MAKA.
14.
Diu wanda꞉halima꞉ Lombei Pupa Yapeeke nate make Na Pombei Yaake Palaowa Nala꞉ di make hone uluekema꞉ ne pambaaluekema꞉ nate yaapo titina꞉ amba꞉la꞉ wiekeme. Kutupa mo yeni peao haemeke you haliwekima꞉ make wape pea wala꞉tiki pu haemeke haliwekima꞉ make Yesu a꞉mbao mina lu pimiki pota꞉ weimikime. 
Ikana꞉ma꞉ alota꞉ Ne pambaaso haena꞉ta꞉ dia꞉me. Wanda꞉halima꞉ niki pa꞉ta꞉ mineke pankaapa꞉na꞉ lemekeme. Kutupa pota꞉ ma꞉nda꞉ weimikime. 
Yesuta꞉ Bedani da puaata꞉ kindi yeni hayeke hali Saimonona꞉ da pa꞉ta꞉ ne nalo pitina꞉ wanda꞉ ma꞉nda꞉ma꞉ a꞉la꞉ba꞉seta꞉ toopi kanake homeke mea epeekeme. Mo kanake pa꞉ta꞉ senisi totopo pikieki seliapo pambeekeme. Koto senisina꞉ bikita꞉ Nadae. Yenki tieke alee. Kutupa mo wanda꞉ma꞉ kanake yamba꞉la꞉ liaata꞉ hande senisita꞉ Yesuna꞉ youna꞉ holaeyekeme. 
Kutu piekepate mandane wanda꞉halima꞉ ika꞉ ika꞉ kone mineke pankolo hata꞉ alota꞉ Koto senisita꞉ ekipeke pa hameke hoeyaasa꞉pe. 
Do senisi ma꞉nda꞉ma꞉ hambea꞉ka꞉na꞉ yoluta꞉ 300 kina mea꞉peke yolo pia꞉me. Kutupa mo manita꞉ natehali wanda꞉hali pa꞉ta꞉ hala꞉peke yolo pia꞉me lemekeme. Kutupa mo wanda꞉ pa꞉ta꞉ hoke hone witolo hata꞉ tandapiki pi lemekeme. 
Koto lemekepate Yesuma꞉ alota꞉ Koto wanda꞉ pa꞉ta꞉ pi na leke mina꞉pa꞉lape. Pa ekipeke ipiki ka꞉nda꞉ma꞉ homaasemepe. Ipikana꞉ma꞉ I̱ pa꞉ta꞉ epeke hau pia꞉me. 
Natehali wanda꞉halita꞉ nate paeyao iki ame̱le̱ hao halimikie. Kutupa ika꞉ hone pa꞉la꞉ natena꞉ epeke haumanu iki pa꞉ta꞉ pea꞉peke ya꞉la꞉pate I̱ta꞉ iki ame̱le̱ hoto paeyao na hao halueke. 
Do wanda꞉ma꞉ ipika꞉ pia꞉peke ya꞉la꞉eki pia꞉me. Yaka loke a̱i̱ na hoitelemepate ipikana꞉ma꞉ senisi amba꞉la꞉ holaeya꞉me leekeme. 
Kutupa iki pa꞉ta꞉ ota꞉ pi alome. Kenke paeyao pa꞉ta꞉ Pi Seliapo wala꞉tiki pimika꞉na꞉ta꞉ do wanda꞉ma꞉ I̱ pa꞉ta꞉ pia꞉ ekita꞉ ipiki pa꞉ta꞉ hone wina꞉yeke wala꞉tiki pilimikie leekeme. 
Kutupa Isekatioti hali Diudasima꞉ mo hande 12 haliweki hayeke halima꞉ kone Yesu lina꞉yeke a꞉nda꞉ lombuluekema꞉ mo yeni peao haemeke you haliweki pa꞉ta꞉ peekeme. 
Kutupa mo haliwekima꞉ ipika꞉ pi opuaata꞉ ta꞉na꞉ma꞉ homemekeme. Ipiki pa꞉ta꞉ mani haluekema꞉ pi la꞉ wimikime. Kutupa yeni peao haemeke teke haliwekima꞉ Yesu minina꞉yeke Diudasima꞉ pota꞉ weiyekeme. 
Na Pombei Yaake Palaowa Ne pambaeya꞉ pita꞉ titina꞉ natena꞉ Lombei Pupa Yapeeke natena꞉ sipisipi ikiki lu haemeke pita꞉ kone Yesuna꞉ disaipolo haliwekima꞉ ipiki pa꞉ta꞉ alota꞉ Lombei Pupa Yapeeke nate hone uelena꞉yeke ne pambaaluma꞉eki noelena꞉yeke hando pa꞉ta꞉ pua da wamo peamonope lemekeme. 
