1 Doeki hoki naneta꞉ enisolo tonkopuma꞉ mo kenke honiki tonkopu telipa haemeeki handoa꞉me. Ikana꞉ma꞉ta꞉ mo tonkopu poma꞉ta꞉ mo kenke make dawala make ti ma꞉nda꞉ hondo poma꞉ tiaama꞉na꞉ miniki haememe. 2 Kutupa enisolo ma꞉nda꞉ma꞉ta꞉ mo deto hala꞉ Koda꞉na꞉ tonkaake ale miniki hata꞉ oli nate opa꞉la꞉ nanema꞉ opolo epea꞉me. Ipikana꞉ma꞉ mo hande Koda꞉ma꞉ mo kenke pita꞉ ikali yaapo hoeyaena꞉yeke honkopu hala꞉la꞉ tonkopu enisolomanu pa꞉ta꞉ anekema꞉ wi la꞉ moneaya꞉me. 3 Mo enisoloma꞉ alota꞉ Nika꞉ Koda꞉na꞉ pa hameke e pokaasa꞉ haliweki ika꞉ wenoko manuna꞉ mo Koda꞉ ipika꞉ tomboma꞉ maka u paeyaoma꞉ka꞉na mo kenke make dawala make mo timanu make hoeyaama꞉na꞉ma꞉ ame dota꞉ a̱i̱ na hoeyaapee lea꞉me.

4 Kutupa I̱ pa꞉ta꞉ la kieketa꞉ Mo Koda꞉ ipika꞉ tomboma꞉ maka ula꞉ tapaketa꞉ 144 daoseni halememe lea꞉me. Koto wanda꞉halita꞉ mo hande Isulaina꞉ 12 tapakee lea꞉me. 5-8 Ikita꞉ 12 daoseni lo mo tapake homeke homeke pa꞉ta꞉ yata꞉po ma꞉la꞉me. Mo tapake biki manuta꞉ Diuda Lubeni Ka꞉da꞉ A꞉sea Na꞉petali Ma꞉na꞉sa꞉ Simioni Lipae Isaka Sebuloni Diosepe make Benisamini koto tapake manue.

9 Doeki hoki naneta꞉ hone pa mata꞉papeke tapake tieke handoa꞉me. Do wanda꞉halita꞉ ma꞉nda꞉ma꞉ yata꞉pea꞉peke tapake tupa꞉ dia꞉me. Mo wanda꞉halita꞉ tutu paeyao make tapake paeyao make kapomani ta꞉ta꞉ ta꞉ta꞉ma꞉ handeteke hala꞉ kenke ta꞉ta꞉ ta꞉ta꞉ make pi ta꞉ta꞉ leke tapake paeyao siki haememe. Ikana꞉ma꞉ta꞉ mo kini seana꞉ make mo Sipisipi Ma꞉na꞉ Ikikina꞉ puki tikitikina꞉ hakepiki dau yama hau palo miniki haememe. 10 Ikana꞉ma꞉ anekema꞉ alo hata꞉ alota꞉ Da꞉ta꞉mono yeke pa꞉ta꞉la꞉la꞉ ekita꞉ mo kini seana꞉ pila꞉ nika꞉ Koda꞉ make mo Sipisipi Ma꞉na꞉ Ikiki yaapo pa꞉ta꞉ yama꞉ ipula꞉me lememe.

11 Enisolo paeyaota꞉ mo kini seana꞉ make mo you haliweki make mo deto hala꞉ ale tonkopu paeyao popei yao hao yapememe. Kutupa ikita꞉ mo kini seana꞉ puki tikitikina꞉ panda꞉puniao lopolo hata꞉ Koda꞉ pa꞉ta꞉ yeiya꞉ laaso hata꞉ yeni pitolo alota꞉ 12 Kutu pina꞉e. Yeiya꞉ laasa꞉eki make pa̱a̱ make hone u lenkene peaasa꞉eki make ta꞉na꞉e ala꞉eki make biki miniliaasa꞉eki make wele honkopu make paeyaota꞉ hoto paeyao nika꞉ Koda꞉na꞉eki ula꞉me. Kutu pina꞉e lememe.

13 Mo hala꞉ you hali ma꞉nda꞉ma꞉ I̱ lota꞉ pitolo alota꞉ Mo hake piki dau yameleme wanda꞉halita꞉ epi ameda ka꞉ta꞉pe laata꞉ hanema꞉ a꞉pa pelemepe lea꞉me.

14 I̱ma꞉ alota꞉ Someo. I̱ hone na ulupate nakana꞉ma꞉ta꞉ hone wilime loa꞉me. Ipikana꞉ma꞉ I̱ pa꞉ta꞉ alota꞉ Ikita꞉ mo hande ota꞉ hoke tanda pa꞉ta꞉ yama꞉ kone epeke tupa꞉ epeleme wanda꞉halie lea꞉me. Ikana꞉ma꞉ta꞉ ika꞉ aka꞉ manuta꞉ mo Sipisipi Ma꞉na꞉ Ikikina꞉ wema꞉ tanda꞉pa hake peao pelememe. 15 Koto peleme ekina꞉ta꞉ ikita꞉ Koda꞉na꞉ kini seana꞉ puki tikitikina꞉ hata꞉ peliolo da ka꞉la꞉polo ipika꞉ tembolo pa꞉ta꞉ ipika꞉ e pokao halememe. Mo kini seana꞉ pila꞉ halima꞉ ipika꞉ hala꞉ ekima꞉ta꞉ iki handeteke pitilieke. 16 Ikita꞉ tea꞉ma꞉ make ikali na꞉na꞉ma꞉ make ota꞉ paa na homilimikie. Kutupa make nate o ti ulekema꞉ potaasa꞉ ale tupa꞉ make na yankilieke. 17 Pa ekipeke mo kini sea tukikina꞉ hala꞉ Sipisipi Ma꞉na꞉ Ikikita꞉ ika꞉ handeteke hala꞉ hali halieke. Kutupa ikita꞉ mo da꞉ta꞉la꞉eki kita꞉la꞉ tunkulu pa pitumu pitumu pa꞉la꞉ ikalimanu pa꞉ta꞉ hatuku pelieke. Kutupa Koda꞉ma꞉ ika꞉ leke pa꞉ta꞉ e̱ pankekemanu paeyao honu baalieke.