea꞉ka꞉na꞉ta꞉ naka꞉ leke yoka꞉ mea baapeke leekeme. Leke homeke hata꞉ Koda꞉na꞉ Kilu Tombuao Hala꞉eki pa꞉ta꞉ peka꞉na꞉ta꞉ epelieke. Leke yaapo haeka꞉na꞉ta꞉ mo ti to hala꞉ alena꞉ neke mea lopaeya꞉ka꞉na꞉ta꞉ hoelieke leekeme. 48 Koto alena꞉ta꞉ iki no haleme kimimanu na homo halememe. Kutupa mo ti to hala꞉eki na hundinekepato hala꞉me leekeme.

49 Ma꞉na꞉ hotekena꞉ damena pu ala꞉ tupa꞉ wanda꞉hali paeyaona꞉ ti tala꞉eki pu lelieke leekeme. 50 Epita꞉ a꞉pa꞉la꞉pate ipika꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epita꞉ ekipa paa tende peaalipikipe leekeme. Ika꞉ kone epi wia hapa꞉peke leekeme. Kutupa ika꞉ ika꞉ kone a꞉nda꞉ pelia homu pu alu alu pea꞉pa꞉peke leekeme.