Kutupa Yesuma꞉ ipika꞉ disaipolo hali yaapo tapaaso hata꞉ ipiliki pa꞉ta꞉ alota꞉ Mo daoni nane puaata꞉ hali ma꞉nda꞉ma꞉ ikali kanake homeke tia ipulu hata꞉ ipiliki manda꞉hande pilieke. Kutupa mo hali teli mea pua꞉pa꞉peke. 
Ipikana꞉ma꞉ da ma꞉nda꞉ pa꞉ta꞉ honda꞉ pamba pea꞉ka꞉na꞉ta꞉ ipilikana꞉ma꞉ koto da teke hali pa꞉ta꞉ dupa lapa꞉peke. Wala꞉la꞉ Halima꞉ alota꞉ Yaka disaipolo haliweki I̱ ame̱le̱ Lombei Pupa Yapeeke natena꞉ ne nolo poloma꞉ da panda꞉ hando pa꞉ta꞉pe lapa꞉peke leekeme. 
Kutupa ipikana꞉ma꞉ manda nane wamo pea ula꞉ da panda꞉ tieke walieke leekeme. 
Mo disaipolo hali yaapoma꞉ daoni nane puaata꞉ Yesuna꞉ leeke pita꞉ ota꞉ yaeyekeme. Kutupa mo hande Lombei Pupa Yapeeke natena꞉ ne hone uluekema꞉ ika꞉ ne wamo pipikime. 
Timba꞉ alo haena꞉ Yesu mandane 12 haliweki ame̱le̱ koto pa꞉ta꞉ opolo pemekeme. 
Kutupa ne nalo pitina꞉ Yesuma꞉ alota꞉ Iki pa꞉ta꞉ ota꞉ pi alome. I̱ minina꞉yeke I̱ ame̱le̱ do ne nala꞉ hali homekema꞉ kone a꞉nda꞉ lomba꞉lieke leekeme. 
Koto leeke handaa ikana꞉ma꞉ ka꞉nda꞉ma꞉ homolo hata꞉ ma꞉nda꞉ ma꞉nda꞉ma꞉ ipiki pa꞉ta꞉ I̱ma꞉pe la꞉tiki pimikime. 
Yesuma꞉ iki pa꞉ta꞉ alota꞉ Iki 12 haliweki tukiki pa꞉ta꞉ homeke halima꞉ pilieke. I̱ma꞉ta꞉ palaowa tenke laaso metekina꞉ kone ipikana꞉ma꞉ make palaowa tenke laasa꞉me leekeme. 
Wanda꞉halina꞉ Eiyeke pa꞉ta꞉ mo Baibolo bukana꞉ wape pa꞉la꞉ tupa꞉ homena꞉ a꞉ndu halimipate pa Wanda꞉halina꞉ Eiyeke minina꞉yeke a꞉nda꞉ lomba꞉la꞉ hali pa꞉ta꞉ta꞉ A꞉ta꞉e. Na mendia꞉ka꞉na꞉ yoluta꞉ epolo pia꞉me leekeme. 
Ne nalo pitina꞉ Yesuma꞉ palaowa mea Koda꞉ pa꞉ta꞉ keiyae laa pindi pindi pea iki pa꞉ta꞉ hala alota꞉ Mipe. Dota꞉ ya loke mindikie leekeme. 
Kutupa kapo mea keiyae laaka꞉na꞉ iki pa꞉ta꞉ hale hale piekeme. Iki paeyaoma꞉ mo kapona꞉ nemekeme. 
Kutupa ipikana꞉ma꞉ iki pa꞉ta꞉ alota꞉ Pi la꞉ uluekema꞉ yaka we doe. Wanda꞉hali paeyao epeaaluekema꞉ yaka we lopilieke laa 
Iki pa꞉ta꞉ ota꞉ pi alome. Do naloma꞉ waini ikali I̱ta꞉ paata꞉ na neke hao wetepena꞉ Koda꞉na꞉ Kilu Tombuao Hala꞉eki pa꞉ta꞉ hata꞉ panakeeki nolueke leekeme. 
Ikana꞉ma꞉ emeli ma꞉nda꞉ laata꞉ mo Olipi Pote pa꞉ta꞉ pemekeme. 
Kutupa Yesuma꞉ iki pa꞉ta꞉ alota꞉ Iki paeyaoma꞉ I̱ mina꞉pa꞉lalimikie. Mo Baibolo bukana꞉ wape pa꞉la꞉ ekita꞉ dupae. Sipisipi handeteke hao hala꞉ hali lueke. Kutupa mo sipisipi titi mandane mandane pindipa pomu keaalimikie wape pa꞉la꞉me leekeme. 
Kutu pilimipate I̱ paa mea tiaeya꞉ka꞉na꞉ta꞉ I̱ amba꞉la Ka꞉lili nane polueke. Ikita꞉ wetepena꞉ a꞉pa꞉peke leekeme. 
Koto leeke Pidama꞉ ipiki pa꞉ta꞉ alota꞉ Wanda꞉hali paeyaoma꞉ neke mina꞉pa꞉laemeka꞉na꞉ta꞉ I̱ma꞉ta꞉ neke na mina꞉pa꞉lalueke leekeme. 
Yesuma꞉ ipiki pa꞉ta꞉ alota꞉ Neke pa꞉ta꞉ ota꞉ pi alome. Ame timba kone koka꞉la꞉ma꞉ hoto yaapo peao e a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaalipikie leekeme. 
Koto leekepate Pidama꞉ pi taka꞉lakema꞉ alota꞉ Diki mandakena꞉ homopono lea꞉ka꞉na꞉ kone naka꞉ biki na hoeyaalueke leekeme. Kutupa mo haliweki paeyaoma꞉ make koto tupa꞉ lemekeme. 
Yesu make mo haliweki ame̱le̱ Kesema꞉ni e nane pemekeme. Kutupa ipikana꞉ma꞉ ipika꞉ disaipolo haliweki pa꞉ta꞉ alota꞉ I̱ma꞉ Koda꞉ pa꞉ta꞉ yeni pulu pono ikita꞉ do pa꞉ta꞉ pita꞉pe leekeme. 
Kutupa Yesuma꞉ Pida Dia꞉mesi Dioni ameda hatuku puaata꞉ koto kone ipika꞉ pukima꞉ ka꞉nda꞉ wopu miekeme. 
Ipikana꞉ma꞉ iki pa꞉ta꞉ alota꞉ I̱ta꞉ yaka pukima꞉ ka꞉nda꞉ma꞉ wopu homolome. Homeke nono pea halome. Ikita꞉ do pa꞉ta꞉ yu wia hata꞉ handeteke hapa꞉peke leekeme. 
Kutupa hosiki mopate leke puaata꞉ kenkena꞉ peliniao yeni piekeme. Ipika꞉ yeni pieke ekita꞉ dupa piekeme. Ana꞉ pia꞉ka꞉na꞉ta꞉ do ka꞉nda꞉ pa꞉la꞉eki ipula꞉eki mone yaae laa yeni piekeme. 
Ipikana꞉ma꞉ alota꞉ Ya apa꞉o. Hau paeyao nakana꞉ma꞉ pea꞉peke ya꞉la꞉me. Do I̱ pa꞉ta꞉ ipula꞉ kapo I̱ pa꞉ta꞉ na epena꞉ lapeke. Kutu pea꞉peke ya꞉la꞉pate yaka hone pa꞉la꞉eki dia꞉me. Naka꞉ hone pa꞉la꞉eki homekee leekeme. 
Kutupa Yesuma꞉ paa la꞉ka꞉la a꞉paata꞉ mo haliweki u peliekeeki handaata꞉ ipikana꞉ma꞉ Pida pa꞉ta꞉ alota꞉ Saimonoo. Polu pili leekeme. Hosiki handeteke hapeke na ya꞉la꞉pe. 
Handeteke hata꞉ yeni pu hapa꞉peke. La handa꞉la꞉eki a꞉paama꞉na꞉ loa꞉me. Pukima꞉ hone pa꞉la꞉pate lokema꞉ soka꞉la꞉ma꞉ homa adaada꞉ pea wita꞉la꞉me leekeme. 
Kutupa paa pua yeni pitolo hata꞉ mo hande pimanu kone paa leekeme. 
Paa a꞉pa handeekepate ikita꞉ pelimikieki handeekeme. Ika꞉ leke pa꞉ta꞉ u pamba wimiki handaa pimikime. Kutupa ikana꞉ma꞉ Yesu pa꞉ta꞉ hombo peaaluekema꞉ pi ma꞉nda꞉ hone na wimikime. 
Yesuma꞉ hoto tepo peao a꞉pa iki pa꞉ta꞉ alota꞉ Ikita꞉ pa peliake u pita꞉ hoto pita꞉ pimi. Ana꞉e. Mo handa꞉e. A꞉nda꞉ lomba꞉la꞉ halima꞉ Wanda꞉halina꞉ Eiyeke I̱ta꞉ hoke hau pu haleme haliwekima꞉ minina꞉ a꞉nda꞉ lomba꞉la꞉me. 
Pomana꞉ tiaape. I̱ minina꞉ a꞉nda꞉ lomba꞉la꞉ hali koto ipula꞉ handa꞉e leekeme. 
Koto pi alo haena꞉ kone Diudasita꞉ mo hande 12 haliweki ame̱le̱ hayeke hali kone epeekeme. Kutupa Diudasi ame̱le̱ haliweki wopuma꞉ kepete tieke make dolo make miniki epemekeme. Mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make mo tondiki haliwekima꞉ make tapaeyeke handaa epemekeme. 
Yesu minina꞉ a꞉nda꞉ lombeeke halima꞉ mo haliweki pa꞉ta꞉ patehau amba꞉ waleekeeki dupa. I̱ma꞉ nunu pulua꞉ halita꞉ ipikie. Koto hali da꞉ka꞉pa꞉ miniki hao hatuku mea pupe leekeme. 
Kutupa Diudasima꞉ a꞉paata꞉ kutaa kone Yesu pa꞉ta꞉ pua ipiki pa꞉ta꞉ alota꞉ Tekehalio laa ipikana꞉ma꞉ Yesu nunu piekeme. 
Mo haliwekima꞉ nunu piekeeki handaata꞉ Yesu meaata꞉ da꞉ka꞉pa꞉ miniki haemekeme. 
Kutu pimikipate koto pa꞉ta꞉ hayeke hali homekema꞉ ipika꞉ kepete poneke hokulu yola꞉ mea mo yeni peao haemeke haliwekina꞉ you halina꞉ e pa pokao hayeke hali pokeekepate katake tunkulu poka lopaeyekeme. 
Yesuma꞉ iki pa꞉ta꞉ alota꞉ Ika꞉ honema꞉ta꞉ I̱ta꞉ pake hali patema꞉ kepete tieke dolo make miniki a꞉pa pimipe. 
Nate wopu I̱ma꞉ta꞉ mo tembolo da tukiki pa꞉ta꞉ iki ame̱le̱ pi walo haowa꞉pate ikana꞉ma꞉ I̱ na da꞉ka꞉pa꞉ minimime. Kutu pimipate mo Baibolo bukama꞉ la꞉la꞉eki yaalieke leekeme. 
Kutupa disaipolo haliweki paeyaoma꞉ Yesu mina꞉pa꞉lao pindipa pemekeme. 
Wekihali homekema꞉ta꞉ Yesu teli mea peekeme. Koto wekita꞉ pa dau homeke yameekeme. Kutupa haliwekima꞉ ipiki da꞉ka꞉pa꞉ miniki haemekepate 
hande dau leisi minolo haena꞉ loke homeke pindipa peekeme. 
Kutupa Yesu mo yeni peao haemeke you haliwekina꞉ you hali pa꞉ta꞉ hatuku pemekeme. Mo yeni peao haemeke haliweki make mo wape pea wala꞉tiki pu haemeke haliweki make mo tondiki haliweki make paeyao momba꞉la pitimikime. 
Pidama꞉ Yesu mo pate leke teli mea peekeme. Kutupa mo yeni peao haemeke you haliwekina꞉ you halina꞉ da mandane mandane hao yapena꞉ tukikina꞉ pua pitiekeme. Ipika꞉ loke titipu pina꞉yeke mo do handeteke haemeke haliweki ame̱le̱ tina꞉ pitimikime. 
Yeni peao haemeke you haliweki make ka̱le̱sete haliweki paeyaoma꞉ make Yesu lu homaaluekema꞉ pota꞉ weimikipate ota꞉ na handa꞉ wimikime. 
Mo la halemeke haliwekima꞉ yayapiki pi la halemeke handaata꞉ pi homeke na lemeke handaa na handa꞉ wimikime. 
Kutupa mandane haliwekima꞉ tiao la halolo hata꞉ yayapiki pi alota꞉ 
Do halima꞉ta꞉ mo koto haliwekima꞉ a꞉emeke tembolo data꞉ I̱ma꞉ hoeyaalueke lea꞉eki opuma꞉me laa Nate tepo paeya꞉ka꞉na꞉ta꞉ haliwekima꞉ na a꞉elo pa꞉la꞉eki I̱ma꞉ a꞉elueke lea꞉eki opuma꞉me lemekeme. 
Koto lemekepate mo la halemeke haliwekima꞉ta꞉ pimanu alo hata꞉ homeke pi kone na lemekeme. 
Kutupa yeni peao haemeke you haliwekina꞉ you halima꞉ tiao mo haliweki tukiki pa꞉ta꞉ hata꞉ Yesu pa꞉ta꞉ lota꞉ pea alota꞉ Pi ma꞉nda꞉ na lelipikipe. Koto haliwekima꞉ neke laaseme ekita꞉ eki hauna꞉pe leekeme. 
Koto leekepate Yesuma꞉ pi na honda꞉ mea leke pa hayekeme. Kutupa yeni peao haemeke you haliwekina꞉ you halima꞉ ipiki pa꞉ta꞉ paa lota꞉ pea alota꞉ Neketa꞉ Ketiso ya꞉ka꞉ta꞉pe leekeme. 
Yesuma꞉ alota꞉ I̱e. Kutupa iki paeyaoma꞉ mo hande Wanda꞉halina꞉ Eiyeketa꞉ mo Wele Pita꞉la꞉ Teke Halina꞉ popeke nane kikina꞉ pitilieeki handilimikie leekeme. Kutupa ya nane koa tukiki pa꞉ta꞉ hola꞉paniao ipilieeki handilimikie leekeme. 
Do pi opuaata꞉ mo hande yeni peao haemeke you haliwekina꞉ you halima꞉ ipika꞉ daumanu sinki pea alota꞉ Ekipeke la kita꞉la꞉ haliweki ma꞉nda꞉ pa muluma꞉pe. 
Do Koda꞉ laasa꞉ pimanu opuma꞉me. Eki hau puluekema꞉ hone witelemepe leekeme. Mo haliweki paeyaoma꞉ alota꞉ Lu homamana꞉ pipe lemekeme. 
Kutupa mandane haliwekima꞉ ipika꞉ lokena꞉ dopi taata꞉ ipika꞉ leke popeleke a꞉mbao ipiki litolo hata꞉ alota꞉ Neke lia꞉ halina꞉ biki la kie lemekeme. Kutupa mo da handeteke haemeke haliwekima꞉ yombua baemekeme. 
Pidata꞉ oni da mandane mandane hao tukikina꞉ pitina꞉ mo yeni peao haemeke you haliwekina꞉ you halina꞉ e pokao hayeke wandiki ma꞉nda꞉ma꞉ a꞉paata꞉ 
Pidama꞉ ipika꞉ loke titipu pina꞉ pitiekeeki handaa pa wopu handolo alota꞉ Neke make mo Na꞉sa꞉tete hali Yesu ame̱le̱ haepeme leekeme. 
Koto leekepate Pidama꞉ alota꞉ I̱ dia꞉me. I̱ mata꞉la꞉me laata꞉ Nakana꞉ma꞉ le pita꞉ eki epina꞉ lepe. I̱ na handolome leekeme. Kutupa hama nane pua hayekeme. Koto kone koka꞉la꞉ma꞉ tiaaso hata꞉ e̱ leekeme. 
Hande e pokao hayeke wandikima꞉ Pida handaata꞉ mo pambo haemeke haliweki pa꞉ta꞉ paa alota꞉ Koto halita꞉ ipika꞉ tapakee leekeme. 
Koto leekepate Pidama꞉ paa alota꞉ I̱ dia꞉me leekeme. Hosiki hao wetepena꞉ mo hande pambo haemeke haliwekima꞉ Pida pa꞉ta꞉ paa alota꞉ Neketa꞉ ipika꞉ tapake halie. Neketa꞉ Ka꞉lili hali yeke handaa loma꞉me lemekeme. 
Koto lemekepate Pidama꞉ alota꞉ Koda꞉ma꞉ I̱ hoeyaena꞉ Koda꞉ma꞉ opitolo haena꞉ alome laata꞉ Ikana꞉ma꞉ aleme halita꞉ I̱ na handolome leekeme. 
Kutupa koto kone mo koka꞉la꞉ma꞉ hoto yaapo peao tiaaso hata꞉ e̱ leekeme. Kutupa Pidama꞉ Yesuma꞉ amba꞉ ipiki pa꞉ta꞉ leekeeki hone wiekeme. Mo koka꞉la꞉ma꞉ hoto yaapo peao a̱i̱ na leke haena꞉ kone hoto tepo ya biki a꞉mbao lo hoeyaalipikie leekeeki hone wiekeme. Kutupa Pidama꞉ koto leekeeki hone witolo hata꞉ e̱ wopu leekeme.